سام، دستان،رستم

نذیر آزاد چھہ پننہِ  کتابہِ منز رسول میر سند اکھ شعر یتھہ پاٹھۍ دوان

در جنگ کران کارِ خنجر دستِ رنگیں چانۍ
ہم پنجہ دستاں چھی نہ رستم سام نگارو

ٹینگ تہ شاد چھہِ  غزلہ کس متنس منز "چھی” بدلہ "چھُے” دوان۔ نذیر آزادن کتہِ اۆن یہ "چھی”؟ یہ چھہ دراصل امۍ ٹینگ سندِ کلیات کہ دیباچہ منزہ تلمت۔ ٹینگن چھہ نہ کلیاتک متن پانہ یکجا کۆرمت بلکہ چھیہ بقول کامل بیۍ سنز کٲم پننہِ ناوہ کرنہ آمژ۔ لہذا چھہ متنس منز "چھی” بدلہ ” چھُے” مگر دیباچس منز چھہ پنن "چھی” دوان۔

وۅنۍ ییلہ شعرس منز چھی آو، ہم پنجہ دستاں چھہ نذیر آزادس پریشان کران تکیاز رستم تہ سام چھہِ وۅنۍ ہم پنجہ دستاں۔ تہِ کیا گۆو تہِ معلوم کرنہِ چھہ سہ استادن نش گژھان۔ یم استاد کم چھہِ؟ یہ چھہ اسہِ کاشرین عادتھے زِ کانسہ ہند ناو ہیمو نہ (کیا جان گیوو اگر یمن استادن ہند ناو ہینہ آسہِ ہے آمت، کِنہ تمو اوسس ناو ہینس منع کۆرمت)۔ بہرحال، تم چھس ونان پنجہ دستاں چھہ تتھے پاٹھۍ پنجہ و دستاں یتھہ پاٹھۍ دست و بازو چھہ۔ بقول نذیر آزاد معنی جفۍ تراونۍ۔ یہ/یم استاد ہیکن کانہہ تہِ ٲستھ مگر میہ چھہ پورہ یقین یہ استاد چھہ ٹینگ بییہ نہ کانہہ، تکیازِ ٹینگ نے چھہ ہم پنجہ دستاں پتہ چھی دیتمت۔ چھی یا چھے برونہہ یم تہ لفظ مصرعس منز چھہِ تم چھہِ متعلق فعل بنان، رستم تہ سام چھہِ فاعل۔  لہذا چھہ یم کردار مخاطبس سیتۍ "ہم پنجہ دستاں”۔

ٹینگ چھہ کلیاتس پتہ کنہِ فرہنگ دوان یتھ منز سہ سام سند ناو دوان چھہ مگر نہ چھہ پنجہ و دستاں دوان تہ نہ ژھورے دستاں۔ رستم تہِ چھہ دوان، مگر دستاں چھہ نہ دوان تکیازِ تمس تہِ چھہ نہ معلوم اوسمت زِ یہ دستاں کیا بلایہ چھیہ۔ نتہ اگر امہِ شعرکۍ رستم تہ سام دتِن یم سارنے ویدۍ چھہِ، دستاں کیازِ دیتن نہ؟ سیزے کتھا چھیہ زِ ٹینگن چھہ دستاں لفظک مطلب دست لفظک جمع نمت، یۅس عام کتھ چھیہ۔

