نوین افسانہ نگارن ہندِ خاطرہ اکھ اہم بحث

میہ کور کمینٹ اکس افسانس متعلق زِ اتھ ونہ بہ زیادہ کھوتہ زیادہ انشاییہ تکیازِ سہ افسانہ چھہ اکس موضوعس اندۍ اندۍ ووننہ آمت۔ میہ وون افسانس تہ انشایہس درمیان چھیہ یہے فرق۔ افسانس منز اگر کانہہ مسیج آسان چھہ ، سہ چھہ کردارن ہنزِ عملہِ یا واقعاتن ہندِ ترتیبک اکھ ارتقایی نتیجہ آسان۔ افسانس منز چھیہ یہ عمل تہ ترتیب ضروری تہ اہم، مسیج چھیہ نہ، انشایہس منز چھیہ مسیج ضروری تہ اہم، کردارن ہنز عمل تہ واقعاتن ہنز ترتیب چھیہ صمنی آسان بلکہ بلۍ آسان۔

وننہ آو  زِ انشاییہ چھہ حقیقت نگاری تہ افسانہ تخیل ورتاوان۔

یہ چھہ نہ یمن ہند امتیاز۔ تخیل چھہ نہ صرف افسانک امتیاز بلکہ پورہ ادبک (غزل، نظم، ناول، بیترِ) امتیاز یتھ منز انشاییہ تہِ یوان چھہ۔  انشاییہ چھہ تخلیقی تہِ آسان یعنی اتھ منز تہ چھہِ تم ول ورتاونہ یوان یمو سیتۍ یہ دلچسپ بنہِ ۔ از کل چھہ صحافتی سٹوری تہِ تخلیقی اندازہ شروع کرنہ یوان تہ تمن منز ڈایلاگ تراونہ یوان، مگر تمہِ سیتۍ بنہِ نہ صحافت افسانہ۔

یہ چھہ اکھ اہم بحث، تمن ہندِ خاطرہ یم افسانہ لکھنچ کوشش کران چھہِ۔

امین کامل سند افسانہ "گابہ گندُر”

کٲشر افسانہ اوس اکہ وقتہ داہ باہ صفحہ آسان۔ لۅکٹۍ افسانہ تہِ ٲسۍ مگر عام طور اوس افسانہ داہن صفحن اندۍ پکھۍ آسان۔ وارہ وارہ ژھوکیوو یہ۔ وجہ نامعلوم۔ شاید ژیون نثر لیکھن والیو زِ کاشر پرنک رفتار چھہ نہ تیز یمہ کنۍ زیٹھۍ افسانہ پرنۍ شاید وبال جان بنان چھہِ۔ نتہ ما چھیہ یہ افسانہ نگارن ہنز کہالت۔ کیہہ تام وجہ چھہ۔ بہرحال وجہ یہ چھہ تہ تہِ، امین کامل سندِ افسانک ہوجم تہِ ژھوکیوو تمن افسانن منز یم تمۍ 1980 یور کن لیکھۍ۔ گابہ گندر چھہ یُتھے اکھ مختصر افسانہ۔ یہ چھہ "سوال چھہ کلک” افسانکۍ پاٹھۍ خالص ڈایلاگس پیٹھ مشتمل۔ کامل چھہ یمن افسانن منز کنہِ علاوہ تبصرہ ورٲے اکھ صورت حال پرن وٲلس برونہہ کنہِ تھاوان۔ یہ افسانہ چھہ اکی آنہ واریاہن سطحن پیٹھ پرنک مطالبہ کران۔

از اوس نہ ٹرینہِ منز پرن کیت کہنی، لہذا نیوم یہ افسانہ ٹایپ کٔرتھ۔

story

گابہ گندُر

امین کامل

(دسمبر 1996)

"وچھو گابہ گندرا، یہ بہ ونے تی چھے کرُن، تی چھے ونن تہِ۔ چھُیہ منظور؟” میہ وونس دو ٹوک فیصلہ پاٹھۍ۔

قصہ سپد یہ۔ میہ آو اکھ پلاٹ ذہنس اندر تہ ہیوتم افسانہ لیکھن۔ اکھ کردار ژورُم گابہ گندر تہ ترووم پلاٹ چہ استتھۍ (سچویشنس) اندر، یہ پریتھ افسانہ نگار کران چھہ۔ مگر امس بدبختس آیہ خبر کیا ہۅنگہ تہ کورنم واد۔

