بم تہ بنگولہ

بم تہ بنگولہ
منیب الرحمن

بحث ووٚتھ گۅڈہ آوا بنگولہ کنہ بم
اکہ طرفہ ٲسۍ زیادہ بییہ طرفہ کم
[آنگنس اکس گوٚو بنگولہ ٹاس
شور ووٚتھ رازدانہِ خاص الخاص]
فرق کیا چھیہ دۅن منز اولہ تہ دولہ
کانہہ اگر زینتھ آو ترٲوِن بنگولہ
کٲنسہِ ہے ہور تہ گوس کینہہ کم
تمۍ تہِ زن پھاٹناوۍ جایہ جایہ بم
شُرین اوس باسان تمو کوٚر مخولہ
سوال ووٚتھ یہ اوسا بم کنہ بنگولہ
[پۅندِ ہندِ پاپتھ بُڈن کٔر ناس
ژرِ پوٚپ کرنہِ لوٚگ عوام الناس]
اگر ہے اتھہ دوٚد تیلہ چھہ بنگولہ
تان آیہ چھکرنہ زخمی گوٚو ٹولہ
زانۍ زیو تیلہ آو پھاٹونہ بم
بحث گوٚو تیزان دمبدم
فیصلین نش واتۍ بم تہ بنگولہ
تمو کوٚر پھس پھس ترووکھ بسگولہ
[وزملو نبس پیٹھ کو٘ر اتھہ واس
یمۍ نہ اچھ ہیو٘ر تج تمۍ تہِ کھیو٘و تراس]
بمے گوٚو بنگولہ بنگولہ بم
ترہ رم ترہ رم ترہ رم تم