ٹینگس چھہ نہ معلوم زِ یہ رسول میرن دستاں چھہ نہ ژھورے دست لفظک جمع بلکہ تمہ علاوہ تہِ معنی تھاوان؟ (معلوم نہ آسن چھہ نہ کانہہ گناہ۔) دستان لفظک معنی چھہ شاد پننس کلیات رسول میرکس فرہنگس اندر دوان۔ مگر سہ چھہ نہ خالص دستاں دوان بلکہ "رستمِ دستاں”۔  معنی چھس ونان رستم سند مول دستاں یمس زال تہِ ونان ٲسۍ۔ صحیح چھہ مگر یہ "رستم دستاں” کتہِ چھہ رسول میرن ورتومت تہِ آو نہ میہ اتھہِ، البتہ ہم پنجہ چھہ شادن ٹینگ سندۍ پاٹھۍ نظر انداز کۆرمت شاید امہ کنۍ زِ ہم پنجہ ترکیب چھیہ نہ معنی یچ محتاج۔ ٹینگ تہِ چھہ نہ یہ ترکیب فرہنگس منزدوان۔ وۅنۍ مانہو زِ ٹینگن تہِ چھہ نہ ہم پنجہ فرہنگس منز امہ کنۍ دیتمت تکیازِ یہ ترکیب چھیہ نہ معنی یچ محتاج، مگر تمۍ سندِ چھی پتہ چھیہ وۅنۍ پورہ ترکیب "ہم پنجہ دستاں” پتھ کن روزان۔ سۅ چھیہ معنی طلب تکیاز ہم پنجہ دستاں چھہ نہ کانہہ محاورہ۔ رسول میر ما گۆو غلط زبان لیکھن وول گونمات چاہے سہ پتہ فارسی یی ٲسۍ تن۔

شاد چھہ اتھ شعرس صحیح پاٹھۍ ووتمت۔ دستاں، رستم تہ سام چھہِ ترین پہلوانن ہندی ناو۔ سام سند نیچو دستان، دستان سند نیچو رستم۔

نذیر آزاد چھہ ونان زِ شادن چھہ دستان لفظک مطلب رستم سند مول دیتمت تہ ڈکشنری منز تہِ چھہ یی، مگر پنجہ و دستان چھہ نہ رد کران حالانکہ تتھ چھیہ نہ نامعلوم استادن الگ ڈکشنری کانہہ مدد کران۔ اگر پنجہ و دستان کانہہ محاورہ آسہِ ہے یتھہ پاٹھۍ دست و بازو چھہ، تیلہ آسہِ ہے یہ کُنہِ ڈکشنری منز ضرور۔

ٹینگ سندس کلیاتس منز چھہ مصرعہ یتھہ پاٹھۍ
ہم پنجہ دستاں چھے نہ رستم و سام نگارو (نہ چھہ نہ زبر ہیتھ بلکہ کاشر زیر ہیتھ یعنی نہٕ)

شاد سندس کلیاتس منز چھہ مصرعہ یتھہ پاٹھۍ
ہم پنجہ دستاں چھے نہ رستم، سام نگارو  (نہ چھہ نہ زبر ہیتھ بلکہ کاشر زیر ہیتھ یعنی نہٕ)

دۅشوے پاٹھ چھہِ صحیح تہ تہ غلط تہ تکیاز دوشونی منز چھہ نہ کاشر زیر ہیتھ یعنی نہٕ۔ آسن گژھہ نہ (زبر ہیتھ)۔ فارسی یس منز چھہ "ہم پنجہ” محاورہ تہ معنی چھس لیکھتھ ہم زور، ہم نبرد، ہم آورد۔  یعنی جنگس منز چھے نہ دستاں، نہ رستم نہ سام برابر۔ نظامی سند شعر چھہ

نہ با شیری کسی را رنجہ دارد
نہ از شیران کسی ہم پنجہ دارد

امی سے شاعر سند بیاکھ شعر چھہ

بہ ہم پنجگی پیل را بشکنم
شہ پیلتن بلکہ پیل افکنم

یہ لیکھ اند واتناونہ برونہہ یم کتھہ:
پنجہ و دستاں چھہ اتھ مصرعس بے آہنگ بناوان، پنجہ ء دستاں تہِ چھہ اتھ بے آہنگ بناوان۔ اتھ وزنس منز چھہ اتہِ نس صرف پنجہ دستاں کُنہِ اصافتہ ورٲے صحیح بیہان۔ لہذا چھہ نہ پنجہ "دستان” لفظس سیتۍ بلکہ "ہم” لفظس سیتۍ تکیاز "ہم پنجہ” چھہ محاورہ۔