استتھۍ ٲس یہ۔ اکھ وٲناکھ صحراو۔ نہ کُنہِ زن نہ زانپٹ۔ اسمانس ووکھہ بتھہِ کٹہ کال اوبر نال ؤلتھ۔ باسان سہ واو پھیریس زِ انسانس نیہِ ژپندر کٔرتھ تُلتھ تہ ٹھاسیس خبر کتھ شایہ تڑاخ کٔرتھ پٔتھرس۔ گابہ گندرس اوس تن تنہا اتھ وٲرانس اندر مویوس نظر تلِتھ اسمانس کن ونن "خدایہ یہ کتھ شنیاہس اندر آس ہینہ۔ یہ کمن پاپن ہند چھم سزا۔ میانہِ خدایہ یمہِ وٲراگہ منزہ نیرنچ کڈتم کانہہ وتھ، نتہ آسیم چھۅچھہ کتُر کرۍ کرۍ زو دین۔” امہِ پتہ اوسس گہے دچھنۍ تہ گہے کھورۍ وٲراگہ مژرس اندر دورُن نیرن وتھ ژھارنہ مۅکھہ۔ ادہ یہ گابہ گندر ووتھم بٔڈتھ تہ بولتھ "بہ پکے نہ اتھ وٲناکھس اندر، نہ دمے خدایس کن بداد۔ ژیہ ہیوتتھس بہ سیاست کارن ہندِ اندرے استعمال کرُن۔ ژیہ چھے ظہرا ہٲل گٲمژ کردار اننۍ تہ وانہِ لاگنۍ۔ مگر بہ چھہ سے نہ تمو سیدہ بوٹو منزہ۔ بالکل نہ۔”

"ہیا ما لاگ یہ بکھ” میہ وونس بُتھ کٔرتھ "سیود کرو کلامہ۔”

"ژہ کیا سیود چھکھ پانہ” امی دتم جواب "ژیہ آیی نا کُنہِ کانہہ آدم بستیاہ اتھہِ۔ کانہہ خۅش یِون اوند پوکھا۔ زنانہ مرد دۅہ دینک ویوہار کران، پھیران تھوران۔ شرۍ یمے لالہ پھلۍ ہوۍ گندان درۅکان۔ خبر ژیہ کیازِ چھے انسانن سیتۍ کھٔر۔ چھرا ویران تہ دٔدون سوچان۔ سیزن ویزن کتھن دم پھٹۍ تہ کھرۍ دار بناوان۔ میہ چھے نہ اتھ سیتۍ بروبدی۔ بہ چھہ سے نہ میژِ لۅپن کینہہ تہِ۔”

"ہیو لۅپنس ہا چھہ ٹھوس آکار پرکار آسان” میہ گوو امۍ سند واد موت "ژیہ نہ پنن بتھ، نہ تھر۔ یہ چھے تہِ چھے میون دیت، کلہ پیٹھہ نلس تام۔”

"ہنہہ۔ بڈہ منت چھیتھم تھٲومژ۔” امی کورم خندہ "ہیو میہ اوس نا پنن وجودے کانہہ، تیا؟ بہ ہا اوسس چانین کاڈین منز مزس اندر تکیس سیتۍ ڈوکھا دتھ بہت۔ ادہ پیی میہ پیٹھ نظر تہ اونتھس کڈتھ۔ میانیو شانو پیٹھۍ پننہ افسانہ نگاری ہند بندوق چلاونہ خاطرہ۔”

"ہیو ژہ چھکھ کسو تیوت” میہ آو جان منس پیٹھ "گژھو مر کنہِ نالہِ منز، یوت گُرِ میہ کرُم۔”

"نالہِ منز؟” امۍ تروو شیطانۍ کھنگالہ "تتہِ ہا کھالہم ژہ پانس مور کٔرتھ واپس۔”

"تلو تلو چھہم نا ژہ توتہِ خبر کیا لاس۔” میہ وونس اتھہ گلوتھ۔

"آسہ ہا نے لاس تہ ژورتھس کیازِ، ہہ ہہ ہہ” امس ویژ نہ میانۍ کتھ۔

"شہمت ہسا پھٔرم، بییہ کیا” میہ اوس شرارتہ سیتۍ پان الان "میہ دوپ سیدِ پدِ چھکھ، ادہ ژیہ ہیو ورہ ہولے چھم نہ وچھمت۔”

"ادہ سا تہ ژھن سارۍ سے بلایہ۔ نیایی کتھ چھہ کرُن۔” امۍ وون اطمینانہ سان ہیو "آیہ نہ پانوانۍ بروبدی، پان ماریی کتھ چھیہ۔ بہ اژے اورۍ کاڈین منز واپس۔”

