کاشر رسالہ واد (قسط 1)

Image

گوڈہ "نیب” تہ پتہ "کاشر ادب”  رسالہ بند گژھنہ کنۍ یُس ژھریر کاشرس ادبی ماحولس منز پیدہ گومت اوس، خاص کر نوجوان ادیبن تہ پرن والین ہندِ خاطرہ، سہ ژھریر کور کنہِ حدس تام "واد” رسالن دور۔ گۅڈنکہ شمارہ کہ اداریہک گۅڈنیکے جملہ چھہ یتھہ پاٹھۍ شروع گژھان "ژھۅپہِ ہندس یتھ عالمس منز چھہِ وننکۍ تہ بوزنکۍ تمام ہاوس باسان وٹسۍ گامتۍ۔ مگر توتہِ چھہ بعضے انسان پھٹنس یتھ باکہ یژھان دین۔” واد رسالک گوڈنیک شمارہ دراو 1985 منز تہ امہ کس ادارتس منز ٲسۍ اقبال فہیم، م ح ظفر تہ نذیر جہانگیر۔ کینژِ کالۍ رود پتہ اقبال تہ ظفر اتھ سیتۍ تہ زیادہ پہن پوٚتس اقبالے۔ یہ رسالہ رود 1991 تام ؤری یس منز دۅیہ لٹہِ چھپان۔ امہ پتہ رود نہ میہ کشیرِ سیتۍ زیادہ تعلق لہذا چھیم نہ خبر 14 شمارہ پتہ کٲتیا بییہ شمارہ درایہ اتھ رسالس ونیک تام۔

امہ رسالہ کہ ذریعہ سپدۍ واریاہ نوجوان ادیب متعارف  تہ باقین تہِ میول چھپنک موقعہ، یمن منز خاص کر پانہ رسالک ادارہ، اقبال فہیم، م ح ظفر، نذیر جہانگر،  قاضی غلام محمد، رفیق راز، شفیع شوق، شاد رمضان، عزیز حاجنی، فیاض تلگامی، غلام احمد آجر، جی ایم آزاد، مشتاق مہدی، ثنا اللہ میر بیترِ  شامل چھہِ۔ رسالس منز رودۍ پرانہِ پییہ ہندۍ ادیب تہِ منزۍ منزۍ چھپان یمن منز چمن لال چمن، مظفر عازم، رتن لال شانت، ہری کرشن کول،  ہردے کول بھارتی، غلام احمد گاش، بشیر اختر، اوتار کرشن رہبر، غلام رسول سنتوش، امین کامل، اختر محی الدین، حامدی کاشیمری تہ رحمن راہی شامل چھہِ۔ یتھ رسالس منز ییتیاہ نوۍ تہ پرانۍ ادیب چھپان روزن تتھ چھہ پانے وقار حاصل گژھان۔ اقبال فہیمنۍ یا ونو ادارکۍ کھرۍلد اداریہ تہ تبصرو باوجود گوو یہ رسالہ سیٹھا مقبول۔

واد رسالہ کین یاد گار چیز ن منز چھہِ قاضی غلام محمد، رفیق راز تہ م ح ظفر سندۍ غزل تہ شفیع شوق سندۍ مضمون شامل۔

 گۅڈنکۍ سے شمارس منز چھپییہ امین کامل سنز نظم "تٲے نامہ”۔  یہ نظم بنییہ ریاستس منز  تمہ غیر اطمینانی تہ بیزاری  ہند پیش خیمہ یمیک نتیجہ کانسہ ہندس خیال وخوابس منز تہِ اوس نہ۔ نہ اوس کانسہِ یہ خیال زِ کامل ییہ یژھ ہش بے باک نظم ہیتھ برونہہ کن۔ امہ نظمہِ تہ امہ پتہ امہ قبیل چہ یم نظمہ  کاملن لیچھہ، نوۍ کیو ، بزرگ شاعر  لگۍ تمن ہنز پیروی کرنہِ تکیازِ امہ قسمہ چہ نظمہ  آسہ  وۅنۍ حسب حال۔ واد کس دویمس شمارس منز چھہ اکھ ذہین نوجوان جی ایم آزاد اتھ متعلق لیکھان ” گۅڈنکس شمارس منز یس چیز میہ ساروے کھوتہ زیادہ پسند آو سہ چھہ کامل صٲبن ‘تٲے نامہ’۔ یہ نظم چھیہ کاشرین ہنز مکمل داستان حیات۔ میہ سپز یہ نظم پٔرتھ پانس تہ پننین ہموطنن سیتۍ نفرت تہِ پیدہ تہ ہمدردی تہِ۔” شفع شوق چھہ تریمس شمارس منز اکھ نظمہ متعلق لیکھان "امین کاملنۍ طنزی نظم  ‘تٲے نامہ’ چھیہ اکھ یاد گار نظم آسنہ علاوہ زندگی سرنچ اکھ اہم کوشش۔”

