کاشر ادب – اکھ بہترین رسالہ (قسط 5)

ka

1976 منز درایہ کاشر ادب رسالس بییہ زہ شمارہ (ستمبر تہ اکتوبر)۔ امچ کٲم ٲس وۅنۍ اوتار کرشن، چمن لال چمن تہ سجود سیلانی یس مٹہِ۔

خصوصیت چھیہ یہ زِ یمن دۅشونی شمارن منز چھہ لل واکھن پیٹھ سنتوش سند مخصوص تبصرہ چھپان۔ یمن دۅشونی منز چھہ علی محمد لون سند پنڈت سوم ناتھ دیو سنزِ سلسلہ وار کتھہِ ویتال پچیسی یک ترجمہ چھپان (زہ قسط)۔ یمن دۅشونی منز چھہ سنتوش سند بحر طویل /د/ تہ /ھ/ حرف چھپان۔ یمن شمارن منز چھہ "آرت "ناوہ اکھ سلسلہ یتھ تحت بزرگ ادیب سند غزل، نظم یا افسانہ چھپان چھہ تمن سیتۍ تہنز تمہید۔ اتھ سلسلس تحت چھہِ کامل، نادم، بھارتی تہ اختر چھپان۔ یمو منزہ چھہِ کینہہ دلچسپ جملہ پیش:

"یہ کلہ دود ہیوٚت نہ میہ زانہہ تہِ زِ یم غزل چھا برمراہ چوکن ہندۍ ٲلۍ کنہ پاسکدرن ہندۍ ماٹھ۔ یم پٔرتھ چھا کانسہِ پٲنتھن گژھان کنہ پرکژ اژان۔” (کامل)

"یتھ گرِ بہ چھس سۅ چھیہ تمہِ گرِ ہند حصہ یۅسہ ٲس تہ یۅسہ گٔر نہ میانۍ آسہِ سۅ تہِ آسہِ تمہِ گرِ ہند حصہ یتھ گرِ بہ چھس۔” (بھارتی)

"میہ چھہ باسان لفظ چھہ مورت تہِ صدا تہِ۔ تہ خیالن ہند سوٚن وۅگن تہِ۔ امہ علاوہ چھہ لفظ انسانی کلچرچ اژھینۍ تواریخ تہِ۔” (نادم)

"شرۍ سند نویر تہ بالغ سند سلیقہ رٔلتھ چھہ اکھ نیرل نویر پریتھان۔ امۍ سے زٲژ چھہِ ادیب، شاعر، موسیقار، آرٹسٹ، فنکار ونان۔” (اختر)

"آرت” خصوصی پیش کشس تحت چھہِ کامل سندۍ زہ غزل چھپان (سمے صدا چھہ ژہان سنگرن جگر کس پتھ/لکھ چھہِ پھیران عجیب باوتھ ہیتھ)، بھارتی سند افسانہ "وقتہ کس چوکھاٹس منز”، نادم سنزہ نظمہ "زتنہِ” ناوہ 7 لۅکچہ نظمہ تہ اختر سند افسانہ "کوہ قاف تہ سیکہِ ڈیر”۔

یمو علاوہ چھہِ کامل سندۍ "موسیقی” ناوہ تریہ وژن بٲتھ چھپان۔ سنتوش سند اکھ 46 شعرن ہند ژھۅٹہِ وزنک زیوٹھ غزل چھپان یمیک مقطع چھہ:
گگرِ کن زیٹھیۍ غزل/ کاملو مۅکلاو با

نادم سنز اکھ نظم "مرلی” ناوہ ، رحمن راہی سنز "آورن”، چمن لال چمن سنز "وینتی”تہِ چھیہ یمن شمارن منز چھپان۔ رفیق راز سند غزل (آفتابچ سۅ رہج شے تہِ ژھیون واجنۍ ٲس) تہِ چھہ چھپان۔ میانۍ اکھ مختصر نظم تہِ۔

اکھ نظم
بہ اوسس سوچان
تہ سہ اوس مۅکلیومت سوچتھ
تس ٲس میہ کن تھر
تہ میہ اوس تس کن بُتھ
خبر تس کس کن اوس بُتھ
کنہ تس اوسے نہ بُتھ

بکواس کشیمری سند "سفر در شہر بیہ بوج” چھہ دۅن قسطن منز چھپان۔ یہ چھہ پرنس لایق۔ بکواس کشیمری یم خط نیب رسالس تہِ لیکھان اوس تم چھہِ مزاحیہ ادبکۍ جان نمونہ۔ ضرورت چھیہ تم یِن جمع کرنہ تہ کتابی صورتس منز چھاپنہ۔

نیب کہ ٲخری شمارکۍ ژور خط

اکتوبر 1971 neab 17منز دراو نیبک ٲخری شمارہ۔ امکۍ سرورق ٲسۍ رنگدار آسان، مگر ٲخری اوس طوطہ رنگس پیٹھ کرہن لیباڑہ۔ نیب ناو تہِ کرہن تہ ادبچ مہرینۍ تہِ کرہنس لیباڑس تل۔ امہِ برونہمس شمارس منز اوس وننہ آمت زِ "وتہ چھیہ زے”  یا تہ رسالہ بند کرُن نتہ امیک حو٘جم کم کرُن۔ یہ شمارہ اوس ٲخری شمارہ۔ امیک اعلان آو نہ پرچس منز کرنہ مگر از ییلہ بہ امہِ کس سرورقس سنیوس یہ اعلان چھہ ٹاکارہ پاٹھۍ اتھ پیٹھ کرہنہِ رنگہ سیتۍ کرنہ آمت۔
امہ سرورق سیتۍ رسالک اند کرُن چھہ واریاہ کینہہ نہ وننے تہِ ونان۔

میہ کو٘ڈ 2005 منز یہ رسالہ بییہ مگر امہ باوجود زِ ناو چھہ سے، یہ اوس نہ سے رسالہ یُس 1971 منز بند گو٘و۔ میہ چھیہ نہ پتاہ نیب بند گژھنکۍ کم مخصوص حالات چھہِ ٲسۍ متۍ، کینہہ کینہہ چھم اندازہ گژھان تکیازِ میہ تہِ پیو٘و "پنن نیب” 2013 منز بند کرُن۔

بنم ژور خط چھہِ اتھ پس منظرس منز کاشرِ زبانۍ تہ ادبک درد ناک صورت حال پیش کران۔ نیب چھہ وۅنۍ آنلاین موجود، تمام ژۅیو نش دور، بالاتر۔ یہ آنلاین نیب چھہ تھری ان ون ۔۔ کامل صٲبن نیب، منیب الرحمنن نیب تہ یمن دۅن ہند کُنے ۔۔ آنلاین نیب۔

نیب،  اکتوبر 1971

انہِ ماجہ کُنے گو٘بر

نیب رسالہ یمن حالاتن ہند شکار سپد، بہ چھس نہ تمو نشہِ بے خبر۔ اوہ کنۍ کو٘ر نہ میہ تعجب۔ اماپو٘ز تعجباتچ کتھ چھیہ تہند یرادہ زِ سہ سورے کینہہ سپدتھ تہِ چھو تہۍ کاشرِ زبانۍ ہنز یہ کنی آواز زندہ تھاونس پیٹھ کمر بستہ۔ حو٘جم کینژس کالس کم گژھن چھہ نہ غم، مگر بند گژھہِ نہ کرُن۔ سہ سپدِ بو٘ڈ ظلم زبانۍ پیٹھ۔ ہرگاہ اخبار تہ رسالہ کاشرس منز بییہ تہِ آسہ ہن تیلہ ونہو نہ شاید یہ، مگر انہِ ماجہ کنُے گو٘بر دفن کرُن یژھہِ نہ کانہہ تہِ زبان دوس انسان۔۔۔۔۔ محی الدین گوہر