"ہیو تھوہ تھوہ، تور ہا دمے اژنہ۔ خبر ژیہ کیا بوزتھس بہ۔”

"وچھ کُس دیم نہ اژنہ۔ ہیو تیلہِ لجیا میانہِ اور اژنچ خبر زِ وۅنۍ لگی۔” امۍ وونم تھیکتھ۔

"ہیو دوپمے ہا، بہ چھسے نوکر۔ تل سا تھپھ۔” میہ گنڈس گلۍ "میہ نسا چھہ نہ افسانے لیکھن۔ انس بلایہ۔”

"ژہ کسو گوکھ افسانہ نہ لیکھن وول، ہونہہ” امۍ کورم طنز ہیو "بہ ہا لیکھناوتھ، بییہ تی یہ بہ یژھہ۔ چون مجال چھا نہ ونن۔”

"کورم کُس خطا” میہ دژ ڈیکس ژنڈ "یا ژہ بنوومکھ کردار تہ ییتہِ پیٹھہ ہور تام تھوومے ناو گابہ گندر۔” بہ آس سخ ہینہ "ادہ سا تہ ون کیا چھم لیکھن، ونُو؟”

"گیہ کتھ، وۅنۍ آکھ نا لیہ” امۍ گلنوو باز زینتھ ہیو کلہ۔

"ژہ ہا تراوکھ میہ ذلیل کٔرتھ، افسانہ نگارن اتھہِ ہا اسناوہم۔”

"کینہہ تہِ اسناوے نہ” امۍ وونم اسونہِ نرم دہانہ "ژہ مان صرف میانۍ اکھ کتھ۔”

"ہیم سا مچلکہ لیکھتھ۔ بد بتھس ہے کردار بنوومکھ۔” میہ وونس پھوشتھ۔

"ادہ ژہ چھکھ بڈہ لڑایہ گور۔ یتھہ پاٹھۍ ما اندِ۔ ہنا ہیچھ تاب تحمل” امۍ دژم داے۔

"ہتہ سا ہیوچھم تاب” میہ وونس دزتھ "ون سا کیا چھم کرُن۔”

"آ، بہ ونے۔ ژہ کر میہ سیتۍ رسا مسا۔”

"ہیو، بہ کرا ژیہ سیتۍ رسا مسا؟” میہ گنڈن ریہہ "پننس کردارس سیتۍ؟ یہ ہا گوو تاون۔”

"مسا کر” امۍ وون ژٹتھ ہیو "بہ تہِ چھس نہ سوۍ پونز زِ چانین رزہ درسن پیٹھ تلہ وۅٹہ تہ لتھوہ پان۔”

"ہیو کلہ دود ہا تلتھم۔ یہ کۅسا بلایہ کٔرم پانس اگادِ” میہ تراوۍ ہتھیار "ہتہ سا کورم رسا مسا۔ ون سا کرُن کیا چھم؟”

"کرُن چھے نہ کہنۍ۔ صرف یہ زِ بہ کرے تمہ آیہ رول یُتھ میون ناو ہمیشہ خاطرہ زندہ روزِ۔۔ فلانۍ کہانی ہند کردار گایہ گندر۔”

"گوو میہ چھہ چون نگارہ واین۔ ژہ علمن کھالن” میہ ترکراویس اچھ "ہیو گایہ گندرا، تمہ ہا چھے رایہ، بوزتھا۔ بہ ہا لیکھہ تمہِ آیہ افسانہ یُتھ میون ناو ژۅپارۍ شہرہ لبہِ۔ ژہ کۅسا پھۅپھس مج گوکھ؟”

"ہہ، ہہ،ہہ،ہہ” امۍ تروو ٹھہہ ٹھہہ اسن "میہ دوپ ژیہ چھے گوج۔۔ مگر ژہ چھکھ ژکہِ ژھوژ ڈون۔ کینہہ نبا کہنۍ نہ” یہ ونان ونان لوگ ژلنہِ۔

"ہیو ہیو، ژلان کوتو چھکھ؟ میہ دژس تھانتھرتھ کریکھ "کتھ بوزو، گابہ گندرا، کتھ بوزو” امۍ بوز نہ کہنۍ۔ یہ ہیوتن میانین اچھن دیدمانہ زنتہ ہواہس اندر تحلیل سپدُن۔ بہ اوسس اتھہ موران۔ تھپھ دمہس تہ کتھ تہ کمس۔ اتھۍ منز گیم امۍ سنز پھسرارے کنن۔۔ "میون نگارہ ہے وایہ ہکھ، چونے ناو کھسہِ ہے علمن زِ کیا زبر کردار چھن تخلیق کورمت۔ تتھ چھنے ژھنمت کردار سند نہ بوزُن۔ بیہہ تہ وۅنۍ قلم رٔٹتھ دٕینہِ۔”

