اوس کیا تہ کوت گوو؟  یوت تام نہ پتاہ لگہِ
پریتھ چیزس نکھہ چھہ بیاکھ چیز روومت باسان
دارِ نش کژتام ژونٹھۍ ٲسۍ  مگر اکھ چھہ غیب
پرژھومکھ یہ بیاکھ ژونٹھ کوت کوروون
وۅشلیہ، پھورکھ نہ جواب

ڈل بٔٹھس پیٹھ ٲسۍ تریہ یار چکرس نیران
مگر از چھہ اکوے پانسے سیتۍ زنتہ روومت
مون بیاکھ چھہ آور، ترییم کوت گوو؟

سڑکہِ پرژھوم تسندۍ پدۍ نشان کتہِ تھٲوتھ
رب آیس متھنہ
نبس پیٹھ ٲس تارکھ مال ونوان
سٲری چھہ پننہِ پننہِ جایہ  تتھے پاٹھۍ یتھہ پاٹھۍ ٲسۍ
مگر ہتہِ ییتہِ چھہ کانہہ کانہہ تارکھ توتہِ کم باسان
گاشس پرژھوم ژیہ ما کانہہ زژ رٲومژ
اوبرہ لنگس تل کھوٹن پان

یتھے ما راوِ قرار!

(منیب الرحمن)

 

ہردُن واو کُلین منز ژامت
جاناوار چھہِ ژلۍ متۍ دور

کُلۍ چمنس منز تنہا تنہا
زن چھکھ لنجہ لنجہ پیومت سور

برگ برگ زۅزران، پیواں وسۍ
پتھ کُن روزان خالی مور

ازیک یہ مۆت مجنون چھہ ژھاران
راتہ کہ خوابچ جنتچ حور

 

 

 

 

 

 

منیب الرحمن

 

دپہر وقتس فلمی بٲتھ
شامس شامس بی بی سی
بٹہ وارِ آتھوارِ کرکٹ میچ

مشین تہِ لٲجن
بی بی سی پیٹھہ آے نہ  خبرے
محمد رفیع سنز دل بہلایی
کشور کمارنِس شورس تل
محمد حنیف تہِ کورہس ڈک
ژُچن چھکن پیٹھ ولمنہِ کھسوُن
کوتاہ ژالہِ

وتہِ پیٹھ کۆڈنس ٹاس

بساطۍ وانک کل سرمایہ
ٹرانزسٹر
 

 

منیب الرحمن

 

تکیس ڈوکھ دتھ کوب ژامت
ہوا چھہ چٹہ کھٲلتھ  ڈولان
چاے چھیہ کھوند کھیتھ وسۍ پیمژ
ویتہ گٲمژ کانگر لوب کن
جاے چھیہ بیہنہ کہ آیہ ورٲے

موج یتُھے اژِ کمرس منز
دیوارس پییہ ژھاے
تکیس گژھہِ ژس
ویتہ گٲمژِ کانگرِ لگہِ پھیُر
پتھرس کھسہِ قدمن ہند بوش
ہوا نوا ڈلہِ

"چاے ہا چھو وسۍ پیمژ!”

 

 

 

 

 

منیب الرحمن

دوپمس دٔدۍ متہِ سینہ
ہتا میانہِ کینہ
شورس  سیتۍ مہ گند
پانس سیتۍ کرہکھ خبر کٲتیا
بھسم

دوپنم  بہ چھس گاش زالان
نورک آگر

ہے میانہِ نورٲنۍ انہِ گٹہِ
گاش ژھورتھ نہ زانہہ تہِ
گاشہ نیبر

یہ شورہ مشک ٲسکھہ
سبز کلین تلہ کنہِ
گننین جنگلن منز کھٹان
یہ مشک ووت
شہرن تام

ہے میانہِ تنبلیمژِ مژی
چانۍ ترشولن ہے والۍ
میٲنس اسمانس چھولۍ

گۆو ہے
گۆو ہے رتہ زول

ہے گۅسوانۍ تیمبری
متھ پانس سور
تہ بیہہ دم کٔرتھ

 

 

 

 

 