دال تہ سیخہ تُجہ

تہۍ کٔرو رسالہ بند۔ میہ نہ گرین۔ میۍ یوت کیازِ، کٲنسہ تہِ نہ گرین۔ اسہِ گژھہِ ہاکھا بتا پوشن۔ زبانۍ تہ کلچرس بلایہ۔ گۅڈہ کاشر زبان کر چھیہ سیخس کھژمژ۔ یہ گیہ دال۔ لل دیدو، مقبول شاہ کرالہ واریو، رسول میرو، مہجورو تہ کاملو سیتۍ چھا یہ دال سیخس کھسان۔ اسہِ چھیہ پتھ کالہِ پیٹھہ سیخہ تجہ کھیمژہ۔ سنسکرت سیخہ تجہ، فارسی سیخہ تجہ، وۅنۍ اردو تہ انگریزی سیخہ تجہ تہ خداین ہے یوژھ جلدے کھیمو ہندی سیخہ تجہ تہِ۔ وۅنۍ گیہ خۅد غرضی زِ میون بکواسا اوس اتی کنہِ وزِ چھپان، تمہِ نشہِ کنزہ ہرگاہ یہ بند گژھہِ۔ یہ پھیریم ضرور نتہ زن چھیہ اسہِ کاشریو کٔنزتھ کھیمژ تہ انشااللہ ہمیشہ کھیمو کنزۍ تھے۔۔۔۔ بکواس کاشمیری

تیژ ژیپھ ہیمو اسۍ

"وتہ چھیہ زے”  پٔرتھ گوس بہ ہے بنگہ روزتھ۔ بہ نہ چھس کانہہ ادیب تہ نہ کانہہ شاعر۔ مگر پننہ زبانۍ ہند چھم وسہِ۔ تکیازِ میون خیال چھہ یمس نہ پننہِ زبانۍ ہنز درد  آسہِ، سہ چھہ نہ بنیادی طور انسان تہِ۔ تۅہہ یمن دوست نما دشمن انسانن کن اشارہ چھوہ کو٘رمت تم حض گژھن ننگہ کرنۍ۔ پردہ پوشی چھیہ میانہِ خیالہ بو٘ڈ گناہ۔ پتھ رود رسالہ، سہ گژھہِ نہ بند کرُن۔ بلکہ جاری تھون۔ ادہ گژھنس صفحہ کم، تمیک گژھہِ نہ پرواے برُن۔ تیژ ژیپھ ہیمو اسۍ۔۔۔۔ سعید احمد ڈار

بیقلازی چھیہ نہ جان

میہ ونیاو تۅہہ پتمس اکتوبرس منزے زِ رسالہ کٔرو تامتھ بند تکیازِ تۅہہ ٲسۍ حالاتھے تتھۍ زِ رسالہ اوس خسارس منز۔ مگر ییلہ میہ وچھ تہۍ چھو خسارہ تلنس پیٹھ تہِ کمر بستہ، میہ کٔر ژھۅپہ۔ از ونہ بہ دوبارہ زِ ہرگاہ صفحہ کم کرنہ سیتۍ رسالہ زندہ  ہیکہِ روزِتھ تیلہ گو٘و کڈنے جان، نتہ ہرگاہ تمہ سیتۍ تہِ خسارے روزِ تیلہ چھہ گاٹہ جار یہ وانے وٹن۔ ازکس زمانس منز زبانۍ ہند ژکھ آسن چھیہ بٔڈ کتھ مگر پان خسارس منز تراوُن چھیہ بیقلازی۔۔۔۔ علی محمد لون

 

ٲخرس پیٹھ اتھ شمارس منز کامل سنزِ نظمہِ "افکار” منزہ یہ شعر:
نہ پوشہ مرگہِ وچھم بُتھ ژھندم سیٹھا شنہ ون
نہ گوم تاپہ شہر نظرِ ڈالۍ ڈالۍ او٘بر

کاشر ادب – اکھ بہترین رسالہ (قسط 4)

کاشر ادب رسالکۍ اداریہ چھہِ نہ کنہِ خالص ادبی موضوعس پیٹھ ۔ یہ حال چھہ تمام کاشرین ادبی رسالن ہند۔ امیک وجہ چھہ یہ زِ سون ادب چھہ ونہِ زبانۍ ہندین معاملن تامے محدود۔ ادیبن رود ترقی پسند دورہ پیٹھے کاشرِ خواندگی ہنزِ تنگی ہند احساس، حالانکہ ادیبن ہند اکھ لۅکٹ کاروان رود پکان مگر ییلہ ییلہ کانہہ رسالہ دراو امہ احساسک باس تیزیو۔

کاشرِ ادبہ کہ گۅڈنکہ پرچک اداریہ چھہ یتھہ پاٹھۍ شروع گژھان: ” کاشرۍ پاٹھۍ لیکھن والین ادیبن تہ کاشرس سیتۍ دلچسپی تھاون والین دوستن ووت واریاہ کال محسوس کران زِ کاشرۍ پاٹھۍ کانہہ ادبی رسالہ نہ آسن چھہ سیٹھا افسوس ناک کتھ مگر رسالہ کڈن چھہ نہ سہل۔ امہ خاطرہ چھیہ واریاہ قربانی ہنز ضرورت۔ گۅڈنی ہارہ تکیازِ واریاہس کالس چھہ یہ قریب قریب گاٹس پیٹھ چلاون۔ سہ گاٹہ کُس دیہ۔ دویم وقت۔ رسالہ چھپاون سہ خریدارن سوزن۔ امیک حساب کتاب تھاون، تیژ فالتو فرصت کس چھیہ۔ یہ کٲم ہیکہِ سہ کٔرتھ یس فاضل ہارہ تہ فالتو وقت آسہِ۔ یُتھ انسان چھہ نہ اسہِ اندر کانہہ۔ مگر دپان خدا چھہ سبب ساز۔ چنانچہ اسہِ گو٘نڈ ادیبن تہ ادیب نوازن ہند تمنا بامل اننہ خاطرہ کمر تہ کاشر ادب تھوو تۅہہ پیش۔ یہ چھہ نہ کٲنسہِ ہند ذاتی رسالہ یا ملکیت اگرچہ امیک خرچہ یُس واریاہس کالس گاٹے روزِ کو٘ر اکی شخژن برداشت۔ محض کاشرِ زبانۍ ہندِ فروجہ تہ ترقی ہندِ خاطرہ۔ یہ شخژ چھہ غلام رسول سنتوش۔”

یہ چھیہ حقیقت زِ رسالک خرچہ تل سنتوشن مگر میہ چھہ پورہ یقین زِ تس آسہ نہ فالتو ہارہ۔ تقریبا تمام رسالن ہندۍ کڈن والۍ چھہِ "فالتو ہارہ” لٲگتھے رسالہ کڈان رودۍ متۍ۔

دویمہ شمارک اداریہ اوس "کاشر مرکز” انجمنہِ ہندس دۅن دۅہن ہندس کانفرنسس متعلق۔ اداریہس منز چھہ وننہ آمت زِ ” کانفرنسس منز آو اکھ بنیادی قرار دار منظور کرنہ زِ کاشر زبان گژھہِ سکولن اندر لازمی مضمون تہ تعلیمی ذریعہ بناونہ ینۍ۔ باقی سٲری مطالبہ ٲسۍ اتھ بنیادی مطالبس سیتۍ تعلق تھاوان مثلا یونیورسٹی منز کاشرس اندر ڈپلوما کورس رایج کرن۔ تمام سکول ماشٹرن ہند کاشر امتحان پاس کرن۔ کاشرِ زبانۍ ہنزِ ترقی خاطرہ کلچرل اکادمی ہندس طرزس پیٹھ حکومت کہ طرفہ اکھ خۅد مختار اشاعت تہ ترجمہ گھرہ قایم کرن۔”ka