ہم دست تہِ چھہ محاورہ، ہم دستاں/ہم داستاں تہِ چھہ محاورہ یمن ہند نہ اتھ مصرعس منز کانہہ جواز چھہ۔ مگر "ہم پنجہ دستاں” چھہ نہ کانہہ محاورہ۔

قاآنی سند اکھ خوبصورت شعر چھہ

خواہی کہ حنا بندی بر کف قدحی گیر
تا سرخ کند عکس میت پنجہ و دستاں

اتھ شعرس منز چھہ نہ پنجہ و دستاں محاورہ رنگۍ بلکہ لغوی معنیس منز اتھہ تہ اونگجہ۔  سلمان ساوجی سند شعر چھہ

بازوی او گاہ بزم با زوی رستم ببست
پنجہ او روز زور پنجہ ء دستاں شکست

اتھ منز چھہ پنجہ ء دستاں مطلب صاف پاٹھۍ رستم سند مول زال۔

پنجہ دستاں کُنہِ اصافت ورٲے چھہ نہ مستعمل۔

شعرس منز چھہ رنگینس مقابلہ سام یمیک معنی سام کردارس سیتۍ سیتۍ کرہن تہِ چھہ یتھہ پاٹھۍ ہندوستانس منز شیام چھہ۔ دست بمقابلہ پنجہ، خنجر بمقابلہ پنجہ لفظن ہند انتخاب چھہ شعرس دلچسپ بناوان۔

اند: محاورہ چھہ نہ "پنجہ و دستاں” بلکہ "ہم پنجہ”۔ اگر پنجہ و دستاں کنی ترکیب مانون، "ھم” لفظ کتھ حسابس تھاوون؟

کاشرین شاعرن منز چھہ نہ فارسی زانن وول رسول میرس مقابلہ کانہہ اوسمت۔ امس چھہ فارسی محاورس پیٹھ زبردست عبور اوسمت۔

نیرۍ پوشک نۆو شمارہ

کینژھا صحتہ چہ خرابی تہ کینژھا معاشی پریشانیو کنۍ چھس بہ وونۍ واریاہ کالہ پیٹھہ فیس بکس تہ روشۍ روشی وچھان، بلاگ تہ رود طاقچس پیٹھ، پرن لیکھن تہِ چھہ بند۔ نہ چھیہ اورچ خبر کانہہ، نہ یورچ۔ مگر اکھ سیٹھا خوش گوار خبر وٲژ زِ الطاف اندرابی صابنس نیرۍ پوش رسالس دراو تازہ شمارہ۔ یہ رسالہ چھہ منزۍ منزۍ سہی پاکستانہ آزاد کشیرِ پیٹھہ برابر نیران۔ معاصر کاشرین رسالن منز چھہ یہ رسالہ تواتر کہ رنگہ تہ معیار کہ رنگہ اکھ سیٹھا رت اضافہ، بلکہ ونہ بہ زِ  یوتاہ خۅش یون رسالہ چھہ ہندوستانۍ کشیرِ منز خالے نظرِ گژھان۔

الطاف صابنۍ رسالہ کہ تعلقہ محنت تہ کاشرِ زبانۍ تہ ادبس سیتۍ یہند لول چھیہ نہ کانہہ کھٹتھ کتھ کشیرِ ہندس اتھ اندس منز روزتھ کاشرس ادبس لول برن، مواد جمع کرن تہ کمپوز کرناون، پروف پرن تہ پرنٹ کرناون چھیہ نہ سہل کتھ۔ یم چھہِ شابشی ہندۍ مستحق۔

نیرۍ پوش رسالہ چھہ ہمیشہ پنن اکھ الگ انہار ہیتھ برونہہ کن یوان۔ اتھ سلسلس منز کرۍ امۍ معیارہ رنگۍ واریاہ منزلہ طے۔ ادبک کانہہ تہِ انہار ٲسن معیار گژھہِ نہ بالاے طاق تھاون۔ یہ میزان قایم کرن چھہ نہ سہل۔ امہ رنگہ چھہ الطاف اندرابی صاب بالغ نظری ہند ثبوت دوان۔ ازکس شمارس منز شامل مضمون، افسانہ، نظم و نثر، تمام چیز چھہِ اکہ صحت مند تہ باگہ برتہِ ادبچ خبر دوان۔ اتھ منز چھہ بزرگ ادیبن تہِ جاے شیرنہ آمژ تہ نوجوانن تہِ۔ کشیرِ ہندِ یمہ طرفہ کین ادیبن تہِ تہ ہمہِ طرفہ کین ادیبن تہِ۔ یہ چھہ سانہِ معاصر ادبک اکھ مکمل ٲنہ۔