شامک ڈنگہ اوس
لال ٹین ہیتھ
دور دریاوس منز

تھوٚکمت واو اوس
شیچھ ہیتھ
منزۍ کانہہ ملر
بٹھس کن
سوزان

کتہِ نس
کمہ اندہ
دیہ شامک ڈنگہ
تھکھ
راتس پیٹھ

زون ٲس پکان
انہِ گٹۍ آبس
اوٚبرہ لنگو منزۍ

کلین منز پنزۍ ٲسۍ
باکہ دوان

شاندکۍ ریشم پوش
اشۍ قطرو سیتۍ
سگونہ آمتۍ
مشک ژھٹان

 

 

 

تمام دنیا کین شرین ہندِ ناوہ یم  تصادمن منز ہلاک گیہ، چھۅکہ لد گیہ، مجروح گیہ۔

 

تمہِ کھوجہ نہ اچھ

(1)

زردیمژ زون وٲژس شاندس پیٹھ
پرژھنس از کتہ ٲسکھ
تارکھ نب اوسے پہرن پراران
دل چھم نہ کران نیرُن چھہ ضروری
نتہ ما گژھہ ییتۍ نے شاندس پیٹھ ویگلتھ
پتہ اوٚش ہارکھ
زون آیہ تہ گے
تارکھ آیہ تہ گے
صبحک گاش پینے اوس
نب اوس خالی
تمہِ کھوجہ نہ اچھ
تمہِ کھوجہ نہ اچھ

 

(2)

اوٚبرن دتۍ خالی ورقس گتھ
واو — آو تہ گوٚو
واو — آو تہ گوٚو
نب اوس خالی
نیول، خموش، بیہ حرکت
شامن دیتنس میوٹھ ڈیکس
زون آیہ تہ گے
تارکھ آیہ تہ گے
کورہ ورق اوس خالی
تمہِ کھوجہ نہ اچھ

 

 (3)

جنگلس پیٹھ دتۍ پوشن آلو
براندس پیٹھ دتۍ تاپن ؤنۍ
نب اوس خالی
درمنہ چہ اچھہ آسہ پراران
واو اوٚبر ہیتھ آو تہ گوٚو
خوشبویہ مستس زیر دژس
پنہ پونپر بیوٹھس ٹارین پیٹھ
کٕتہ کٕتہ کوٚرنس
دوٚپنس — ووٚتھ تھوٚد
دوٚپنس —  ووٚتھ  تھوٚد
ژھیپۍ ژھارِ گندو
ژھیپۍ ژھارِ گندو
تمہِ کھوجہ نہ اچھ

 

 (4)

راتھ ٲس خالی
خاموش، بیہ حرکت
بونۍ کھڑا ٲس پہرہ دوان
پتم ؤتھر پیوس رخسارس پیٹھ
واو شوٚنگتھ اوس دروازس پیٹھ
زونہِ کنن منز آلو دتۍ نس
تارکھ آیہ تہ گے
آیہ تہ گے
تاپچ زژ اکھ خواب بٔنتھ  آیہ شاندس پیٹھ
دوٚپنس وچھ وۅنۍ آیس
تمہِ کھوجہ نہ اچھ

 

 (5)

اوٚش قطرہ پیوٚمت اوس شاندس پیٹھ
زون شونگتھ ٲس براندس پیٹھ
تارکھ ٲسۍ ؤٹس منز چھکرتھ
راتھ ٲس خالی
خالی خالی
قطرس جاناوار بنیوو
جاناوارن ناو ہیوٚتس
ناوس پوش بنیوو
پوشچ خوشبو آیہ تہ گے
رنگ آو تہ گوٚو
پوشک شبنم پیوس وٹھن پیٹھ
خاموش، بیہ حرکت
تمہِ کھوجہ نہ اچھ

 

 (6)

گں گں گں
گں گں گں
ماچھ تلر اکھ آیہ تہ ووٚننس
لجمژ چھیہ پھلے از دٲن تھرین
ہکچہ گندو
پکھ ہکچہ گندو
واو اوس خالی
واو اوس خالی خالی
خاموش، بیہ حرکت
شام  وساں اوس صحنس منز
زونہ گاش کنین اوس ادراوان
دٲن تھریو منزہ جگنو دراے
اچھر والن پیٹھ کوٚرہس زول
تیمبرِ نژن گتھ
تیمبرِ نژن گتھ
کھول ژہ اچھ وۅنۍ
کھول ژہ اچھ
تمہ کھوجہ نہ اچھ