Image

[امین کاملن چھہِ حاشیس منز نظمہ ہندۍ تم بند درج کرۍ متۍ یم واد والیو چھپاوۍ متۍ ٲسۍ نہ۔]

دویمس شمارس منز دراو اختر محی الدین سند اکھ سیٹھہے اہم مضمون یس راج ترنگنی منز کشیرِ ہنزن جایہ ناون ہنزِ غلط نشاندہی متعلق اوس۔ سہ چھہ لیکھان ” کشیرِ ہندین گامہ ناون یہ کھرۍ کانگر اننچ کٲم چھیہ میانۍ کنۍ تمہ دۅہہ شروع سپزمژ ییمہِ دۅہہ اسہِ راج ترنگنی کشیرِ ہنز گۅڈہ کالچ تواریخ ماننک غلط فیصلہ کور۔” مضمون اوس سیٹھا دلچسپ تہ امۍ تل اکھ زبردست بحث۔ وادسے منز چھپییہ اتھ متعلق زہ خط۔ ڈاکٹر ترلوکی ناتھ سند خط اوس اختر محی الدین سندین سوالن جواب کم تہ جذباتی زیادہ، مگر بشیر اختر سند خط اوس اختر محی الدین سندین نتیجن سیتۍ کینہہ دلچسپ حوالہ دتھ اختلاف کران۔ مگر اختر محی الدینن دیت ستمس شمارس منز بشیر اختر سندین اعتراضن اختر بنام اختر خطس منز اکہ اکہ پرُن لایق جواب۔ کشیرِ چھا دراوڈ بسیمتۍ؟ اختر محی الدین تہ محمد یوسف ٹینگ چھہ یہ دعوی کران۔ یمن خطن منز آو یہ تہِ زیر بحث۔ از چھہ نہ یہ کانہہ مسلے۔ کشیرِ ہندین کینژن علاقن منز چھہ ڈی این اے ٹیسٹ کرُن، سورے اول وانگن نیرِ زِ کاشرین منز کہند کہند خون چھہ۔  

دویمس شمارس منزے چھپیوو ہری کرشن کول سنزِ ‘حالس چھہ روتل’ افسانہ سۅمبرنہِ پیٹھ رفیق راز سند تبصرہ یتھ منز تمی یہ بھارتی تہ رہبرس مقابلہ کمتر افسانہ نگار قرار دیت۔ راز سند بنیادی اعتراض اوس زِ کول سندۍ زیادہ تر افسانہ چھہِ ہنگامی نوعیتکۍ تہ بٹن ہندین مسلن تہ اکس محدود جغرافیاہس منز بند۔ امۍ تل بیاکھ بحث، اتھ متعلق آو خطن منز اختر محی الدین تہ شفع شوق سند رد عملہ علاوہ خود ہری کرشن کولن سند حوابی مضمون۔ کول سند جواب اوس مفصل تہ وایاہن اہم کتھن پھٹ کڈان مگر ژکھہِ ہوت۔ وادس منز آیہ واریاہن خطن منز ادبس تہ ادبی بحثن منز بٹل تہ مسلمانی ورتاونک الزام اکھ اکس پیٹھ لگاونہ۔ یمہ بحثک اکھ کونہ اوس اور کن تہِ اشارہ کران۔

واکھ تہ وژن

واکھ تہ شروکۍ چھہِ سانہِ روایتی شاعری ہنز سۅ شعرہ ذاتھ یۅس نہ سازس کھٲلتھ گیونہ ٲس یوان۔ یم شعرہ ذٲژ سازس پیٹھ گیونہ یوان چھیہ تمن منز چھیہ تاکیدچ سیٹھا کم گنجایش آسان۔ مثلا وژن۔ وژنک تہ واکھک اگر کانہہ بوڈ امتیاز چھہ سہ چھہ یۅہے زِ اکھ چھہ سازس پیٹھ گیونک چیز تہ بیاکھ چھہ نہ۔ واکھ تہ شروکۍ چھہِ اکس خاص طرزس منز (الاپ چہ چالہِ) ادا کرنہ یوان یتھ تاکیدی طرز ادا ونو۔ یمن ہند وزن چھہ بذاتی ہیجلۍ مگر طرز ادا چھکھ تاکیدی۔ تاکید چھیہ نہ کاشرس منز لسانی یا عروضی بلکہ واکھ تہ شروکۍ ادا کرنک (اکثر وعظ بنٲوتھ) اکھ خاص طرز۔

واکھ مانس کۅل اکۅل نا اتے
ژھۅپہ مدرِ اتہِ نا پرویش
روزان شو شکھتھ نا اتے
وۅتہِ یے کنہہ تہ سے ۅوپدیش

یہ ما چھہ سازس پیٹھ گیونک چیز!

