بیہ سریہہ مقام

کانہہ تہِ شعر پٔرتھ چھہ ذہنس منز سوال وۅتھنۍ لازمی تہ سوال وۅتھنۍ چھہ جان چیز۔ اگر نہ سوال ووتھ ، یا تہ آسہِ شعر معمولی نتہ آسہِ تمیک مضمون، یا آسن تمکۍ پیکر تہ استعارہ، نتہ آسن تمکۍ الفاظ  تہ زبان ویدۍ۔ اکثر شعر پٔرتھ چھہ نہ میٲنس دلس تہ دماغس کٕتہ کٕتہ تہِ گژھان، مگر کانہہ کانہہ شعر چھہ تھپھ تراوان تہ سوچنس پیٹھ مجبور کران۔ یموے منزہ چھہ شہناز سند یہ شعر :

کۅ پاٹھۍ پیوکھ ژیتس یتھ بیہ سریہہ مقامس پیٹھ
زہ ژور قطرہ اچھن منز میہ ٲسۍ رٲوۍ تمے

یہ شعر چھہ اکس نازک  مقامس یا معاملس کن اشارہ کران۔ امہ کتھہِ ہند چھہ شعرس سننہ برونہے احساس گژھان۔  کۅپاٹھۍ لفظہ سیتۍ چھہ ظاہر زِ امہ شعرک مخاطب یاد پیون چھہ نہ کانہہ خوشگوار واقعہ۔ کۅپاٹھۍ گوو زبردست پاٹھۍ، ژرۍ پاٹھۍ، ولٹہ پاٹھۍ، کنہِ چارہ روس۔ یعنی یاد پینک یہ تجربہ دراو  تکلیف دہ۔ کیازِ؟  امیک جواب چھہ امہ پتے ینہ واجنہِ ترکیبہِ منز۔ "بیہ سریہہ مقام”۔ مقام چھہ  جاے تہِ تہ سفرک یا زندگی ہند کانہہ مرحلہ تہِ۔ سریہہ آسن گوو ماے محبت، لول۔ سۅ جاے تہ سہ مرحلہ یُس ریگستانکۍ پاٹھۍ خشک آسہِ۔ یتھ نہ کانہہ سریہہ آسہِ، یس سریہہ کہ خاطرہ کریشان آسہِ۔ یتھ منز نہ محبت آسہِ بلکہ شاید تمچ کمی یا تمیک ضد، نفرت۔  بیہ سریہہ مقام ترکیب چھیہ مختلف استعاراتی معنین ہنز متحمل۔ بیہ سریہہ مقام چھہ جایہ ہند  تہ وقتک استعارہ تہِ بنان۔ کٲنسہِ ہند یاد پیون، یُس شاید جدا آسہِ گومت،  یا یس سراسر لول اوس، چھہ لازما انسانہ سنزہ اچھ ادراوان۔ کٲنسہِ ہندس یادس منز اوش ہارُن تہ تمہ سیتۍ وقتہ کس کریشونس ریگستانس کانہہ فرق نہ پینۍ بلکہ پننۍ اشۍ  قطرے راوراونۍ  چھہ امہ شعرہ کس واقعس تکلیف دہ بناوان تہ امیک مضمون تہِ مشخص کران۔

زہ ژور قطرہ اچھن منز آسنۍ چھہ یہ اشارہ تہِ کران زِ اوش ہارۍ ہارۍ چھیہ اچھ گۅڈے خشک گمژہ۔ یتھ کتھہِ کن تہِ اشارہ زِ یاد پینہ وٲلس نش یوتاہ ماے محبت تہ سریہہ اوس، تتھ سیتۍ ہمسری چھیہ نہ ممکن۔ یا تہ گژھہِ تیوت سریہہ تہ اوش اچھن منز آسن زِ یہ وقتک صحراو گژھہِ سیراب نتہ راون یم قطرہ تہِ یم کینژن شخصن (مثلا متکلم) سنزن اچھن منز  موجود چھہِ۔ صحراو چھہ تیتھے یتھ اوس، انزہ منزہ اگر روو کینہہ تہ یم پننی اشۍ قطرہ، یم خبر کنہِ مشکل گرِ منز ما یہن پانہ سے بکار۔ انسان چھہ نہ صرف نیبرمس دنیاہس بلکہ پننس پانس تہِ لول وندان۔ کینہہ قطرہ چھہِ پننہ خاطرہ تہِ رژھراونۍ یپوان۔

شعرس منز کتھ چیزس دمو مرکزی اہمیت، کٲنسہِ ہندس یاد پینس، بیہ سریہہ مقامس، کٲنسہِ ہندس اشکۍ قطرہ راورنس؟ معنیچ قطعیت چھیہ سوالن ہند سلسلہ بند کران۔