یہ کانفرنس سپد 23 تہ 24 اکتوبر 1966۔ کاشر مرکز کو٘ر امین کاملن 1963 منز شروع، رحمن راہی تہ غلام نبی فراق  رلٲوتھ  تجکھ مشترکہ طور کاشرِ زبانۍ ہنز علم۔ کاشر مرکزک اکھ وفد اوس امہ کانفرنسہ پتہ چیف منسٹر غلام محمد صادقس سمکھیوومت تہ تمو اوس ؤریس اندر اتھ متعلق قدم تلنک وعدہ کو٘رمت۔

ژورمہ شمارک اداریہ چھہ ساہتیہ اکاڈمی ہندین انعامن متعلق۔ لیکھان چھہِ "کاشرِ زبانۍ رود گۅڈہ پیٹھے ساہتیہ اکاڈمی ہند طریق کار مشکوک تہ جانبدار۔ گۅڈنی آو یہ انعامہ سۅرگباشی ماشٹر زندہ کول سنزِ "سمرن” ناوہ کتابہِ دنہ۔ امہ خاطرہ نہ زِ تتھ اوس ججو امچ سفارش کٔرمژ بلکہ تمہ وقتکۍ کشیرِ ہندۍ وزیر اعظمن ٲس امچ سفارش کرمژ۔ گویا ادبی کہوچہ بدل لج ماشٹر زندہ کولس سیاسی کہوٹ۔ یہ افسوس ناک رحجان پو٘ک برونہہ کن تہ اختر محی الدین تہ رحمن راہی (یہنزن کتابن امہ پتہ یہ انعامہ میول) تہِ آیہ امی سیاسی کہوچہ تہ سارٹفکیٹہِ ہندۍ شکار بناونہ۔ یہ چھہ ہاوان زِ یو٘ت تام کشیرِ ہند تعلق چھہ ساہتیہ اکاڈمی چھیہ افسوس ناک وۅتل بجہ کران روزمژ۔ چنانچہ اتھ وۅتل بجہ خلاف آو تمن وزِ وزِ احتجاج تہِ کرنہ۔ یہس تہِ کٔر (یو٘ت تام اسہِ معلوم سپد) اکاڈمی ہندیو اکثر ججو تہ تمن پتہ ریفریو اکس کاشرِ کتابہِ قومی ایوارڈ دنچ شد و مد سان سفارش۔ خیال اوس زِ وۅنۍ آسہِ ساہتیہ اکاڈمی ہوشہ آمژ۔ مگر کتھ وٲژ بییہ تو٘تے۔ کتابہِ آو نہ ایوارڈ دنہ تہ کاشریو ادیبو کٔر اتھ خلاف پننہ پننہ شایہ سخت ناراضگی ظاہر۔ ”

میہ چھہ باسان یہ چھیہ کامل سنزِ "لوہ تہ پروہ” کتابہِ ہنز کتھ۔ سۅے ٲس 1965 منز چھپتھ آمژ تہ 1966 ؤری خاطرہ آسہِ ہے تجویز کرنہ آمژ۔ اتھ میول پتہ 1967 منز یہ ایوارڈ۔

شمارہ 5 چھہ قانون ساز کونسلس منز تمدنی سیٹہِ خاطرہ تتھس شخژہ سندس نامزد گژھنس پیٹھ "یس شخژس نہ زبانۍ، ادبس تمدنس تہ تہذیبس سیتۍ رژھ تہِ واسطہ اوس۔” ونان چھہِ "پرانہِ حکومژ نشہِ ہیکہِ ہے تہِ نہ امہ ورٲے بییہ کنچ توقع سپدتھ، تکیازِ سۅ ٲسے ہمت شاہ سنزِ جایہ بلہ نٲودس تھاونچ قایل۔ مگر وۅنۍ گژھہِ ییتہ یور یہ مسخرانہ روایت ختم سپدنۍ۔”

شییمس شمارس منز چھیہ اداریہس منز یہ خۅشخبری زِ "کاشر مرکزن تج اکھ تاریخی آواز تہ تحریک زِ کاشر زبان گژھہِ تعلیمی ذریعہ بناونہ ینۍ۔ آوازِ ہند زور تہ اہمیت وچھتھ کو٘ر حکومتن اوترہ اوترے اعلان زِ پانژمہِ جمٲژ تام ییہ کاشر زبان کینژن سکولن اندر تجربہ پاٹھۍ لازمی مضمون کس صورتس منز پرناونہ۔”

یم چھہِ کینہہ نمونہ یمہ سیتۍ پرن وول یہ اندازہ ہیکہِ کٔرتھ زِ یہ رسالہ کتھین معاملن پیٹھ تہ کمہ اندازہ اوس سوچان۔

 

کاشر ادب – اکھ بہترین رسالہ (قسط 3)

kadab

رحمن  راہی سنزِ "جلوہ تہ زبور” علاوہ چھپییہ رسالس منز تہندس اکس روایتی غزلس سیتۍ سیتۍ "چون خط ووتم” تہ "ٲہی” زہ نظمہ۔ جلوہ تہ زیور نظمہِ متعلق چھہ شیم احمد شیم  لیکھان زِ "رحمن راہی سنز نظم جلوہ تہ زبور چھیہ تتھ فنی بلندی کُن اشارہ کران یۅسہ شاعرس تہ پرن وٲلس درمیان تعلق پیدہ کرنہ بدلہ ژھین چھیہ دوان۔” رسالس منز چھہ ڈاکٹر فاسٹس کہ ٲخری سینک راہی سند ترجمہ تہِ اکس شمارس منز چھپان۔

کامل سندۍ چھہ کل تریہ غزل چھپان یمن متعلق رشید نازکی لیکھان چھہِ زِ "کامل صابنۍ غزل چھہِ حاصل شمارہ۔ غزل چھہ کاملن رام کو٘رمت یا غزلن چھہ کامل رام کو٘رمت۔ زندگی ہندۍ نیتھہ ننۍ معنی غزلہ کس پیمانس منز وٲلتھ مس تہ شہل تصور پیدہ کرُن چھہ کاملن ہنز کٲم۔”

نادم چھہ انٹرویووس منز کامل نین یمن غزلن متعلق ونان زِ "کاملن یہ غزل یُس زیر بحث چھہ، سہ چھہ تموے منزہ اکھ یم نوِ کاشرِ غزلچ نشاندہی چھہِ کران۔ امیک مزازہ تہ امچ تلہ تراو چھیہ کاشر۔ امیک سوالیہ انداز، امچ قافیہ بندی تہ امیک ردیف چھہِ سٲری کاشرس پیٹھ۔ یۅسہ روانی تہ سلاست اتھ غزلس منز چھیہ سۅ چھیہ اتھ سہل ممتنی قبیلک بناوان۔ یہ چھہ غزلک معراج تصور کرنہ یوان۔ امہ علاوہ چھہ اتھ غزلس منز ہندی دیومالا أنتھ امہ کس مضمونس وسعت تہ نویر میولمت۔ یمہِ اندازہ مینکا، اپسرا، نٲگراے قافیس منز استعمال آمتۍ چھہِ کرنہ، تمہِ اندازہ ہیکہِ ہے نہ بییہ کانہہ تہِ حوالہ (allusion) غزلہ کین یمن مصرعن ہمہ گیر بنٲوتھ۔ موضوع کنۍ تہِ چھہ یہ غزل سیٹھا نو٘و۔ ردیف چھہ شاعرس الگ کڈتھ تتھ لکہ ارساتس سیتۍ شامل کران یس وقتہ چیو بیہ سۅکھ ترایو بدون چھہ کو٘رمت تہ یس زندگی ہند ٹیچھر سرکشی کن چھہ پکناوان۔ یہ وٲراگ چھہ نہ فرارک وٲراگ بلکہ چھہ وٲراگ یس حساب ہینس پیٹھ آمادہ چھہ گو٘مت۔ امہ علاوہ چھہ غزل روایتی قدرن ہندۍ پۅتلۍ پھٹراونس پیٹھ آمادہ کران۔ حالانکہ غزل چھہ "میہ کیاہس پیٹھ” مگر یہ "میہ کیا” چھہ سہ یُس جابر وقتس میون خیال انزۍ منزۍ ہینس پیٹھ مجبور کرِ۔