دویم کتھ چھیہ یہ زِ سازس پیٹھ گیونہ خاطرہ چھہ ضروری زِ بٲتس گژھہِ رژھ کھنڈ زیچھر آسن۔ ژور مصرعہ صنف یتھ منز رباعی تہِ یوان چھیہ چھہ نہ سازس پیٹھ گیونہ خاطرہ انفرادی طور مناسب۔ اکثر گیون والۍ چھہ بٲتھ برونہہ رباعی تہِ اکس خاص اندازس منز محدود ساز وٲیتھ گیوان۔ خالص رباعی پیٹھ چھہ نہ گیون ممکن۔

اگر وزنہ یا لیہ کنۍ تہِ واکھس تہ وژنس درمیان کانہہ فرق چھیہ نہ، موضوع کہ اعتبارہ تہِ زیادہ فرق چھیہ نہ، صرف چھیہ یہ فرق روزان زِ واکھ چھہ ژۅن مصرعن ہند (مٲنۍ تو، وژنک اکھ بند) تہ وژن چھہ واریاہن بندن پیٹھ مشتمل، تیلہِ چھیہ اکھ اہم فرق یہند طرز ادا ، یتھ کن میہ پیٹھہ کنہ اشارہ کور۔

ما بہ دولت نابکار در صحبت سخن وراں

Image

بہ چھس شہناز رشید، نذیر آزاد تہ نگہت صاحبہ سند شکر گزار زِ تم آیہ  میانہ ماجہ ہندس مرنس پیٹھ سیٹھا محبتہ سان میہ نش ییلہ بہ کشیرِ مختصر پاٹھۍ توٚرمت اوسس۔ یہ چھیہ کاشرِ زبانۍ ہنز خوش قسمتی زِ اتھ  منز چھہ ونکیس شہنازس ہیو باکمال شاعر  موجود۔ بہ چھس امۍ سنزِ دویمہِ شعرہ سومبرنِ پراران۔  نذیر آزاد چھہ شاعر تہِ جان تہ ادبہ کس افہام وتفہیمس منز اکھ مثبت رول ادا کران۔ اتھ سلسلس منز چھہ تسنز رسول میرس پیٹھ کتاب سیٹھا اہم۔ رسول میر سنزِ شاعری ہنز قدر شناسی چھیہ نہ امہ رنگہ کانسہِ ہندِ دسۍ سپزمژ۔ نگہت چھیہ تازہ وارد تہ امس سیتۍ چھیہ واریاہ وۅمید وابستہ۔ میہ نابکارس سیتۍ  یہند یہ تصویر چھہ میانہِ خاطرہ تبرک۔ 

