کلچرل فرنٹکۍ تریہ ڈراما

 

wtd2تھیٹر کس عالمی دۅہس پیٹھ

پروفیسر جیا لال کول چھہ پننہِ کتابہِ "سٹڈیز ان کشمیری” منز لیکھان زِ اکتوبر 1947 کس قبالۍ حملہ کس رد عملس منز بنوو کاشریو ادیبو کلچرل فرنٹ تہ لیکھکھ بٲتھ تہ افسانہ تہ کینہہ ڈراما کٔرکھ سرینگر تہ گامن منز پیش۔ کول چھہ "زہ بٹا تریہ” تہ "ڈالر صاحب” ڈراماہن ہند ناو ہیوان۔ اکھ زمیندارن متعلق تہ بیاکھ سامراجی قوتن متعلق۔ ونان چھہ زِ یم زہ ڈراما ٲسۍ سوم ناتھ زتشی، نور محمد بٹ، پشکر بھان تہ پران کشورن رٔلتھ لیکھمتۍ۔ سوال چھہ یم ڈراما چھا کنہِ جایہ تحریری صورتس منز رژھرتھ؟ دویم یہ زِ پشکر بھان تہ پران کشور چھا پزۍ پاٹھۍ یہندس لیکھنس منز شامل ٲسمتۍ کنہ یم چھہ جیال کولن پانے پننہِ طرفہ یمن ڈراماہن حصہ دار بنٲوۍ متۍ؟ امین کاملن چھہ وونمت زِ یم زہ حضرات چھہِ نہ یمن ڈراماہن ہندۍ مصنف ٲسمتۍ۔ اتھ پیٹھ چھہ تحقیق کرنک ضرورت۔ یم ڈراما اگر نہ شایع گمتۍ چھہِ، یم گژھن شایع کرنہ یِنۍ۔ کاشرِ ڈپارٹمنٹکۍ نوۍ پرانۍ طالب علم ہیکن یمن کامین دس تلتھ، بلکہ بطور پننۍ ایم فل وغیرہ پیش کٔرتھ۔ وۅمید چھیہ یمن کامین کن ییہِ توجہ کرنہ۔

جیا لال کول چھہ تریمہ ڈراماہک ذکر کران۔ "شہید شیروانی” یس وۅرملہِ مارنہ آو۔ دپان چھہ یہ ڈراما اوس پریم ناتھ پردیسی ین لیوکھمت تہ امکۍ بٲتھ ٲسۍ مہجورن لیکھۍ متۍ۔ سوال چھہ اگر پزۍ پاٹھۍ یُتھ کانہہ ڈراما لیکھنہ اوس آمت، سہ کوت گوو؟ اسمانس کھوتا؟ اتھ پیٹھ تہِ چھہ تحقیق کرنک ضرورت۔ بییہ یہ تہِ زِ مہجورنۍ تم بٲتھ کوت گیہ؟ اگر کنہِ جایہ موجود چھہِ، تمن ہنز نشاندہی کرنچ چھیہ ضرورت۔ کلیات مہجورک نام نہاد مرتب محمد یوسف ٹینگ ہیکہِ یمن بٲتن ہنز نشاندہی کٔرتھ۔

ناجی منور تہ شفیع شوق چھہِ ادبک تواریخ کتابہِ منز پردیسی سندِ اکہ ڈرامہک ناو ہینہ پتہ ونان "امہ پتہ لیوکھ پردیسی ین تمہِ زمانہ کس سیاسی ماحولس پیٹھ تہِ اکھ ڈراما۔ امکۍ بٲتھ ٲسۍ مہجورن لیکھۍ متۍ۔” یہ چھہ دراصل یمو واریاہ موادکۍ پاٹھۍ جیالال کول سنزِ کتابہِ پیٹھے تلمت۔

کاشر ادبک تواریخ چھہ نہ "ڈالر صاحب” ڈراماہک کانہہ ذکر کران۔

پی این پشپ

پی این پشپ زاے 1917 منز تہ 1996 منز گیہ سرگواسۍ۔ خبر کٲتہو ازکیو ادیبو چھہ تہند ناو بوزمت؟ خبر کٲتہن چھہ یہند ملاقات نصیب سپدمت؟ بہ چھس نہ کالج کٔرتھ کشیرِ زیادہ رودمت، تاہم یمن سیتۍ چھہ میہ اکاڈمی، ریڈیو تہ یونیورسٹی منز منزۍ منزۍ ملاقات سپدمت۔

اکھ چیز یس میہ خاص طور یاد پیوان چھہ، یم ٲسۍ اتھہ واس سیٹھا چیرہ کران، میانۍ پاٹھۍ ٲسۍ نہ تھوکمت اتھہ بیہ مٲل پاٹھۍ دوان، حالانکہ امہ وقتہ ٲسۍ یم بزرگی ہندین ایامن منز داخل سپدۍ متۍ۔ پشپ اوس زبردست متحرک شخصیتک مالک۔ ہمیشہ اپ بیٹ، سیٹھا انرجی وول ادیب۔ کتھہ اوس تیز تیز تہ پیوٹھس پیٹھ کران۔ زندگی متعلق پرامید نقطہ نظر تھاوان۔