حرام چھکھ اگرہے قبرِ میانہِ پیور تھون
میہ سیتۍ گیہ تہِ زن یم میانۍ شعر ضایع میہ کیا

یہ چھہ نہ محض سہ احتجاج یُس شاعر پننس بدون کڑنہ ینس کران چھہ بلکہ یہ چھہ احساسک سہ شدید مطالبہ یُس شاعر سند جذبہ بزور شمشیر ماناوان چھہ۔”

اختر محی الدین نیو ترجمو علاوہ چھہ تسند اکھ افسانہ "گلاب روے” اکس شمارس منز چھپیومت۔ افسانن منز چھہِ دیپک کول سند "ژھانپ”، بنسی نردوش سند "مستہ کلف”، غلام نبی شاکر سند "میہ تہِ تو٘ر نہ فکرِ” تہ "آکڈۍ”، کلدیپ رعنا سند "کۅلہ ٹونچ”، شبنم قیوم سند "گٹہِ منز گاش، گاشہِ منزہ گٹہ” چھپیمتۍ۔

رسالہ کس اکس شمارس منز چھپیوو کاشرِ زبانۍ ہندس مایوس رفتارکس موضوعس پیٹھ اکھ سمپوزیم یتھ منز شاہد بڈگامی، مظفر عازم، فاروق نازکی، بشیر شاہ تہ موتی لال ساقی ین حصہ نیو۔ شاہد بڈگامی وو٘ن رسم خط چھہ ناکارہ، مظفر عازمن وو٘ن لکن چھیہ نہ دلچسپی، فاروق نازکی ین وو٘ن سورے راہ چھہ حکومتس، بشیر شاہن وو٘ن ژھرِ راہ تہ بییہ نہ کینہہ تہ موتی لال ساقی ین وو٘ن وحہہ چھہ نہ اکھ۔  یہ چھہ سیٹھا دلچسپ سمپوزیم۔ 35 ؤری پتہ تہِ چھہ یہ ازیک صورت حال باسان۔

کاشر ادب کین شمارن منز چھپییہ سنتوش، شمس فقیر، رسول میر، غلام رسول نازکی، غلام نبی فراق، مظفر عازم، غلام نبی خیال،محی الدین گوہر،رشید نازکی، مشعل سلطانپوری، چمن لال چمن، رسول پونپر، غلام احمد گاش، شریف الدین شارق، سجود سیلانی، مکھن لال محو، محمد ایوب بیتاب، موتی لال ناز، غلام نبی عارض، مکھن لال کنول، فرحت گیلانی، مکھن لال بیکس، عبدالرحمن طالب، محمد امین شکیب،عبدالرحمن سرور، عایشہ مستور، جواہر لال سرور، منظور ہاشمی،  موہن لال آش، ارجن دیو مجبور، موہن نراش، رادھے ناتھ مسرت، محمد شفیع شاد، عبدالغنی ندیم، فردوس رعنا، غلام احمد عابد، خورشید احمد طالب، تنہا نظامی، غلام محمد غمگین، شفیع شوق، غلام نبی ناظر، رحیم ساجد، جگن ناتھ ساحرعبدالخالق رنجور، فاضل کاشیمری، ٹیلر عبدالرشید، شوکت انصاری، پرتھوی ناتھ کول سایل، عبدالرحمن آزاد، محمد یوسف عاجز سندۍ غزل تہ نظم ۔

(یہ لسٹ چھہ امہ مۅکھہ دنہ یوان تاکہ پرن وٲلس گژھہِ اندازہ امہ وقتہ کم کم شاعر چھہِ اندۍ پکھۍ ٲسمتۍ۔)

کاشر ادب – اکھ بہترین رسالہ (قسط 2)

santosh 2

اگر نہ کاشر ادب درامت آسہِ ہے، ممکن چھہ نیب تہِ ما آسہِ ہے نہ درامت۔ کامل گو٘و کاشر ادب نش دۅیو شمارو پتہ الگ، وجہ چھہ نہ پتاہ۔ مگر سنتوشس سیتۍ روز امۍ سنز دوستی برقرار ۔ کامل رود کاشر ادب رسالس منز چھپان تہ سنتوش تہِ رود نیب رسالس منز چھپان، خاص کر تمۍ سنز ظرافت نگاری یۅس سہ بکواس کاشیمری فرضی ناوہ لیکھان اوس۔ سنتوشس پیٹھ چھہ واریاہ لیکھنہ آمت مگر واریاہ کینہہ چھہ لیکھنے تہ تمۍ سندِ ہمہ گیر شخصیتکۍ واریاہ پہلو چھہِ اکثرن نش پوشیدے۔ بقول مظفر عازم "رومانوی ہیرو سندۍ پاٹھۍ جوش تہ جذبہ سان محبت کرن وول، اغواہک پلان بناون وول، گرفتاری ہند سامنہ کرن وول، نیک زندگی کرن وول، کھلہ ذہن تھاون وول، اندہ وندہ فیاض، متنوع زندگی کرن وول سنتوش ۔۔۔ چھہ تژھ شخصیت یمۍ سنز کہانی وننس لایق چھیہ۔” (فیس بک)  سنتوشن لیکھۍ افسانہ، ناول، نظمہ، غزل، تنقید، ظرافت، فلسفہ، امۍ کو٘ڈ رسالہ۔ امہ علاوہ اوس یہ تھیٹرس سیتۍ وابستہ تہ ہندروستان کین اہم مصورن منز شمار۔

(پیٹھہ کنہِ تصویر غلام رسول سنتوش)

اکی وقتہ، لرِ لو٘ر نیرتھ ما آسہِ ہے یمن دۅن رسالن پانہ وانۍ مان مان تہِ۔ نیب رسالن اگرچہ ادبس منز جدید سوچ پھانپھلوو تہ اکھ نو٘و معیار قایم کو٘ر، امیک پیش رو اوس ژکہ سنتوشن کاشر ادب۔ مگر نیب بنیوو نوِ رجحانک نمایندہ۔ نیب 9 کس اداریہس منز چھیہ کاشر ادب رسالس متعلق یہ شکایت میلان "کنہِ ہم زمانہ رسالس متعلق کینہہ ونن چھہ نہ اخباری آدابو انۍ جان۔ مگر اسۍ چھہِ نہ رسالہ ذاتی مفادو یا ہارہ کماونہ خاطرہ کڈان بلکہ چھہ یہ زبانۍ ہند ژکھ یمۍ اسۍ بیہ سۅکھ چھہِ بناوۍ متۍ۔ اتھ کن وچھتھ ہرگہ اسۍ پانوانۍ تنقید تہِ کرو سہ گژھہِ اسونہِ ہۅنجہ ویتراونہ یُن۔ کاشرِ ادبک بانی تہ اڈیٹر چھہ غلام رسول سنتوش۔ اتھ چھہ نہ شک زِ امس چھہ کاشرِ زبانۍ پوچھر دنک سٲنی پاٹھۍ سخ ہمسوس۔ مگر پانہ کشیرِ نیبر روزنہ کنۍ یمن دوستن امۍ یہ رسالہ وزِ وزِ حوالہ کو٘ر تمو کٔر امچ تژھ خراب روایت قایم زِ زبانۍ فایدہ واتنہ بدلہ ووت نقصانے۔ اکہ لٹہِ دراو زہ ژور شمارہ تہ گو٘و بند۔ وہرۍ جوراہہ دراو بییہ مگر نون ریتن منز درایہ کل بل تریہ شمارہ۔ وۅنۍ گیس بییہ زہ ریتھ زِ نو٘نے چھہ نہ کنہِ۔ حالانکہ رسالہ چھہ ریتوار۔ یہ صورت چھیہ نہ جان۔ امیک اثر چھہ زبانۍ پیٹھ تہِ ناکارہ پیوان تہ ہم زمانہ رسالن تہِ برونہہ پکنس تھۅس یوان۔”

