خبر میہ کیا اوس ونُن


ادیب تہِ چھہ عوامی شخصیت آسان۔ لوکن چھیہ نہ صرف امۍ سندین تحریرن منز دلچسپی آسان بلکہ امۍ سنزِ زندگی منز تہِ۔ جدید تنقید ونۍ تن اسہِ خبر کوتاہ تہِ زِ ادب پرنہ، سمجھنہ خاطرہ چھیہ نہ ادیب سنز ذاتی زندگی زاننۍ ضروری، یہ زاننہ ورٲے چھہ نہ چارہ تہِ۔ الیٹ اوس نہ ادیب سنزِ ذاتی زندگی ادبس منز جاے دنہ خاطرہ تیار، حالانکہ یمہ قسمچ شاعری تمۍ پانہ کرمژ چھیہ تتھ چھہ سیدِ سیود تسنزِ ذٲتی زندگی سیتۍ واٹھ۔ ہپارۍ  چھہِ اسۍ شاعر سنز زندگی ادب سمجھنہ خاطرہ غیر ضروری زانان تہ یپارۍ چھہِ افسوس تہِ کران زِ شمس فقیر سنزِ زندگی متعلق چھہ نہ اسہِ کینہہ پتاہ۔ اکہ طرفہ چھہِ ونان زِ ادیب سنز شخصیت کرِ نہ شاعری سمجھنس منز کانہہ مدد تہ بییہ طرفہ چھہ کلیات مہجورس منز حالات زندگی تہ مزازہ، خۅے بیترِ شخصیتی معاملن پیٹھ صفحہ ہا سیاہ کران۔

 ادیب سند عوامی شخصیت  آسُنے چھہ تسنز زندگی زاننک دعوت دوان۔ الیٹس اوس کراس ورڈ پزل (معمہ) حل کرنچ بیمارۍ، تسۍ اوت نہ بلکہ وسٹن آڈن صٲبس تہِ۔ آڈن سنزِ شاعری منز مشکل تہ غیر مانوس لفظ آسنک  جواز (یمن ہندِ خاطرہ ڈکشنری وچھنۍ پیوان چھیہ) ہیکہِ یہ تہِ اکھ وجہ ٲستھ۔ راہی تہِ چھہ پننہِ شاعری منز غیر مانوس تہ متروک لفظ ورتٲوتھ مشکل پیدہ کرنچ ارادی کوشش کران۔ یہ ٲس جدید شاعرن ہنز اکھ بیمارۍ۔ غالب اوس نہ اتھ معنیس منز مشکل۔ از چھیہ تمۍ سنز زبان فارسی آمیز آسنہ کنۍ مشکل باسان مگر تمۍ سندِ وقتہ ٲس نہ سۅ غیر مانوس۔ غالب سنز مشکل پسندی چھیہ تسندین خیالن منز۔ اکس مضمونس منز مختلف فکری پہلو ژھارنۍ۔ سۅ شاعری ٲس تمی قسمچ شاعری۔ عمدا مشکل بناونہ ینہ واجنہِ شاعری منز چھہ نہ خیالک کانہہ سرینیر آسان۔ تہِ اوس نہ آڈن سنزِ شاعری منز تہِ۔ تہِ چھہ نہ راہی سنزِ شاعری منز تہِ۔

کامل ییلہ ریٹایر گوو تس روز نہ ادبی کارگزاری سیتۍ زیادہ دلچسپی، بییہ ٲسۍ تمہ وقتہ ریڈیو تہ ٹی وی والۍ راہی یسے زیادہ بلاوان۔ شاید اوسس یہ خدشہ تہِ شاعری منز گوژھ نہ نویر نہ آسنہ کنۍ پنن پان دہراون پیون، لہذا ہیوتن کینژن ورین نثرس کن کرُن، پتہ ژھنن سہ تہِ ترٲوتھ۔ کینژو تھٲو بیہ زو شاعری ہنز مشق جاری۔ اتھ وٲنسہِ منز چھیہ یہ عمل کینژھا امہ کنۍ تہِ ضروری آسان زِ ذہن گژھہِ فعال روزن تہ کینژھا امہ مۅکھہ عوامس منز پننۍ مقبولیت برقرار تھاونہ خاطرہ چھہ کینہہ نتہ کینہہ کرُن ضروری۔ عروضی شاعری تہِ بوزۍ تو معمہ حل کرنکۍ پاٹھۍ اکھ ذہنی ورزش مگر یمۍ شاعرن عروضی شاعری ہنز ورزش شروع پیٹھے کرمژ آسہِ، تسندِ خاطرہ چھہ نہ اتھ منز تہِ کانہہ چلینج۔ سٹیجن پیٹھ کھستھ صدارت کرنۍ، کتابہ رلیز کرنہِ تہِ چھیہ ذہن تہ شخصیت دۅشوے فعال تھاونچ اکھ کوشش یۅس نہ پریتھ جایہ تہ پریتھ کٲنسہِ مہیا چھیہ۔

