کامل صابن اکھ خوبصورت بٲتھ۔ جدیدیت کس شورس منز چھہ یتھۍ چیز زن نہ لبنے یوان۔ یہ اوس کامل صٲبن زندگی ہندِ آخری ؤریک ٹوٹھ بٲتھ، وجہ چھیہ پتہے۔
گیت
(امین کامل)
سورنہِ ہو لٔج راتھ
وندیو گاش وۅلو
وزِ وزِ کورتھم وعدہ ژیہ میونے
پدِ پدِ روزی ساتھ
ادہ کوہ ژولہم منز وتہِ ترٲوتھ
کِتھہ لسہ، کۅسہ چھیم باتھ
سورنہِ ہو لٔج راتھ
وندیو گاش وۅلو
لولچہ وتہِ اندہ وندہ ازتامت
کمۍ کس دیتمت ساتھ
گلہِ زیو کٔرتھم، بادمۍ چشمن
لجمژ چھیم وہراتھ
سورنہِ ہو لٔج راتھ
وندیو گاش وۅلو
اکہِ اکہِ گگنچہ ویسہ گرہ سکھریۍ
کنۍ زنۍ روزس پاتھ
از چھیہ نہ کنہِ اندہ کانہہ وتہ زاگے
سیدِ برہ وۅلہ از وات
سورنہِ ہو لٔج راتھ
وندیو گاش وۅلو
(لوہ تہ پروہ، صفحہ 44-43)
ونان کیہہ تام/ منیب الرحمن سند ادبی تہ غیر ادبی بلاگ 
تبصرہ کریں