کاشر ادب اوس سنتوش سندین پونسن پیٹھ نیران، پونسن ہنز کمی نہ آسنہ باوجود ہیو٘ک نہ یہ رسالہ تواتر سان نیرتھ، تکیازِ یمن شخصن یہ تیار کرناونچ کٲم ذمہ ٲس تم ہیکۍ نہ سنتوش سندس جذبس پوشتھ۔

ستوشس پیٹھ اوس دینا ناتھ نادم سنزِ شاعری ہند سیٹھا اثر، لہذا چھہ نہ یہ کانہہ اتفاق زِ اتھ رسالس منز چھپییہ نادم سندۍ واریاہ چیز یمن منز "حارثات” ناوہ چیو ستو نظمو علاوہ سانیٹ، نوِ طرزک غزل، میٔژ، ڈلہ بٹھۍ بٹھۍ، ژور، گاسہ تُل، زندگی، ونل ناوچہ نظمہ شامل چھیہ۔ نادم صابس سیتۍ سنتوشن اکھ کار آمد انٹرویو تہِ چھپیوو اکس شمارس منز۔ ییتہ نس تھاوون نادم سنز میٔژ نظم رژھرتھ تکیازِ یہ چھیہ نہ تہنزِ شایع کتابہِ منز شامل کرنہ آمژ۔

میٔژ

مژھج میٔژ
گرٕٹ، شوخ، سریہہ دار، شبنمۍ
پشج پۆٹ پشمینہ ٲوج
شہج بونہ ہند شاہ، وشنۍ گٲو ہند تھن
طرحدار، زٲوج، ملایم
مژھج میٔژ ملایم

*

میہ مۆند آب واراہ
مگر ییلہ وچھم دل جگر شانت سپدم
چھہ زن پھرستہ پھمب از ژواپارۍ وہرتھ
اتھو تلۍ میہ پوٚک ماجہ ہند ٹوٹھ آلو
نظر غیب گیہ واوہ مالن اندر
ہی چھیہ پراران پستہ جار گو٘ژھ واو چھاون
تہ پمپوشہ پیٹھۍ رکنہِ وو٘تھ اکھ خیالا
چھہ کچہ پوت پھنمبہ تو٘نب ونی ماجہ زامت
نرم لوو کلہ رن
گُرس کئۍ، وشنۍ تھنۍ
مژھج میٔژ، طرحدار، زٲوج، ملایم
مژھج میٔژ، ملایم
گرٕٹ، شوخ، سریہہ دار، شبنم

*

رنگو منزہ چھہ رنگ پۅختہ اڈہ زوو  جافر
اگر دٲن کٔنڈ لج دُسس گو٘و  سہ بادامۍ
ژُدشۍ زونہ ہند گاہ، لیدر اۆبرہ سٔدراہ
ژندُن مٲنزِ شر ہیتھ
منڈتھ کنکہ رنگۍ پۆٹ
چھہ نتہ دانہِ تاپس
سندِج ژیرۍ آمژ  پھۆلتھ وُڈرہ پیٹھۍ کنۍ
گرٕٹ، شوخ، سریہہ دار، شبنم
مژھج میٔژ، ملایم
طرحدار، زٲوج تہ دایم

*

چھیہ  خۅشبو  گلابس پنن راز قایم
ژٔڈس منز یہ دۅد تھنہ تلک مشک ادفر
نتے زاشُرس آیہ زامن
یُتھے آس مژرن ہوا نافہ سپدیو
وزنۍ عطرِ لج بالہ پیٹھۍ نیرۍ پوشن
تہ اکھ واوہ رنگ آیہ زن پھللہ چھاوان
کۅنگ مشک کوفور للہ وان لۅلہ منز
چھیہ ہرنن شہس زنتہ کۆستورۍ کھسہ وس
چھہ عنبر تہ وُدہ پانہ وانۍ راس کھیلاں
خبر ووت دۅہ کوت؟
اگر رود  انہِ نیرِ  وہرٲژ مہرینۍ
مشکدار وردن پھۅلن یوسمن
لگہ دِوے زن نشاطس
طرحدار، زٲوج  تہ دایم
مژھج میٔژ ملایم
چھیہ  خۅشبو  گلابس پنن راز قایم
مژھج میٔژ ملایم

*

امیک رنگ و بو یا پشُل یا پھہُر چھہ
ترُن یا وشن زانہِ تن میانۍ کیُتھ چھہ
بہ ییلہ زاس تیلہ آس امۍ سند شۅزر ہیتھ
یہ بتہ مٲج ازلچ
دٔہر ۍ بوج ابدچ
میہ لۅکچار رنزہ نوو امۍ لول برۍ برۍ
پننۍ دید میہ رٲوم امی دید میہ لٲجم
دِتن پھہہ بۆرن سریہہ سگُن میون باڈو
مگر از میہ گۅڈنی گیوُن بوز امۍ سند
میہ ما ٲس خبر میٔژ گیوُن زانہِ کوتاہ
یُتھے آب پۆک رۅنہِ ہیژن وزنہِ
تھج نارہ نے منز
وۅگن سینہ بترٲژ  زن شولہ ون نب
بٔرتھ آو دۅدہ وُے یہ ما گٲو ماجے
ہیۆتن لۆت وُزن سریہہ میٔژے لولہ ماجین
تہ سۆت سۆت صدا  اکھ
تہ لۆت لۆت مدٕر  لے
رٔسل گنگرایا، مژھج تان نغمچ
ہہ شو شو، شہ ہو ہو
ہہ ژھہِ ژھہِ تہ ژھہِ ژھہِ
اموب ماجہ ہیچھہ نوو شُر وۅدنہِ روزن
ہیۆتن د اں کلین گۅڈ  لگن دیوہ کھہس منز
یہ شو شو تہ ژھہِ ژھہِ
یہ ہو ہو تہ سی سی
یہے بولۍ   کۆستورۍ دچھ  پونپرن ہیچھ
یہے ککلہِ لٔب کۆر قمرۍ اتھۍ نقل ما
یہ واوُک صدا پۆت صدا ما چھہ امہ کے
طرحدار زٲوج تہ دایم
مژھج میٔژ ملایم
چھیہ ازلچ تہ ابدچ یہ سُرتال قایم
مژھج میٔژ ملایم

*

کران چھم میہ دل ڈُلگناہ دِمہ بہ ییتہ نے
بہ کرہ سران میٔژِ منز بہ ملہ خاک پانس
تہ  میٔژِ مۆہنیوا جنگلی پتھ ونس منز
بہ وچھہ قۅدرتک سُے گۅڈک جلوہ شاید
سہ ییلہ آدمس دستِ قدرت پھرِتھ گو٘و
سہ ییلہ تمۍ کنس تل گژھتھ "قم” ونیونس
دپیونس ژہ وۅتھ تھۆد
تہ ادہ کیا گیوو کانہہ قدم برونہہ تہ کانہہ پۆت
تہ کانہہ جل پچیوو،  کانہہ ڈۅچر دِتھ پچیو سو٘ت
تہ سُے ان ہِشر پھۆر جہانس
بہ ملہ خاک پانس بہ کرہ شران میٔژِ  منز
بہ چھلہ عالمس مل
بلن دادۍ لوکن ژلن جادۍ زدہ لس
تہ ہییہ زندگی بییہ کرنۍ نٔو تیاری
تہ ییہ بارسس میٔژ
مژھج میٔژ
گُرٕٹ شوخ سریہہ دار شبنمۍ
پِشج پوٹ پشمینہ  ٲوج
شہج بونہِ ہند شاہ ، وشنۍ گٲو ہند تھن
طرحدار زٲوج ، ملایم
مژھج میٔژ ملایم
***

