امین کامل سنز اکھ فارسی نظم ۔ اولین شعرہ نمونہ


muna with shaukat

 یتھ تصویرس منز چھہ میہ سیتۍ میانۍ زہ  پۅپھترۍ بٲے۔ منزس چھہ شوکت احمد یس کامل صٲبنہ اکس ہمشیرہ سند نیچو چھہ۔ یم چھہ کاپرنس نزدیک گوپال پور روزان۔ دچھنہ طرفہ چھہ ڈاکٹر امتیاز منصور یس کامل صٲبنہِ بییس ہمشیرہ سند نیچو چھہ۔ یم چھہ چھانہ پورِ روزان۔ شوکت احمدنۍ موج تہ مول چھہ کینہہ ؤری برونہہ گذریمتۍ۔ امتیاز منصورن مول تہِ گذریوو کینہہ ؤری برونہہ۔ کامل صٲبس چھہ یمو دۅیو بینیو علاوہ (یمو منزہ اکھ حیات چھیہ) زہ بٲے۔ یمو منزہ اکھ بڈشاہ نگرے روزان چھہ۔ بیاکھ برادر چھکھ کاپرنے روزان۔ ‌ژۅن ریتن اندر گذریہ یمن تریشونی بارنین ہنزہ زنانہ۔ کامل صٲب چھہ یمن سارنے زیٹھ۔ ماجہ ہندس مرنس پیٹھ پیوو میہ یمن تمام جاین تعزیتس گژھن۔ گوپال پور تہِ ووتس، زندگی منز گۅڈنچہ لٹہِ۔ شاید اتھۍ کن وچھتھ دیت میہ شوکت صٲبن نیرن وزِ اکھ سیٹھا مۅلل چیز یتھ تسند بڈۍ بب احمد اللہ حکیم (عرف بوڈ حکیم) تہ تسند بب حکیم ٭٭ رٲچھ ٲسۍ کرمژ۔ ٲخرس ووت یہ شوکت احمدس نش۔ یہ مۅلل چیز چھہ بۅنہ کنہِ پیش۔ یہ چھہ کامل صٲبنۍ اکھ فارسی نظم یوس تمو امۍ سے بڈس حکیمس (عمہ حکیم) سوزمژ ٲس۔ میانہِ خیالہ چھہ یہ کامل صٲبنہِ شاعری ہند اولین دستیاب نمونہ — مگر فارسی پاٹھۍ۔

kamil farsi poem

اے مسیح این زمان و اے حکیم ارجمند
از دم تو ہر کسی بسیار گشت از بہرمند
بر در تو بہر درماں آمدیم از کاپرن
این چہ بوالعجبی است کردی دل ما را دردمند
یک گناہ بے پناہ بر خود روا کردندہاں
آنکہ تشہیر دم عیسی بہ عالم کردہ اند
آتشی در زیر پا دارند عاشق بہر دوست
این ندانند مگر آنہا کہ خود ہم سوختند
تو چہ دانی لذت زہر کہ نوشد این غریق
می خوری در بستی گوپال پورہ شہدو قند

غریق کاشیمری

شوکت احمدن ونن چھہ ز‏ خط اوس کامل صٲبن کالجس دوران لیوکھمت۔ کامل صٲب چھہ اکس جایہ لیکھان زِ تسند مول اوس علاج خاطرہ تس امس حکیمس نش کالج گژھنہ برونہہ نوان۔ اگر تتھ کن گژھو تیلہ چھہ یہ کامل صٲبنہِ کالج اژنہ برونہم چیز۔ کامل صٲبن بابہ صٲب گذرییہ 1939 منز ییلہ تم کالج کس گۅڈنکس ؤریس منز ٲسۍ۔ ممکن چھہ یہ ما آسہِ تمی ؤریک۔ بہرحال تحقیق چھہ جاری۔ حکیم ٭٭ سندس گرس منز کور یمو پتہ رشتہ۔ کامل صٲبن گرہ کوتاہ چھہ امس حکیمس نش متاثر اوسمت، سہ چھہ یتھ نظمہِ منز ظاہر۔ امۍ حکیمن چھیہ کینہہ مسودہ طبس متعلق فارسی پاٹھۍ پتھ کن تراوۍ متۍ۔

میہ ہوو یہ نظم کامل صٲبس۔ واریاہس کالس رود سہ اتھ وچھان، تمہ پتہ زن نہ پہچوننے تہ دیتن واپس۔ پرژھمس یہ کر سا چھتھ ژیہ لیوکھمت۔ دوپن تہِ کس چھہ وۅنۍ یاد۔ دوپمس شوکت اوس ونان یہ چھہ یمو کالجس دروان لیوکھمت۔ تورہ دوپن خبر آسیم۔ 1939 منز اوس کامل صٲب 15 وہُر۔ کامل صٲب اوس یمن دوہن غریق تخلص کران۔

امین کامل سنز اکھ فارسی نظم ۔ اولین شعرہ نمونہ” پر 3 تبصرے

  1. یہ چھہ پزی مولل سرمایہ- اگر باقی بزرگ شاعرن ہندي یتھي چیز دستیاب سپدن ( مے چھہ یقین زہ یتھي چیز آسن موجود) سو آسہ بڈ تحقیقی کام- ساني بزرگ آسي نہ صرف فارسی زباني سيتي لوئے خوئے تھاوان بلکہ آسي امکي شعری رموز و اسرار تہ زانان-یم آسي فاری/اردو شعری روایتکي پروردہ -سانین نوجوان ادیبن ہنز بدقسمتی چھے یہ زہ تم چھہ امہ روایتہ نشہ دوران-

    پسند کریں

  2. میہ چھہ باسان کامل صٲبن آسہِ شاعری ہنز ابتدا فارسی سیتی کرمژ۔ یوت تام نہ اتھ منز کانہہ مشق آسہ ہیس ، ہنگہ تہ منگہ ما لیکھہ ِہے اتھ منز بٲتھ۔ امہ پتہ یا اتھ سیتۍ سیتۍ ما آسہِ ہے اردوس کن تہِ آمت، خاص کر ییلہ سرینگر آسہِ پرنہ خاطرہ ووتھمت۔
    یہ چھہ ہاوان تہندس لوکچارس تام چھیہ فارسی زبان ورتاونہ یوان ٲسمژ۔ لیکھن والۍ تہِ ٲسۍ تہ پرن والۍ تہِ ٲسۍ۔

    پسند کریں

  3. بالکل صحیح- سانس علاقس منز آسي واریاہ بزرگ وہمہ صدی ہندس آخرس تام زندہ تہ فارسی تہ عربی پاٹھي شاعری کران- رتن پور پلوامکي شمس الدین غمگین تہ پوژھلکي نورالدین تراب آسی فارسی زباںی ہندي ہنر مند شاعر-میانی والد مرحوم آزاد صابن اوس نہ بہ درس فارسی پورمت مگر منزی آسی کاشرس کلامس منز فارسی یکي اکھ زہ مصرعہ تراوان-۔۔۔۔۔۔۔ مثلا-
    یادش بخیر منم بیگانہ نیست
    دانم چہ بود و ہست دیوانہ نیست
    من آں بہ راز ازل دارم شعور
    مستانہ میاني نظر دل بے قصور-

    پسند کریں

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s