رندِ بال درایس

رندِ بال درایس، اندِ کیا نیایس
ہندِ روس چھون چھم پھوت یے لولو*
انور وار

اتھ شعرس پیٹھ کمینٹ کران چھہ مظفر عازم ونان ز اتھ منز چھہ "اشارہ زِ کل زندگی کٔرتھ (رندِ نیرتھ) یہ حاصل تہِ چھہ نہ پانہ سے ٹارِ کھسان۔”

یہ چھہ امیک استعاراتی یا زیرین معنی یُس شعرس اندر لفظی طور موجود چھہ نہ بلکہ چھہ امہ موکھہ اتھ عطا کرنہ یوان یا یمن لفظن ہندِ ذریعہ ورگہ پاٹھۍ زاننہ یوان تکیاز اسہ چھہ یتھ کتھہِ پیٹھ سماجی طور اتفاق ز شاعر تہ خاص کر تمہ دورکۍ شاعر یمن اسۍ بعضے بلکہ اکثر صوقی شاعر تہ ونان چھہِ، چھہِ نہ وسی پایہ، پامال تہ معمولی کتھن ہند اظہار کران، شعرچ ظاہری صورت ٲسۍ تن زمینی، روح چھس آسمانی۔ انور وار سنز سٲرے شاعری چھیہ امہ دورکین تہ امہ قسمہ کین باقی تمام شاعرن ہندۍ پاٹھۍ زیریں سطحہِ ہنزے شاعری۔ یہ چھیہ امہ رنگہ روحانی شاعری، تکیازِ اتھ منز چھیہ ظاہری صورت بہانہ، مضمر معنی یعنی امیک روح اہم۔ بقول مظفر عازم ” یہ وونمت چھہ تمہ سیتۍ چھہ تتھ کن حیس گژھان یہ وننے تھوومت چھہ۔” یہ وننے تھٲوتھ چھہ، سہ چھہ انور وار سنزِ شاعری ہندس سیاقس منز تیوت نون زِ ونۍ متس کن چھہ نہ ظۅنے گژھان۔

میہ یمہ ساعتہ یہ شعر پور یا ییلہ بہ یتھۍ شعر پران چھس، خبر میہ کیازِ امہ کس معمولی معنیس لطف یوان، تہ یہ باسان اگر نہ امیک روزانہ تہ معمولی معنی قایم سپدِ، زیرین معنی کتھہ پاٹھۍ ییہ وجودس؟

شعر چھہ ظاہری طور ونان زِ ہند اننہ کہ بہانہ درایس گرِ، مگر یہ اوس بہانہ۔ واپسی پیٹھ پھوت خالی آسنہ کنۍ رندِ نیرُن تکیازِ پریتھ طرفہ چھیہ اچھی اچھ۔ نیاے چھہ شاعری منز زیادہ تر لولہ نیایی۔ سانس سماجس منز چھہ لول اکھ نیاے، اتھ کیا بنہ؟ اتھ شعرس منز چھیہ بیرونی سطحس پیٹھ سانۍ سماجی کہانی درج، یۅس میانہ خاطرہ تیژے اہم چھیہ ییژاہ اتھ کہانی منز مضمر بیاکھ کنایاتی کہانی چھیہ۔

اسۍ ہیکون نہ ظاہری پاس یکسر نظر انداز کٔرتھ۔

مگر یہ تہ چھیہ حقیقت زِ اگر نہ شاعری اسہِ معمولی پیٹھ کنہِ غیر معمولی سطحس سیتۍ زان کرناوِ، یہ ہیکہِ نہ بڈ شاعری بٔنتھ۔ یہ غیر معمولی سطح ہیکہ لفظی سطح علاوہ بیاکھ سطح ٲستھ، یہ چھہ نہ ضروری ز یہ کیا آسہِ لازما روحانی، فلسفیانہ یا مابعد الطبیعاتی۔

یہ تہِ چھہ اکھ سماجی مفروضہ زِ یۅس شاعری ظاہری سطح علاوہ اکھ زیریں سطح پیدہ کرِ، سۅ چھیہ بٔڈ شاعری۔

* میہ چھہ باسان عازم صابس چھیہ امہ بٲتہ کس دریفس منز غلطی گمژ، یہ ہیکہ مسودہ یا روای ین ہنز غلطی تہِ ٲستھ۔ وزنہ لحاظہ گژھہِ اکوے "لو” آسن، یتھہ پاٹھۍ تمو امہ کس گۅڈنکس شعرس منز دیمت چھہ۔ تمہ پتہ چھکھ پریتھ شعرس "لولو” پتہ کنہ تھوومت یس میانہ خیالہ صحیح چھہ نہ۔

دویمس شعرس منز گژھہِ "ساتہ نیک” بدلہ "ساعت نیک” آسن۔
پانژمس شعرس منز گژھہِ "پھۅلہ ون باغہ دل” بدلہ "پھۅلہ ون باغ دل” آسن۔
یم چھیہ کتابت چہ غلطی۔