(یہ نظم دژ مظفر عازم صٲبن ٹایپ کٔرتھ، یمہ مۅکھہ شکریہ کرن لازم چھہ۔)

یہ نظم چھیہ تقریبا گال کھاتس گمژ تکیازِ امہ نظمہِ ہند چھہ نہ کٲنسہِ پے پتاہ۔  یہ ہیکہِ امۍ سنزن شامل کتاب نظمن مقابلہ ڈیج ٲستھ مگر خالص یمہ حقیقت کنۍ تہِ زِ یہ چھیہ نادم سنز نظم چھیہ یہ رژھرنس لایق۔ امہ نظمہِ ہند ڈیجر ہیکہِ یمہ کنۍ تہِ ٲستھ زِ نادمن چھیہ سیٹھا کم نظمن نظرِ ثانی کرمژ۔ یمہ وقتہ یہ نظم لیکھنہ آمژ چھیہ تمہ ساعتہ ٲس نظمہ ہنز مروج شکل یہے چناچہ چھیہ امہِ شکلہِ ہنزہ نظمہ اسہِ اردو شاعر ن م راشد تہ میراجی یس نش تہِ میلان یمن منز تکراری عنصر غالب چھہ۔

رسالس منز چھپیوو نادم سنزن ژور تہ گاسہ تل دۅن نظمن پیٹھ اختر محی الدین تہ فرحت گیلانی سند تبصرہ۔ (یہ تبصرہ ییہ جلدے نیب ویب سایٹہِ پیٹھ دستیاب کرنہ۔)

کاشر ادب – اکھ بہترین رسالہ (قسط 1)

koshur adab

اکتوبر 1966 منز کو٘ڈ غلام رسول سنتوشن اکھ رسالہ یتھ "کاشر ادب” ناو اوس۔ سانین بہترین رسالن منز چھہ یہ یقینا شامل۔ ادبی صلاح کارن منز تھٲون دینا ناتھ نادم، علی محمد لون، امین کامل تہ بنسی نردوش۔ تم ادیب یم سنتوشس نزدیک ٲسۍ۔ دۅیو شمارو پتہ چھہ کامل صلاح کارو منزہ نیران تہ رسالہ چھہ اپریل 1967 شییم شمارہ نیرتھ بند گژھان ۔

کاشر ادب کہ گۅڈنکہ شمارہ پتہ برابر دۅیہ وہرۍ تہ بند گژھنہ پتہ برابر نوِ ریتۍ چھہ کامل پنن رسالہ نیب شروع کران۔ کاشر ادب چھہ نیبک ژورم شمارہ نیرنہ پتے اکھ ؤری ژور ریتہ کہ وقفہ پتہ اگست 1969 منز دوبارہ نیران۔ ٲٹھمہِ شمارہ (دسمبر 1969) پیٹھہ چھہ اتھ اکھ ادارہ بنان یمن منز محمد یوسف ٹینگ، اوتار کرشن رہبر تہ فاروق نازکی آسان چھہِ۔ میانہِ علمہ مطابق چھہِ یہندس ناوس تل اتھ  نیب رسالس لرِ لو٘ر بییہ تریہ شمارہ نیران تہ ٲخری کہم شمارہ نیرتھ چھہ 1969 یک ؤری سورنس سیتی بند گژھان۔ نیب تہِ چھہ برابر ترییہ وہرۍ 17 شمارہ نیرتھ اکتوبر 1971 منز بند گژھان۔

اتھ رسالس منز چھپییہ امین کامل، علی محمد لون، غلام نبی فراق، بنسی نردوش، رحمن راہی، اختر محی الدینس پیٹھ سنتوش سندۍ لیکھۍ متۍ خولہ خط ناوہ دلچسپ خاکہ۔ یم خاکہ ہیکہِ ہے نہ سنتوشس ورٲرے بییہ کانہہ لیکھتھ تکیازِ سہ زانہِ ہے یمن نزدیکی سان تہ تس نش ٲس سۅ نظر، سۅ ظرافت، بیہ تکلفی تہ دلیری یمۍ یم خاکہ یاد گار بنٲوۍ۔ یمن خاکن سیتۍ ٲسۍ ادیبن ہندۍ سکیچ یمو منزہ لون، کامل، راہی سنتوش سندۍ بناوۍ متۍ باسان چھہِ۔ فراق سند سکیچ چھہ سجود سیلانی سند تہ باقی زہ تہِ چھہ سجود سندی باسان۔ بۅنہ کنہ چھہ یم سکیچ پیش۔

Untitled

کاشرِ ادبکۍ کور ڈیزاین ٲسۍ خطاطی تہ نقاشی تہ مصوری ہندۍ فنکاران نمونہ تکیازِ یم ڈیزاین اوس سنتوش پانہ بناوان۔ (ییلہ نیب رسالہ شروع گو٘و امکہ ناوک ڈیزاین تہِ بنوو سنتوشنے۔) دۅیو دۅیو شمارو پتہ اوس کاشرِ ادبک کور ڈیزان بدلان تہ اکہ تازگی ہند احساس اوس گژھان۔ البتہ اندریم کتابت تہ طباعت تہ کاغذ ٲسۍ  نہ کور ڈیزنس ساتھ دتھ ہیکان۔

رسالس منز  ٲسۍ ہم زمانہ ادبی معاملن پیٹھ اداریہ چھپان یمن ہند ذکر برونہہ کن ییہ۔ پتہ کنہِ ٲسۍ نامہ پیام ناوہ خط چھپان یم صرف کینژنے شمارن تام محدود رودۍ۔ کاشرین ادیبن نش رسالہ پٔرتھ فن پارن متعلق کانہہ کتھ ٲسہ کڈنک توقع چھہ ہمیشہ غلطے رودمت۔ امہ خاطرہ تہِ چھہ ایڈیٹرن جکھن پیوان۔ باسان چھہ رسالہ کیو ذمہ دارو  چھہ اور کن کمے توجہ کو٘رمت۔  زیادہ تر خط چھہِ فضول، کاشر رسالہ کڈنس پیٹھ تعریف، گیٹ اپکۍ تعریف بیترِ۔

رحمن راہی سنزِ "سیاہ رودہ جرین منز” شعرہ سۅمبرنہِ ہندِ ابتداہچ نظم ‘جلوہ تہ زبور’ تہِ چھپییہ اتھۍ رسالس منز۔ دینا ناتھ نادم سنزہ امیجزم نش متاثر لۅکچہ نظمہ "حارثات” تہِ چھپییہ اتھۍ رسالس منز۔  امین کامل سند افسانہ "پھاٹک” تہ چھپیوو اتھۍ رسالس منز۔ تمہِ کھوتہ اہم یہ زِ اتھ رسالس منز چھپییہ کامل سندۍ زہ غزل (سانۍ حالاتھ حارۍثاتھ بنے ۍ) تہ (بہار پو٘ک نہ اگر چانہ میانہ رایہ میہ کیا) یم بحثکۍ موضوع بنییہ۔ اکھ امہ ادارہ کہ امہ دعوی کنۍ زِ "یمو دیت کاشرس اکھ نو٘و لہجہ تہ آہنگ” بییہ تمہ بحثہ کنۍ یُس کامل تہ راہی یس درمیان یہندس عروضس پیٹھ سپد۔ یہ اوس کاشرس منز گۅڈنیک عروضی بحث۔  یہ بحث چھپیوو اتھۍ رسالس منز۔