پکان دورِ فلک

memory
زندگی منز اگر میہ کنہِ چیزک افسوس چھہ، سہ چھہ میہ پننہِ یاداشتک۔ میون یاداشت چھہ ہمیشہ پیٹھہ کمزور تہ ژلہ ون رودمت۔ پننۍ یہے کمزوری مدنظر وون میہ فیاض دلبرس، یمس زبردست یاداشت چھہ بصری تہِ تہ لسانی تہِ، زِ تس پزن دوستن تہ واقعاتن متعلق پننۍ یاداشت رژھراونۍ یمن ہند سہ اکثر ذکر کران اوس۔ شروعات گیہ شورا بشیر سندِ پیٹھہ۔ اچھا فیاضن یاداشت چھہ کمال، پیٹھہ چھہ سہ تیتھ کتھہ گور تہِ یُس اکثر تھیکان تہِ چھہ تہ مبالغہ تہِ چھہ کران۔ کتھن مزہ کھالنہ مۅکھہ اگر ٹر تہِ وننۍ پینس، واے برِ نہ۔ سہ چھہ پننہِ یاداشت کس وفورس انزۍ منزۍ گژھتھ وۅٹہ تہِ تلان تہ زیوِ تہِ ٹاس کڈان۔ سہ چھہ اتھ پیٹھ پننۍ مخصوص چھاپ تراوُن یژھان۔

فیاضنۍ یہ خوبی ژینۍ میہ گوڈنچہ لٹہِ تمن ملاقاتن منز یم سرینگر کافی ہاوسس منز الغٲبہ سپدان آسہ۔ مگر تمن دۅہن اوس نہ میہ یاداشت چہ اہمیژ ہند یوتاہ ظۅن۔ ملاقاتہ روزہ دلہِ منز تہِ کم کم مگر جاری تہ یور امریکہ یِتھ گوو فون کہ ذریعہ فیاض نہِ امہ خوبی ہند زیادہ احساس تکیازِ وۅنۍ اوس فیاض نظرن دور تہ صرف اوس فونس پیٹھ امۍ سند یاداشت بولہ کران۔

ادب چھیہ تژھ اکھ انسانی کارگزاری یمیک تھر تہِ یاداشت چھہ تہ نانک تہِ یاداشت۔ یہ چھہ یاداشتے یُس فن پارہ تخلیق کران چھہ تہ امیک فہم تہِ عطا کران چھہ۔ یمن درمیان یۅس لسانی ہیت چھیہ سۅ تہِ چھیہ یاداشت کس زور پیٹھے قایم تہ دایم۔ یاداشت، ادراک تہ تخیل یودوے تریہ الگ ذہنی عمل چھہِ، مگر ادبس منز چھِہ یم تریشوے اکھ اکۍ سند اتھہ رٹتھ فن پارچ قوت ہرراوان۔۔ یاداشت ورٲے نہ ہیکہِ سانۍ شخصیت بٔنتھ نہ تواریخ تہ نہ وقتک تسلسل۔ ادبچ چھیہ نہ کتھے۔

(پکان دورِ فلک، اکھ اقتباس)

کہانی، افسانہ تہ کتھ

shortstory

یتھ اسۍ اردو کاشرس منز افسانہ ونان چھہِ تتھ ہندی پاٹھۍ کہانی ونن چھہ دلچسپ تکیازِ اتھ منز چھہ افسانہ کس اکس اہم عنصرس کن اشارہ۔ یعنی افسانہ گژھہِ پزۍ پاٹھۍ اکہ واقعہک بیانیہ آسن۔ قاری گژھہِ افسانہ چہ پریتھ عملہِ، پریتھ موڈس پیٹھ یہ زاننہ خاطرہ وتاولہ سپدُن زِ امہ پتہ کیا گژھہِ۔ یہ تجسس چھہ کامیاب افسانک مقصد۔ افسانہ حقیقت نگاری پیٹھ مبنی ٲسِن یا علامت نگاری ہنز مثال، گۅڈنیک شرط چھہ میانہِ خیالہ امیک اکھ کہانی آسُن۔ افسانس منز آیہ تم کینہہ تجربہ ضرور کرنہ یمن منز کہانی ہند عنصر گالنہ خاطرہ واقعہچ فطری ترتیب مسخ کرنہ یا غیر فطری/شکستہ ترتیبہِ پیٹھ زور دنہ آو، مگر یم رودۍ بہرحال تجربے تہ بییہ چھہِ نہ یم تجربہ پریتھ وۅتھہ ونس افسانہ نگار سندِ خاطرہ ضروری۔ یم تجربہ چھہ نہ عام قاری سنز دلچسپی زیادہ برونہہ تام پانس سیتۍ پکنٲوتھ ہیکان۔ بیانیہ، کہانی تہ پلاٹس درمیان چھیہ نہ زیادہ فرق، تاہم ہیکو اشارتا ؤنتھ زِ کہانی چھیہ واقعاتن ہند سلسلہ، پلاٹ یہنز ترتیب تہ بیانیہ کلہم پاٹھۍ یہنز تعمیر یا ڈھانچہ۔ کہانی ہنز کتھ کٔرتھ چھہ یمنے کن اشارہ۔

