اکھ احساس

محبت ژیۍ کورتھ ژیۍ پیدہ کورتھس
کُنے ہے آسہ ہا تیلہ ٲس اکھ کتھ
مگر دتتھم ضرب، ییتیاہ ضرب، وۅنۍ
زِ دوریر سیتۍ چھہِ نہ اسۍ پرزہ ناواں
نہ پننے پان نے چونے محبت

آنجارۍ زمانہ

تم راتن منز
زوتن والۍ
خۅفتہ بترٲژ
انسانن
تہندین جسمن
خوابن
ژھاین
ہۅہراین
زن ٲسۍ رٲچھ کران
اسمانس پیٹھ

تم تارکھ وسۍ پیتھ
لژھہِ گے
چٲنس میٲنس
یتھ آنجارۍ
زمانس منز

گُرتہ کُل تہ گُر


پتہ ییلہ کُلہِ پیٹھہ
گُر ووتھ بۅن
بۅنہ کنہِ اوس
اکھ ژرِ بچہ نیتھہ نون لوٹ گلنٲوتھ
اکھ گاڈ زیو مژرٲوتھ
تہ بییہ اکھ بیور گگرس سیتۍ ہینگ ملنٲوتھ
پراران
تمۍ تج دو
تمۍ دوپ پانو ییتہِ چھہ نہ کانہہ سیود
میانی عقلہِ کھستھ گوو کُل
تمہِ پتہ ووتھ کُل گُرِ پیٹھہ بۅن
بۅنہ کنہِ اوس
گُر تس پراران
بییہ اکھ ژرِ بچہ
بییہ اکھ گاڈ
بییہ اکھ بیور
بییہ اکھ گگُر
تہ بییہ اکھ کُل

شام

ڈل آبس منز
سفید معصوم
اوٚبرہ چہ چھلہِ ہندۍ
رتہ سرۍ پانن
ترٲمژ وۅٹھ
تہ بالو پیٹھہ وژھمژہ
بد بخت ژھایہ
مس پرٍٹتھ
آبس اندۍ اندۍ
ماتم گیر

شعر تہ معنی

 

 

1

ٲخر دراو
لفظن ہنزِ گۅژِ منزہ
شعرک پنہ پونپر
تہ ژوٚل
نے غم دنیا
نے عم معاش

 

2

شعرس پتہ پتہ نیرتھ
کوت واتکھ؟
اتھ چھیہ نہ منزل یابی
بس وتہ کھروو!

 

3

وۅپر زیون ہنزِ
جسمانی خواہشہِ ہنز ژاپھ
یمس لج
تمۍ سندِ روحچ کج آواز
چھیہ شعرن منز
ہاہاکار کران

 

4

چانی زیورِ منزہ درامت
پھیار
یعنی شعر
چانی سوچکۍ دیوار
کران مسمار
کوتاہ کرہس
انکار

 

5

کھسۍ تن دریاوہ منزہ
گاڑو بدلہ خر
یا ربہِ کۅنڈل
ٲخر تہ نیرِ
شعرچہ بند بوتلہِ منزہ
جن

 

6

شعرچہ تھزِ لنجہِ پیٹھ
پننس جسمس کوٚنڈ ژٲنتھ
راگ گیون وٲلس
جاناوارس
سلام

 

7

ژھینی نہ ووٚب ییلہ کھس با لوٚب
شعرچہ لبہِ پیٹھ کمۍ کیا لوٚب

سہ تہِ اکھ شعرے سۅ تہِ اکھ تریش
قطرس منز یمۍ دریا لوٚب

شعرچہ لنجہ پیوٚو وسۍ پہۍ پن
واوہ چہ کۅچھہ دوٚپ میۍ ما لوٚب

تیمبرِ تتر تل زولن نار
شعرکۍ کوٚبۍ وشنیرا لوٚب

اکۍ ژھن ترٲوتھ پھٹمت شعر
تتھۍ منز بییۍ اکۍ دنیا لوٚب

لبۍ نہ رمز شعرکۍ لیکن
سا رے گا ما پا دھا لوٚب

 

 

پنہ ؤتھر

سۅنہرۍ تاپکۍ وشنیرن
بونہِ لنگس پیٹھ
وۅلساوۍ متۍ

واون دژ چھک
چھکرنہ آے

اکۍ کٔڈ گمنامی ہندس
گرد و غبارس منز
طرفاتن پھیرتھ وٲنسٹھ
وٲنس

ذاتہ کہ عرفانکۍ
ڈنگل مژرن کوٚڈ بییس
ژٔکس تل تھکھ

تریمس کٔڈ نارن کل
سورے اوٚند پوکھ زولن
پانس سیتۍ