pushp
از پییہ میہ یم یاد۔

پی این پشپ سنز دلچسپی ٲس زبان، لسانیات، تحقیق، تنقید، شاعری، بیترِ۔ سیٹھا پورمت شخص۔ پشپ چھہ ترقی پسند دورس منز پزۍ پاٹھۍ کاشرِ زبانۍ لول برن والین کژن تام نفرن منز سرس، خاص کر نثر لیکھن والین ترین ژون شخصن منز اوس سہ پیش پیش۔ ترقی پسند دورس منز اوسے نہ کانہہ نثر لیکھان۔ افسوس ز تمن لوکن ہند ذکر چھہ سانین تذکرن تہ تواریخن منز میلان یم نہ اتھ دورس منز کاشرس ادبی سرمایس انزۍ منزۍ تہِ ٲسۍ گمتۍ۔ حالانکہ پشپ اوس نہ باقین ہندۍ پاٹھۍ معلوماتی مضمون لیکھان یۅس محض ترجمہ بازی ٲس۔ پشپ سند مطالعہ اوس کاشرِ زبانۍ تہ ادبہ کس تجزیس تہ تبصرس منز نون نیران۔ سہ اوس نظریاتی کتھو کھوتہ زیادہ کاشرِ ادبہ کس متنس پیٹھ کتھ کران۔ امس ہوۍ ہمہ جہت ادیب چھہ سیٹھا کم نظر گژھان، یمن شاعری پیٹھ تہ جان نظر آسہ تہ تنقیدس پیٹھ، یمن پرون متن تہ پرن تہ شیرن تگہ تہ، نوین ادبی نہجن پیٹھ کتھ تہ تگہ کرنۍ۔ جدید دورس منز تہِ رود پشپ نوو نوو سوچ ہتھ سیمنارن منز شرکت کران۔ کاشرین ادیبن منز اگر کانسہ لسانیات کین بنیادی تصوراتن ہند ہمعصر تہ صحیح علم اوس، سہ اوس صرف تہ صرف پی این پشپس۔

پشپ سندِ تنقیدی شعور ک پتاہ چھہ تمۍ سندِ 39 صفحن ہند تمہِ مضمونہ پیٹھ لگاون آسان یُس تمو نادم صٲبنہ شاعری پیٹھ "نادم سندۍ باوژ انہار” (مطبوعہ شیرازہ نادم نمبر) عنوانہ لیوکھ۔ امہ مضمون چھہ پشپ سند اردو تہ کاشرِ ادبک ، نادم صابنہِ شاعری ہند، تہ ہمعصر تنقیدی تصوراتن ہندمطالعہ نون نیران۔ مثالہ پاٹھۍ نیون یہ جملہ:

"توتہِ پیوو نادم جلدے پایس تہ نوۍ نوۍ تجربہ کران ووت ‘دپنہ’ پیٹھہ ‘باونس’ تام۔ ‘سۅوز ‘نظم چھیہ نادم نہِ امہِ باوژ سفرہ کس گۅڈہ منزلس گاشراوان۔”

خبر پی این پشپس پیٹھ چھا تمس زیادہ بہتر پاٹھۍ زانن والۍ تہ تسندین لیکھن سیتۍ زیادہ واقف کٲنسہ ادیبن کانہہ مضمون لیوکھمت؟

غلام محمد نور محمد تاجران کتب

غلام محمد نور محمد تاجران کتب چھہ بڈِ انعامک مستحق زِ یمو رژھروو سون واریاہ کلام یُس زیادہ پہن چھکرتھ اوس۔ یمو چھوپ پرانین کیو نوین شاعرن ہند کلام لۅکٹین کتابچن ہندس صورتس منز۔ تہندوے کتابچو پیٹھہ نیہ پتہ لوکو شاعرن ہنزہ کلیاتہ تہ سۅمبرنہ بنٲوتھ تہ پنن ناو کھولہکھ بطور مرتب ۔ غلام محمد نور محمد سند نہ ناوے کُنہِ۔ یہ چھیہ نا افسوسچ کتھ۔ مون زِ کٲنسہِ آسہِ نہ ٲخرتس پیٹھ یقین مگر دنیاوی ذمہ داری تہِ چھنا کانہہ چیز۔ امۍ سندوے کتابچو پیٹھہ بنییہ اکیڈمی ہنز کلیات رسول میر، ہو بہو تمی بٲتہ ترتیبہ۔ صوفی شاعر (موتی لال ساقی) تہِ چھیہ اہندی بٲتھ پیش کران۔ مگر اوہند ناو نہ کنی۔

غلام محمد نور محمدن کتھہ پاٹھۍ کرۍ یم بٲتھ جمع، تتھ متعلق تہِ گوژھ کانہہ تحقیق سپدُن۔ یتھہ پاٹھۍ تہ تتھہ پاٹھۍ کٔرن جمع، تعریفن لایق چھہ زِ یہ ظۅن پیوس زِ یہ سرمایہ گژھہ رژھرتھ روزُن تہ لوکن تام واتُن۔ واریاہ حضراتن نش چھہ مسودن ہندس صورتس منز واریاہ کینہہ پرون کلام موجود مگر گاش تہِ چھس نہ دوان لگنہ۔

بۅنہ کنہِ چھہ اکہِ کتابچکۍ کینہہ صفحہ یُس امۍ ترقی پسند شاعرن ہند چھپوو یتھ منز دینا ناتھ نادم، شام لال در بہار، رحمن راہی، نور محمد روشن، غلام نبی عارض تہ پریم ناتھ پریم سند کلام شامل چھہ۔ از کل چھا کانہہ بک سیلر کانسہِ نوجوان سند کاشر کلام چھپاونہ خاطرہ تیار؟

NGp1

اردوس منز آو نہ غزل ترقی پسندن زیادہ بکار تکیازِ امکۍ مضمون ٲسۍ نہ عوامی بنیاد تھاوان، مگر کاشر وژن آو امہ رنگہ یمن سیٹھا بکار۔ یہ اوس یمن عوامس سیتۍ سیدِ سیود جوڑان۔ یتھ کتابچس منز تہِ وچھو تہۍ سٲری شاعر وژن ونان۔ حالانکہ پوتس پھیرۍ یم تہِ نظمہِ کن۔

NGp2

NGp3

NGp4