یوتاہ افسانہ کہ خاطرہ کہانی لفظ دلچسپ چھہ، تیوتے چھہ کہانی ہندِ خاطرہ اردو کاشرس منز ورتاونہ ینہ وول لفظ افسانہ تہِ دلچسپ۔ اتھ منز چھہ افسانہ کس دوٚیمس اہم عنصرس کن اشارہ۔ یعنی کہانی گژھہِ نہ واقعہک ہو بہو (یتھہ پاٹھۍ چھہ تہ تتھہ پاٹھۍ) بیانیہ آسُن زِ یہ بنہِ اکھ رپورٹ۔ اخبارن منز تہِ چھہِ اسۍ خبرہ پران یم سانۍ دلچسپی اندس تام پانس سیتۍ پکناوان چھیہ۔ مگر یوٚت تام نہ کہانی منز کہانی کار سند تخییل شامل گژھہِ، یہ بنہِ نہ افسانہ۔ پیکر، تمثیل، استعارہ، علامت یم سٲری چھہِ تخییلکۍ نتیجہ تہ نمونہ۔ کنہِ ادبی صنفہِ منز چھہ یمن ہند دخل زیادہ کنہِ منز کم یا بدل آیہ۔ مگر یہ تہِ چھہ نہ ضروری زِ کہانی منز گژھہِ یہند دخل لازمی طور آسن۔ کہانی کار سند تخییل ہیکہِ سیٹنگ، واقعہ، کردار، ڈایلاگ، کنہِ تہ سطحس پیٹھ کہانی دلچسپ، فکر انگیز تہ غیر معمولی بنٲوتھ۔

کہانی تہ افسانس مقابلہ اگر کانہہ کاشر لفظ ژارون، ممکن چھہ «کتھ» لفظ ما روزِ زیادہ مناسب تہ موزون تکیازِ اتھ لفظس منز چھہ افسانہ کس تریمس اہم حالانکہ بحث طلب عنصرس کن اشارہ موجود۔ خبر اکہ کاشرِ افسانہ سۅمبرنہ ہند ناو «کتھہِ منز کتھ» آسن ما چھہ اتھۍ کن اکھ اشارہ۔ حقیقت چھیہ یہ زِ افسانہ گژھہِ پرن وٲلس کتھہِ منز کتھ پلناوُن۔ اگر یہ صرف اکہ واقعہک بیانیہ، دلچسپ سہی، بنہِ مگر پرن وٲلس تام پلناوِ نہ کانہہ کتھ، یہ بنہِ اکھ عامیانہ، معمولی درجک افسانہ۔ افسانس منز موجود کتھ یۅس اکثر کردارن، حالاتن، ڈایلاگ بیترِ چہ کشمکشہ ہند فطری نتیجہ آسان چھہ، چھیہ خالص حظہ علاوہ امیک فکری جواز پیدہ کران۔ یہ چھہ افسانک ساروے کھۅتہ مشکل تہ پرفریب عنصر۔ کتھ گژھہِ نہ الگ پاٹھۍ مقصد، اشتہار، نصیحت بننۍ بلکہ گژھہِ افسانہ چہ عملہ تہ کشمکشہ ہند فطری نتیجہ آسُن۔ یہے کتھ چھیہ قاری سندِ خاطرہ افسانہ کس نقطہ انکشافس پیٹھ نکتہ انکشاف بنان۔ یہ کتھ چھیہ، دوٚیمین لفظن منز، لۅکٹس بڈس پیمانس پیٹھ زندگی ہندین مختلف پہلوون منز معنہِ مطلب ژھارنچ کوشش۔