رسول میرن اکھ شعر، تریہ تفہیم

صدف منشی پرژھ فیس بکس پیٹھ سوال زِ رسول میر نس
چون پکنے پرزنوومے ہے دورریے
وولے کستورِیے پیرۍ مے تراو نیرِیے
شعرس منز چھا کستور جانور کنہ جاناوار؟
تریہ جواب آیہ۔ کستور بمعنی جانور۔ مگر سیتی آیہ” نیور” لفظکۍ محتلف معنی برونہہ کن تہ شعرچ تفہیم تہِ۔ نیور:
1۔ بمعنی مرگ (شہناز رشید)
2۔ بمعنی پڈر (ایاز رسول نازکی)
3۔ بمعنی نزدیک (علی شیدا)
خبر شعرن ہنز بہترین تفہیم پیش کرن وول یار نذیر آزاد کتہ؟ بہ اوسس تسنزِ رایہ پیاران، امہ کنۍ زِ سہ چھہ میہ ماہر رسول میر تسلیم کورمت ۔ بہرحال، بہ کرہ نذیر آزاد سنزِ غیر موجودگی منز تسند رول ادا۔ اتھ شعرس منز چھہِ یم تریشوے معنی بیک وقت۔ پرانین شاعرن اوس یہ اکھ زبردست شوق تتھۍ لفظ ورتاونکۍ یم مختلف معنی تجویز کرن۔ یہ اوس شعرک حسن ماننہ یوان۔ مگر ازکل چھہِ اسۍ اکس حتمی معنیس شعرہ منزہ چیرتھ کڈنچ کوشش کران۔ معنی ین پیٹھ تہِ چھہ مجادلہ لگان تہ یتھ کتھہِ پیٹھ تہِ زِ اگر کنہ شعرس اکہ کھوتہ زیادہ شکلہ آسن، تمو منزہ کۅس اکھ چھیہ صحیح۔ اتھ پیٹھ چھہِ سانیو بزرگ ادیبو اکھ اکۍ سندۍ انتخاب رد کرۍ متۍ ، یہ سوچنے زِ یہ تہِ چھہ ممکن ز شاعرن ما آسن پانہ کنہ شعرس نظر ثانی کرتھ الگ الگ شکلہ قایم کرِ مژہ۔ رسول میر سندس شعرس چھہِ تریشوے معنی اتھہ روٚٹ کران۔ یہ چھہ نہ ضروری زِ پریتھ شخص تلہِ بیک وقت تریشونی معنین لطف۔ علی شیدا سند معنی تہِ چھہ نہ کم کینہہ۔ لفظی مناسبت تہِ چھیس ڈوٚکھس۔ دوریے تہ نیریے (یعنی دور تہ نزدیک)۔ شہناز رشید سندس معنیس منز تہِ چھہِ کستور، دور تہ نیور مناسبت تھاوان، صوتی اوت نہ بلکہ معنوی تہِ۔ ایاز رسول نازکی سندس معنیس منز چھہ اسہِ "پیرۍ” یعنی قدم بدلاوتھ "پورہ” یعنی مکمل بناوُن پیوان۔ کینہہ پراوے چھہ نہ بدلاوون، شعرس منز چھہ امہِ سیتۍ اکھ نوٚو پہلو نیران۔ ضمنا چھہ عرض ٹینگ صٲبن تہ غلام محمد شاد صٲبن چھہ شعر تتھے پاٹھۍ دیتمت یتھہ پاٹھۍ پیٹھہ کنہ درج چھہ۔

ازچ کاشر شاعری

ایاز رسول نازکی صٲبنس وننس پیٹھ کوٚر میہ یہ ویڈیو جلدی منز تیار تکیازِ اول ٲس نہ مقالہ لیکھنہ خاطرہ فرصت، دوٚیم میہ چھہ نہ شاعری پیٹھ مقالہ لیکھنس ونہِ کانہہ آے یوان۔ آوریر اوس یتھ زِ تہند سیمینار شروع گژھنہ کالہ نیووم بجلی ہندس سوٚتس گاشس منز یہ ریکارڈ کٔرتھ۔ جلدی منز یہ کینژھا ذہنس منز آو تہِ کوٚرم مثالہِ رنگۍ پیش۔ وقت آسہِ ہے بدل مثالہ تہِ ہیکہِ ہا پیش کرتھ۔ میانین کتھن سیتۍ اتفاق چھہ نہ ضروری مگر یمن کتھن پیٹھ غور کرُن ما روزِ سانہِ خاطرہ فایدہ مند۔ یہ ویڈیو ہیوٚک نہ شاید نازکی صٲبس تام وقتس پیٹھ وٲتتھ نتہ آسہِ ہے تمو ضرور یہ سیمینارس منز شامل کوٚرمت۔ ویڈیو زیوٹھ آسنہ کنۍ کوٚرم ژۅن حصن منز تقسیم۔

یہ ویڈیو اوس 45 منٹ۔ امیک وق کم کرنہ خاطرہ پیوو یہ کٔژن جاین ژٹن یمہ کنۍ کنہِ کنہِ جایہ وۅٹہ کھیوان چھہ۔

ژۅن ہند گۅڈنیک حصہ

ژۅن ہند دویم حصہ

ژۅن ہند تریم حصہ

ژۅن ہند ژورم حصہ

موج پننی

 Image

موج، یمو پوشو سیتۍ چھہ چانہ محبتہ میون سورے گرہ خوشبو زار بنیومت۔ اوت تام ٲس ٹیلیفونس پیٹھ چانۍ آواز یتھ بہ رٲچھ کٔرتھ اوسس تہ وونۍ  چھیہ چانۍ یاد۔

 موج، یتھہ پاٹھۍ ژیہ میون روح وزِ وزِ پننہ محبتہ آباد کورتھ،  چون روح تہِ ٲسن بارگاہ الہی منز شاد تہ آباد۔

موج چانین نیک عملن ٲسن خدایہ سنز رضا تہ قبولیت حاصل!

موج چون روح رٔٹن بارگاہ الہی منز تھٔز جاے تہ عزتہ وول مقام!

موج، چانہ خاطرہ ٲسن قربت الہی ہند برگزیدہ انعام!