الطاف اندرابی چھہِ پانہ اکھ رت ادیب۔ یم چھہ شاعری تہِ کران تہ فکشن تہِ لیکھان یمکۍ نمونہ نیرۍ پوش کس یتھ شمارس منز "ویتھ روزِ پکان” نظمہِ تہ ڈراما "وۅستہ گل گبہ ساز”چھہِ۔

یم چھہِ میانۍ پاٹھۍ کاشرِ ادبہ چہ سرگرمی ہندِ مرکزہ نشہِ ہنا دور مگر یس دنیا یمو اتہِ پننیو ذاتی کوششو سیتۍ آباد  کۆر تمہِ بنیوو کشیرِ ہند یہ اند اکھ نۆو مرکز۔ میہ چھیہ وۅمید کشیرِ، کاشرس کلچرس تہ ادبس سیتۍ دلچسپی تھاون والۍ برن اتھ رسالس تہ الطاف صابنین کوششن لول۔

رسالہ منگنٲوو تہ پٔریو۔

بلبل ہزار دستان

رسول میر سند اکھ شعر چھہ

مارۍ بلبل ہزارہ
چانۍ زیرو بمن بمن
ونتہ رۆسلہِ زارہ پارہ
یارہ  یِتہ بمن بمن
(کلیات رسول میر، ٹینگ اصل ہاکر)

مارہ کرۍ بلبل ہزارہ چانۍ زیرو بمن بمن
بوز رۆسلس زارہ پارہ یارہ  یِتہ بمن بمن
(کلیات رسول میر، شاد)

یمن دۅن پاٹھن منز چھیہ اکھ فرق "مارۍ/مارہ کرۍ” مگر یہ چھیہ نہ بٔڈ فرق۔ مطلب چھہ کنوے۔ بیاکھ فرق چھیہ "ونتہ رۆسلہِ/ بوز رۆسلس”۔  دویم فرق چھیہ بٔڈ فرق۔ یہ کرِ شعرس معنی تبدیل۔ معنی بیان کرنۍ چھہ نہ ضروری۔ توہۍ ہیکو پانہ تہِ کوشش کٔرتھ۔ میہ آو نہ از تام یہ سمجھ اگر زہ شخص اکوے نسخہ پران چھہِ، فرق کپارۍ؟ اگر نسخن منز مختلف پاٹھ درج چھہِ یم کونہ تم سٲری پاٹھ دوان؟  خیر یہ کتھ تراوۍ تو اتۍ نے۔

ٹینگ چھہ "بلبل ہزارہ”  لفظن پیٹھ نشان ترٲوتھ نوٹ لیکھان یتھہ پاٹھۍ:

"بلبل ہزار داستان۔ بیاکھ معنی۔ ساسہ بدۍ بلبل”

یہ کتھ تہِ تھاوۍ تون اتۍ نے۔ میہ چھیہ بدل کتھ کرنۍ۔ بلبل گۆو خۅش الحان جاناوار۔ کشیرِ منز یس اسۍ بلبل ونان چھہِ سہ چھہ ژھوگ کٔرتھ تہ لچہِ تلہ کنہِ وزل رنگ کٔرتھ آسان۔ امس چھہ باقی جاین، ہند و ایران تہِ بلبلے ونان۔ امس چھہِ  اسۍ بلۍ بچر تہِ ونان۔

