وزنن ہنز پارۍ زان (1)

یہ چھہِ اسۍ مٲنتھ زِ عروضچ بنیاد چھیہ نہ حروف مکتوبی بلکہ حروف ملفوظی ین پیٹھ۔ یمہ ساعتہ اسۍ یہ حقیقت تسلیم کران چھہِ ، اسۍ چھہ یکدم صوتیات کس میدانس منز قدم تراوان۔ صوتیات چھہ زبانۍ ہنزن آوازن ہند اکھ باضابطہ علم۔ سانۍ ادیب چھہِ زبانۍ ہنزہ آوازہ گنزراونس علم صوتیات زانان۔

یہ ونن زِ خلیلس کیا ٲس نہ صوتیاتچ زان چھیہ سراسر خلیل ناشناسی تہ لاعلمی۔ عربی زبانۍ ہند صوتیات چھہ دراصل حرف کس پیچیدہ، کثیر سطح تصورس منز پوشیدہ۔ یہ تصور سمجنہ خاطرہ گژھہِ لسانیات تہ عربی زبانۍ ہند باضابطہ علم آسن۔ خلیل اوس اکھ ماہر لسان تہ ماہر لسانیات۔ اردو تہ کاشرۍ شاعر تہ نقاد چھہِ نہ فاعلاتن فاعلات کہ گردانہ نیبر تس متعلق کہنی زانان تہ نہ زانن یژھان۔

کلاسیکل عربی زبانۍ ہندِ خاطرہ اوس نہ ہیجلیک بلکہ ماتراہک (mora)تصور زیادہ کارگر۔ یہ تصور چھہ امہِ کس عروضس منز تہِ بنیادی حیثیت تھاوان۔ یہ ونن زِ ” وزنک سنگ بنیاد چھہ ہیجل تہ خلیل نس عروضس منز چھہ ہیجل نظر انداز کرنہ آمت یس امہ کہ ناہنجار کنک وجہ چھہ” (راہی) چھیہ لاعلمی یمکۍ اسۍ سٲری شکار چھہِ۔۔ شعری آہنگ چھہ زبانۍ ہنزن خصوصیژن سیتۍ تعلق تھاوان، لہذا چھہِ وزن (وزنہ نظام یا عروض) تہِ یمن خصوصیژن مثلا تاکیدس، ہیجلس، ہیجلین ہندس ژھۅچرس زیچھرس، ماتراہن، تہ طرزِ اداہس (tone) اندۍ پکھۍ کھڑا کرنہ آمتۍ۔ یعنی وزنچ چھیہ نہ کانہہ آفاقی بنیاد۔ ییتہ کینژن زبانن منز ہیجل چھہ، کینژن منز چھہ تاکید، کینژن منز دۅشوے، ییتہ کینژن زبانن منز ماترا چھہ، کینژن منز چھہ طرزِ ادا۔ لہذا چھہ یہ تہِ ضروری زِ عروض علاوہ گژھہِ زبانۍ ہنزن خصوصیژن ہنز تہِ زان آسنۍ۔ یمن خصوصیژن ہند علم سپدِ تیلی حاصل ییلہ اسہِ زبانۍ ہنز ہیجلۍ تشکیل، صوتیاتی عمل تہ صوتیاتی تبدیلی ہندین تصوراتن ہندعلم آسہِ۔ امہِ خاطرہ چھیہ زہ ژور کتابہ پرنہِ ضروری۔ از کل چھہ یہ سورے علم انٹرنیٹس پیٹھ دستیاب مگر پرن وول گژھہِ آسن تہ سہ علم صحیح تناظرس منز سمجن وول گژھہِ آسن۔

ینہ والین پوسٹن منز کرو اسۍ کینژن اہم وزنہ نظامن ہنز زا ن صوتیات کین یمنے تصوراتن ہندِ ذریعہ پیش۔ کاشرس منز کُس یا کس کس وزنہ نظام چھہ ورتاونہ آمت تہِ زاننہ خاطرہ تہِ چھیہ یہ زان ضروری۔