 

 (7)

دۅہ اوس خالی
شام تہِ خالی
باغس منز اوس پوش اکھ تنہا
پوشس اندر آسہ سۅنہرۍ اچھ
سۅنہرۍ اچھن ہند گاش نبس کھوٚت
گاش نبس کھوٚت
گاش بٔرتھ آو کونن کھدرن
ٹپۍ ٹپۍ سحرس تام
سحر آو تہ گوٚو
گاش آو تہ گوٚو
تمہِ کھوجہ نہ اچھ

 

 (8)

براندس پیٹھ کمۍ آلو دیُتنس
گلاب تھرِ تاں بوز
گلاب تھرِ پیٹھ اوس اکھ ٹور
نصفے اچھ مژرٲوتھ
واون زلفن کنگو کوٚرمت
لوہ پھیرۍ چھوٚلمت بتھ
نب اوس خالی
خالی
ویرِ کلین منز ژنہِ ہانگرۍ تلۍ ہرۍ
گلاب تھرِ پھوٚل پوش
شام اوٚبر ہیتھ آو
اوٚبرن ٹکھ نی شاندس پیٹھ
لۅتہ لۅتہ پرژھنس ناو
ون ون ون
تمہ کھوجہ نہ اچھ

 

 (9)

نچہ نچہ تونتہ کٔرتھ ژرِ آیہ
دور تھدیو بالو پیٹھہ
رنگدار پکھن منز برۍ برۍ گاش
ژرِ آیہ تہ گے
ژرِ آیہ تہ گے
واون تل گاش اچھر والن پیٹھ
شاندس تل سۅمبروون
گاشچ رونق خوابس منز تٔر
تتھ پھوٚلۍ پوش عجایب
پوش اتھو منزہ تس ژوٚل نیرتھ
کۅلہِ روٚٹ بۅنہ ہلمس منز
آبس پیٹھ پوش ژونگ بٔنتھ دوٚد
ورِ وارن منز دور
خوشبو شیچھ ہیتھ آیہ مگر
آیہ مگر
آیہ مگر
تمہ کھوجہ نہ اچھ

 

 (10)

پکھہِ پیٹھہ دُن اکھ رودہ پھیورا
اکۍ کاون دور نبس پیٹھ
بۅنہ کنہِ دورُس اچھر والو اتھہ
والہ پتہ والہ پھرنووکھ
تاپچ زژ پییہ ساری رنگ گیہ
رودہ پھیرس منز ظاہر
رنگ آیہ تہ گے
رنگ آیہ تہ گے
تونتہِ اندر تل ہارِ
تھووُن سیہ منز ڈیکس پیٹھ
ڈیکہ پیٹھہ بۅن ووٚتھ نستہِ پیتس کن
تھرہ ژایس ینہ وسۍ پییہ
وسۍ پیوٚو وسۍ پیوٚو
زیو کڈ زیو کڈ
ہارِ ووٚنس
تمہِ کوجہ نہ اچھ

 

 (11)

بۅکھچہ کتابن ہند اوس ڈولان
بۅکھچس منز چھٹہ پونپر اوس
لنچ بکسس اوس ڈکنہ اوٚڈے
نب اوس خالی
براندہ تہِ خالی
دٲر تہِ خالی
خالی
چھٹہ پونپر لبہِ ہندِ ٲنہ اندرۍ خوابس منز ژاو
بکسچ خوشبو آے تہ گے
آے تہ گے
تمہِ کھوجہ نہ اچھ

 

 (12)

وردی ٲس کِلس پیٹھ
الوند گوێمت اکھ خواب
خوابچ ژھاے پییہ لبہِ پیٹھ
خاموش، بیہ حرکت
خالی خالی
دارِ ہندِ شیشہ منزۍ زونہِ ہندِ عکسکۍ
ورق آیہ تہ گے
ورق آیہ تہ گے
تمہِ کھوجہ نہ اچھ

 

 

 

 