اتھ رسالس منز گو٘و افسانہ ترجمہ کرنک اکھ سلسلہ شروع یمن منز سعادت حسن منٹو (بابو گوپی ناتھ)، اوہنری (ڈالۍ)، چیخوف (اکس کلارکہ سند انجام)، گورکی (ڈنبۍ دود)، موپاساں (عشفک راز)، احسان عبدالقدوس (پو٘ت پھیرتھ)، واجدہ تبسم (ککل) سندۍ افسانہ ٲسۍ۔

یم خاص مضمون اتھ رسالس منز چھپییہ تمن ہند فہرست چھہ یہ :

گریرسن – اوتار کرشن رہبر
کالیداس – غلام نبی خیال
مورخ حسن – اوتار کرشن رہبر
روایت تہ ادب – محمد امین اندربی
کلہن – اوتار کرشن رہبر
مہدہ صٲب دیکہ – محمد امین رفیقی
سوم دیو – مکھن لال رینہ
درزہ پٲتھر – موتی لال کیمو
کردار نگاری تہ ادب – اوتار کرشن رہبر
سانۍ ادبی تحریک – میرزا عارف
ترجمن ہنز اہمیت – غلام نبی فراق
ازیک کاشر سٹیج – پران کشور
کاشرچ ضرورت – رحمن راہی
جدید شاعری – فاروق نازکی
کاشرس ادبس منز پیروڈی – نشاط انصاری
ڈراما فیسٹول، اکھ جایزہ — جی ایل چوپڑہ

کاشر رسالہ واد (قسط 8) : شفیع شوق

shauq-Yaad
وادس منز چھپیہ شفیع شوق سندۍ کل تریہ غزل۔ اکھ شمارہ 2 تہ زہ شمارہ 11 ہس منز۔ یم تریشوے غزل چھہِ شوق سنزِ شعرہ سۅمبرنہِ ‘یاد آسمانن ہنز’ منز پوتس شامل کرنہ آمتۍ مگر اکثر شعر چھہِ دوبارہ لیکھتھ بہتر بناونہ آمتۍ ۔ اکثر چھہِ خیال تمے البتہ چھہِ زبان تہ پیکر زیادہ موافق تہ اثردار بناونہ آمتۍ۔

شوق سند غزل اوس وقتہ کہ جبرہ کس نتیجس منز فرد سنزِ بے چارگی رنگہ رنگہ پیش کران۔ یہ بے چارگی چھیہ کنہِ کنہِ خۅد فریبی ہنز شکل تہِ رٹان تہ طنز تہِ چھہ بارسس یوان۔ امۍ سندس غزلس منز چھیہ زیادہ ٹھوس تہ جسمانی لفظ، پیکر تہ استعارہ ورتٲوتھ اکھ الگ وتھ کڈنچ کوشش۔ امس چھہ شعر ظاہری ہیژ علاوہ مضمونو رنگۍ تہِ ازۍ کین فکری تقاضن ہم آہنگ بناونک شوق۔ یہ چھہ پامال مضمونن نشہ پنن غزل شعوری طور دور رٹان۔

واریاہن شاعرن برعکس چھہ نہ شوق سند غزل رسالس منز راوان، بلکہ چھہ یہ یکدم پانس کن متوجہ کران۔ کینہہ شعر:

موسم ڈٔلتھ تہِ کل چھیہ خیالس بہ کیا ونس
خوشبو لبُن یژھاں چھہ گلابس بہ کیا ونس

ڈج وڈرِ پتھ یہ ڈولۍ تہ ڈلۍ نظرِ تاپہ پرنگ
یتھ جایہ تیۍ کہرۍ میہ ونیم وس بہ کیا ونس

پشرن میہ پرانۍ بانہ ڈۅکرۍ وس دوپن ژہ گر
ہیوکمے نہ دِتھ گرتھ میہ موادس بہ کیا ونس

شہرس اگر سرحد چھہ کڈاں کاڈ ژۅاپارۍ
پریتھ کانسہِ پنن حلقہ ژمان کیازِ چھہ باسان

یُس یوت کراں جشنہ زِ آزاد چھہ آدم
سے تیوت مگر پانہ پھسان کیازِ چھہ باسان

خوفہ ہتۍ ٲسۍ اکھ اکس لٲرتھ
اتحادک کمال ہاواں ٲسۍ

از بہ وچھتھس شنلۍ سِرن ہند وٹھ
زیرِ پھۅلہو تہ وۅندہ باواں ٲسۍ

کاشر رسالہ واد (قسط 7) : م ح ظفر

zaffar

وادس منز چھپییہ م ح ظفر سندۍ کل شیہ غزل۔ زہ شمارہ 4، تریہ شمارہ 6 تہ اکھ شمارہ 12 کس گۅڈنکس حصس منز۔ ظفر سند غزل ہیوک نہ کانہہ مقبولیت حاصل کٔرتھ۔ اتھ متعلق چھہ اکس خطس منز شفیع شوق لیکھان "فکرِ ہند غلبہ تہ ہیژ ہند نویر (چھہِ) میہ ہوین پرن والین مکمل حض حاصل کرنس منز رکاوٹ بنان۔”

ظفر سنزِ شاعری منز چھیہ سوچک گۅبیر پیدہ کرنہ چہ کوششہ منز لفاظی پیدہ گژھان، یمہ کنۍ امۍ سندِ ادراکچ (دربافتچ) شدت اکثر راوان چھیہ۔ دویمین لفظن منز ونو زِ امۍ سندِ غزلچ کمزوری چھیہ یہ زِ یہ چھہ زیادہ کتھہ کران۔ وجارہ گی تہ وجودی دۅکھ چھہِ ظفر سنزِ شاعری ہنز غالب دلچسپی یمن ہندِ عرفان کس نتیجس منز یہ شاعری غم ناک بنان چھیہ۔

ظفرس نش اوس اکس آیڈیل شاعر سند سامانہ ۔۔ فکر تہ فن تشکیل پذیر سپدان۔ کُنہِ ساعتہ چھہ کانہہ جداگانہ شاعر ہمعصرن ہنز مقبولیت وچھتھ تہ تتھ غلط پاٹھۍ شاعری ہنز اظہاری کامیابی تصور کٔرتھ پسپا تہ عدم دلچسپی ہند شکار گژھان۔ شاید سپز ظفر سنز شاعری امی وہمچ شکار تہ امۍ لوب نہ سفرس پیٹھ جاری روزنک تہ پننۍ وتھ شیرنک موقعہ۔ کینہہ شعر:

وشنہِ سوچکۍ ترنۍ رنگ مہ وچھ
کانہہ تہِ منطق غلط ون مہ گژھ

پرژھ ژیہ کیا چھے پرژھن ژیتھ مہ رچھ
میانہِ ژھۅپہِ ہند صدا بن مہ گژھ

کال برمرتھ چھہ آمت ظفر
ازلہ ابدک نقش کھن مہ گژھ

ظفر ژہ تھاو سامہ وِتھ یہ سریہ لوسنک سمے
میہ ٲسۍ کلۍ تہ کٹۍ پرژھاں گٹین شبن سنبالہِ کُس

دوپکھ وجارہ چھی لیکھتھ ڈیکس ژہ پکھ پکان گژھ
میہ پرژھ نہ زانہہ تہِ نیجرن اما چمن سنبالہِ کُس