مظفر عازم چھہ کمپیوٹرس پیٹھ شکلہ بناونس کن لوگمت، حالانکہ خالص قافیہ آرایی تہِ روزِ یمو شکلو کھوتہ بہتر۔ مگر یہ ذہنی آوریار چھہ تسندِ خاطرہ اہم کینژھا امہ کنۍ تہِ زِ کمپوٹر کین امکاناتن منز چھیہ تمس دلچسپی یمہ کنۍ تمۍ اسہِ کینژن نفرن کاشر کیبورڈ تہ فانٹ تہِ دیت۔یتھہ پاٹھۍ میہ امۍ سنزِ  کمپیوٹر گرافی ہنزن شکلن منز کانہہ دلچسپی چھیہ نہ، کاشریو ادیبو تہ ادارو تہِ ہٲو نہ امۍ سندس کیبورڈ تہ فانٹس منز کانہہ عملی دلچسپی۔ خبر میہ کیا اوس ونُن، بتہ کھینک وقت سپد، لہذا تراوون کتھ ییتہ نے۔

One thought on “خبر میہ کیا اوس ونُن

  1. عازم صابن یس کمینٹ یتھ پوسٹس پیٹھ فیس بکس پیٹھ کور سہ تھاوون ییتہ نس رژھرتھ۔ فیس بک کمینٹ چھہ نہ پتہ اتھی یوان:

    Muzaffar Aazim Muneebur Rahman
    یہ کتھ ہیکہ سے یوت کرتھ یس کار زانہ ون، محبت کرون تہ قدردان آسہ۔ بہ چھس سیٹھا شکر گزار۔ جواب دنس کرم نہ جلدی تکیاز کینژھا اوسس بہ اتھ سنن یژھا ن تہ کینژھا اوسس دوستن ہند ردعمل وچھن یژھان۔ سنتھ یہ فکرہ تورم تہ کورم عرض، دوستن ہند ردعمل چھہ منیب الرحمانس تہ میٲنۍ پٲٹھۍ دلہ چو اچھو وچھن، یمن ظٲہری اچھن آو نہ بوزنہ کینہ ۔ اوو، ارشاد شمسی ین ونۍ پننۍ راے یتھ پیٹھ منیب الرحمانن پننۍ راے بٲو۔
    بہ ہیکہ صرف یوتے ونتھ ز بہ چھس نہ فیس بکس پیٹھ صرف فوٹو تراوان۔ پننۍ یا پننہ خاندانکۍ فوٹو نہ بلکل۔ بہ چھس تتین ییتہ سہ وقت برونٹھہ کنہ چھہ ییلہ تتھ کیمیٲیی کلس جز گژھن الگ یتھ مظفر عازم ونان چھہ۔ روحک راز زانن زانن وٲلۍ، تنہ ہند جز بنن کلٮ۪ن، پوشن تہ کریلن ہند کھٮ۪ن۔ توے ما آسہ بہ ہیروینہ ہنزہ کلہ ہیرہ بناوان پوشہ گوند تہ تمۍ سندس تھزہ کھورہ کھۅربانس بناوان ہٲر۔ یہ چھنہ میانہ خٲطرہ الگ شغل، یہ چھے اکھ اژھٮ۪ن تخلیقی کاروٲیی۔ سۅے اڈکج شٲعری شکلن منز تہ سۅے لفظن منز۔
    یہ مشورہ زہ، ” خالص قافیہ آرایی تہِ روزِ یمو شکلو کھوتہ بہتر” ترِہیم وارہ پٲٹھۍ فکرہ اگر بہ شیٹھن ورین شٲعری کرتھ شیٹھ نے، تۯہ نے، پنداہ نے، تہ توتہ ساڑھ ستھ کٲشرۍ وچھہکھ یمو میٲنۍ شٲعری سنتھ پرمژ آسہ ہے۔ بہ چھس تمن کٲشرین شٲعرن ہند شکر گزار یم فیس بکس پیٹھ میٲنہ شاعری "لایک” کران چھہ، تتھے کنہ یتھ کنہ بہ تمن کٲشرین، یورپی تہ امریکی فیس بک دوستن ہند شکر گزار چھس یم یمن شکلن "لایک” کران چھہ۔ یہن تہ چھے غنیمت اگر "لایک” کرنہ ستۍ وٲنج لۅتنۍ گژھہ۔
    شنۍیا بزۍ گے دردکۍ آلو ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
    دنیا دمہ پھٹۍ پننیو حالو ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔َ۔۔۔۔۔۔۔۔۔۔
    *

    پسند کریں

Muneeb کو جواب دیں جواب منسوخ کریں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google photo

آپ اپنے Google اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s