دۅہ کھۆت ولمنہِ، ڈلہ گۆو بالس
پتہ پتہ لاراں سۅنہرۍ تاپس

کونس کھدرس منز گژھہِ آسُن
تارکھ میون تہِ کُنہِ اسمانس

زونہِ ورق وتھۍ شیشہ پٹیو منزۍ
خوابچ زھاے پییم دیوارس

آلو دیتمس واپس یکھنا
آلو تام تہِ آو نہ واپس

زون اتھس آیہ تتھۍ پنہ ؤتھرس
ہوہہ چہ چھگہِ منز یُس پھۆٹ آبس

پرتو چون اچھن پیٹھ کیا پیۆو
کَنہِ زن أدرییم زنہ گاشس

دگرہ کہ نارک سور تہ بییہ کیا
نرم گرم وشنیر یہ شامس

زن پلون چھہ وۅتھاں بہہ رزِ پیٹھ
گاش چھہ چھۆلمت انہِ گٹہِ راتس

شینہ ؤتھر زن پیوٚو تیوٚنگلن پیٹھ
کوتاہ سریہہ چھم کوتاہ ہاوس

فلسفہ رسہ روٚس ہکریمژ ژوٚٹ
ہٹہِ کتھہ پاٹھۍ وساں انسانس

گلدانس کم پوش کھنتھ ٲسۍ
پھٹتھ چھہ آمت چھکرنہ باغس

شام وساں دلہ کین جنگلن منز
شین پیواں یتھہ کنۍ دریاوس

شعر ونن چھہ نہ حل کنہِ مسلس
اصلس کھُر یی سنکھے شعرس

 

 

 

 

 

نب وہرٲوتھ اچھ مژرٲوتھ
پراران لوسس تیلہ کونہ آہم

سرۍیس سیتۍ میہ دۅہہ کین پہرن
ونۍ ییلہ دتۍ مے تیلہ کونہ آہم

پوشن منز خوشبو سۅمبرٲوتھ
آلو دتۍ مے تیلہ کونہ آہم

تارکہ!
چون تبسم رۅپہ سند
دورن ماران گرایہ، تلان ہرۍ
اندۍ پکھۍ کٲتیا تارکھ چھی
ژیہ یہ محفل دمہ دمہ پوشن
کنرکۍ انہِ گٹۍ نیتھہ نوٚن کورنس
چانین ژھاین پراران پننی ژھاے میہ رٲوم
وۅنۍ کیا آہم!

تارکہ چون تبسم پوشن
تیلہ کونہ آہم!

 

اچھ کھوجن
وارہ وارہ
مگر کہنی آس نہ بوزنہ
سورے دنیا آس اکی پھیشہ
مٹاونہ
بس روزس ویزہ
اویزہ آوازہ
موچھن منز اژۍ اژۍ
زالیو کنۍ نیرتھ
ژلان

عفو خدایا
ٲنتھہ روستس خلاہس منز
زن پیوو وجود
لانہایت تھزرہ پیٹھہ وسۍ
بیہ آواز ژٔکس سیتۍ
آو ٹھاسنہ
نہ رود وق کُنہِ
نہ روز جاے

٭٭٭٭٭

یاد پیوس
ڈولمت دوہ
زن وقتہ چہ کتابہِ منز
ہکریومت
بے رنگ گلاب
یمۍ کتابہِ ہندۍ دوشوے ورق
داغدار
کرۍ متۍ ٲسۍ

قدم تُلن
زن خستہ مکانس چل نیرتھ ژلۍ
سورے اوند پوکھ گوس
تنگ
انہِ گٹیک مشک ژاس نکوارین
سوچ اوسس پلو کران
تتھ سارۍ سے کن
یس غیب اوس
موجود موجود ٲستھ

٭٭٭٭٭

پگاہ کیا بنہِ؟
بیہ نور اچھ آیس وٹنہ
زن شرم دار کیکر پوش
اتھہ لگنہ بند گوو
دور تہ نزدیک
کہنی آس نہ بوزنہ
آوازہ آسہ واپس نیران
پننین آلین
ژھوپہ ٲس ژیر تام
دہکۍ پاٹھۍ
ہیور ہیور کھسان
رٲژ ہند سایبان بٔنتھ
گاشہ روستس وقتس
رٲچھ در

نبض اوس کنن منز حیران
پگاہ کھسیا آفتابہ
کنہ نہ؟