بہ چھس وجارہ وتن ہند تھکن اچھن منز ہیتھ
بیہ سۅکھ وبالۍ ژہین دول رٔٹتھ کراں ارزتھ

اگر ظفرن "مہ گژھ” ہوۍ داہ وہ غزل تہِ ونۍ متۍ آسہ ہن تس آسہِ ہے نٔوس کاشرس غزلس منز پنن اکھ مقام۔ میہ چھہ نہ معلوم ظفرن کرییا پننۍ شاعری سۅمبرنہِ ہندس صورتس منز شایع کنہ نہ۔۔

کاشر رسالہ واد (قسط 6) : رفیق راز

nay

واد رسالس منز چھہِ رفیق رازنۍ تہِ چھہِ کل پانژھ غزل  چھپان۔ زہ شمارہ 3 تہ تریہ شمارہ 6 ہس منز۔  راز سندِ غزلہ کہ مقبولیتکۍ ٲسۍ واریاہ وجہ، یمن منز ویز، واضح زبان تہ خیال ورتاونک ہنر شامل چھہ۔ رازن کٔر شہر سرینگرچ زبان (تہ محاورہ) کاشرِ شاعری منز  گۅڈنچہ لٹہِ  متعارف یتھ متعلق کینژن شود کاشر اظہار آسنک دھوکہ لوگ یمن منز علی محمد لون تہ اختر محی الدین ہوۍ بڈۍ ادیب تہِ شامل چھہِ۔

رفیق راز سندِ غزلکۍ لفظ، پیکر تہ استعارہ سٲری ٲسۍ ویدۍ تہ برونہہ کنکۍ تہ صاف تہ شفاف یمن منز نہ کُنہِ شکچ تہ شبہچ گنجایش ٲس۔ آہنگ تہ ردیف قافیہ کنۍ تہِ اوس سہ تم زمینہ تیار کران یمن منز یاد روزنچ، زیوِ پیٹھ پھرنچ تہ بجایہ خۅد معنہ ساوۍ آسنچ صلاحیت موجود ٲس۔ رازن کرۍ کینہہ لفظ  بار بار تہ رنگہ رنگہ ورتٲوتھ پننہِ شاعری ہندِ خاطرہ مخصوص۔ امۍ سندین عشقیہ تجربن ہنز  ایمایت ٲس شاعری سیتۍ دلچسپی تھاون وٲلس امۍ سندس ہم عمر طبقس خاص طور پانس سیتۍ پکناوان۔

راز  سنزِ شاعری منز چھیہ نہ کانہہ موضوعاتی دلچسپی نظرِ گژھان۔ امۍ سند زیادہ تر فوکس چھہ موجود ژہس پیٹھ تہ امی مجود ژہہ کہ درچہ منزۍ چھہ سہ انسانی تجربن ہنزہ ژھایہ تہ رایہ گاشراوان تہ تہِ کٔرتھ اتھ ژہس  لازوال بناوان۔ راز چھہ پرن وٲلس بدل کنہِ دنیاہس منز  منتقل کرنہ بجایہ تہندے دنیا گاشراوان تہ تبدیل کران۔ راز سندۍ غزلن دیت پرن وٲلس تمہ ساتہ تہِ یہ نہ تس دستیاب اوس۔ کینہہ شعر:

اکھ چشمہ جورۍ ٲس کراں زول راتھ تام
سۅے چشمہ جورۍ از تہِ سراپا مگر سوال

 اکھ دما بیوٹھ میہ نش آرہ پلس پیٹھ تہ وونن
پوت نظر دی نہ یہ ردیاو میہ وونمس نہ کہنی

 بہ زن یور کن  پتھرِ پیومت کھلاڑۍ
ژہ زن ٲنتھہ روس ہالہ میدان ہیو

 ژیہ چھے نا زنہے وۅش تہِ نیرتھ ژلان
ژہ تے چھکھ میہ ہیو عین انسان ہیو

گلابس ژھٹن زن چھہ گاشر سحر
کنڈس پیٹھ چھہ تارکھ تہِ لرزان ہیو

بہ زن گردِ اندر افق تا افق
ہوا زنتہ ازلے میہ زاگان ہیو

لامکاں وٲتھ کڈن فرمان بیاکھ
تالہ پیٹھ تھونم ظہرۍ اسمان بیاکھ

تار ییلہ سدرس لبو واتو اپور
ٲس وہرتھ آسہِ ریگستان بیاکھ

رفیق راز سنزہ چھیہِ زہ کاشرۍ شعرہ سۅمبرنہ شایع سپزمژہ – نے چھیہ نالاں تہ دستاویز۔ یمو منزہ چھہ گۅڈنکس ساہتیہ اکاڈمی ایوارڈ تورمت۔

کاشر رسالہ واد (قسط 5) : قاضی غلام محمد

qazi

وادس منز چھپن والین غزلن منز آسہ تمہ وقتہ چہ کینہہ نوِ تہ توانا آوازہ یمو منزہ قاضی غلام محمد، رفیق راز، م ح ظفر تہ شفیع شوق سند ذکر خاص طور ضروری چھہ۔

قاضی غلام محمد سندۍ چھپییہ کل شیہ غزل – زہ شمارہ 1، زہ شمارہ 4 تہ اکھ اکھ شمارہ 6 تہ 8 منز۔ قاضی سند غزل سپد امہ چہ متاثر کن تازگی کنۍ سیٹھا مقبول، مگر کم گو آسنہ کنۍ ہیوک نہ یہ غزل پورہ پاٹھۍ شعری منظرنامس منز کاڈ کڈتھ۔

قاضی سندِ غزلچ تازگی چھیہ امہ کین شعرن ہنزِ طلسمی حیرت انگیزی علاوہ ویدۍ تہ عام مضمون ژیتس منز درن واجنین دلکش/غیر معمولی بصری صرژن ہندِ ورتاوہ کنۍ۔ امۍ سندۍ غزل چھہِ عصری حقیقت نش دور (شاید فرار کٔرتھ) پننس پانس منز اکھ طلسمی، حیرت آمیز (سہ حیرت یتھ منز خوفہ بدلہ احترام تہ کرامٲژ ہند جذبہ آسہِ)، خوبصورت تہ وفا شعار دنیا آباد کران۔ شاعر چھہ تخیل کہ قوتہ سیتۍ امکاناتن ہنزہ تژھہ صورژہ تخلیق کران یم ظاہری دنیاہس سیتۍ مماثلت تھٲوتھ تہِ تمہ نیبر باسان چھیہ۔ دویمین لفظن منز ونو ز قاضی سندین شعرن ہنز سیٹنگ چھیہ حقیقی منظرن بجایہ خوابن ہنزہ صورژہ باسان۔

بنمین شعرہ مثالن منز چھہ گۅڈنیک شعر قاضی سنزِ شاعری ہنز کونز۔

بقول شہناز رشید قاضی سنز شعرہ سۅمبرن چھیہ "صورت خانہ” ناوہ چھپیمژ یتھ منز الہ پلہ غزل 25 مرہ چھہِ۔

اچھ وٹتھ بیہہ یہ اوند تہ پوکھ مشراو
صورژن ہند نگار خانہ سجاو
میون دل رنگہ موت چھہ معصوم شُر
چانۍ یاداوری چھیہ سبز الاو
خاصہ جامن کزلۍ ونن تس گٔے
تاپھ کیا کرنہِ میون کُٹھ ژایاو

تتھہ پاٹھۍ ژہ پیہم راتھ ژیتس
زن کاوہ قمیر ژول بونیو تلۍ
پوت ژھایہ کزلۍ اچھ ٲنہ بدن
تمہ بازرہ ہیمہا کیا کیا ملۍ

درایکھ میہ نش تہ ٲنہ لبن دہہہ ہیوتن وۅتھن
آیکھ میہ نش تہ دٲن تھرین تل گنداں چھہِ خواب

میہ تھوو ٲنہ لبن منز سہ ساتھ مٲنتھر دتھ
دپیوتھ بییہ تہِ گژھیا زانہہ یہ دستیاب وۅلو