بیاکھ اکھ تقریبا امۍ سے برابر جاناوارس تہِ چھہ بلبل ونان۔ فارسی تہ اردو دۅشونی تہ باقی زبانن منز تہِ۔ امس چھہِ فارسی پاٹھۍ ہزار تہِ ونان۔ ہزار علاوہ چھہِ امس ہزار دستان تہ ہزار آوا تہِ ونان۔ انگریزی پاٹھۍ نایٹ انگیل۔ یہ جاناوار چھہ رنگہ رنگہ آوازہ کڈان، خاص کر راتھ کیت۔ یمو رنگہ رنگہ آوازو سیتۍ چھہ امۍ سند نغمہ مسحور کن بنان۔ امی چھہ امس شاید ہزار دستان ناو پیومت۔ دستان گۆو  سرود، نغمہ، لحن۔

رسول میر چھہ ونان بلبلِ ہزارہ مطلب اے ہزار بلبلہ۔ یعنی امس خاص بلبلس کُن مخاطب۔ ہتا ہزار  دستان بلبلہ چانۍ زیرو بمن ہا مارۍ۔

ممکن چھہ ٹینگ یا بییہ کانہہ قاری ما کڈِ اتھ یتھہ پاٹھۍ معنی؛ چانۍ زیر وبمن ہا مارۍ ساسہ بدۍ بلبل۔ امی چھہ سہ بیاکھ معنی ساسہ بدۍ بلبل ونان۔

بلبل ہزارہ گۆو نہ ساسہ بدۍ بلبل۔  بہ زن مانہ نہ ٹینگ سند یہ معنی مگر مانن والی چھہ واریاہ ۔ ایک ڈھونڈو ہزار ملتے ہیں۔

ونن چھم زِ ٹینگ سند نوٹس منز بلبل ہزار "دستان” بدلہ بلبل ہزار "داستان” کتہِ آو؟ فارسی زبانۍ منز چھہِ نہ امس ہزار داستان ونان بلکہ ہزار دستان۔ داستان گیہ حکایت، دستان گۆو لحن، آواز۔

دراصل چھہ  اردوس منز امس جاناوارس بلبل ہزار داستان ونان۔

فیروزللغاتس منز چھس معنی لیکھتھ خوش بیان، شرین کلام۔ بییس جایہ چھہ بلبلس معنی دتھ: ایک نہایت خوش آواز پرند، ہزار داستان۔ دستان لفظس چھہ الگ پاٹھۍ معنی دوان: نغمہ، آواز۔

کاشرِ ڈکشنری منز تہِ چھہ ہزار داستان دتھ تہ معنی لیکھتھ آسمانۍ جانور یُس واریاہ قسمہ بولہِ کران چھہ۔

اما اردو والیو کتھہ پاٹھۍ بلبل ہزار دستانس بلبل ہزار داستان کۆرمت؟

دراصل چھہِ فارسی زبانۍ منز داستان لفظس دستان تہِ لیکھان ٲسۍ متۍ۔ دستان چھہ داستان کے  مخفف۔  مگر سہ چھہ حکایت وول دستان، لحن، آہنگ وول دستان چھہ الگ لفظ۔ اردو والین چھہ یہ مغالتہ گۆمت۔ کس تام گمژ غلطی، پتہ تتھۍ تقلید سپدمت۔

رسول میر چھہ  بلبلِ ہزارس پتہ کنہ /ہ/ حرف لگاوان مخاطب کرنہ مۅکھہ۔ یتھہ پاٹھۍ منیب پیٹھہ منیبہ بناونہ ییہِ۔ منیبہ ژیہ کٔرتھ اسۍ مارہ۔

رسول میر چھہ ونان "ہے ہزار دستان بلبلہ چانۍ زیر و بمن مارۍ اسۍ  (ٹینگ) /کرۍ اسۍ مارہ(شاد)

یہ تہِ چھیہ حقیقت زِ کاشرۍ شاعر چھہِ قافین نش ہزار تہ ہزارہ، بہار تہ بہارہ لفظن ہنز فرق مشراوان، لہذا ہیکو نہ حتمی طور ونتھ زِ اتہِ نس کیا نیرِ نہ معنی ساسہ بدۍ بلبل۔ کڈۍ تن کانژھا اگر تی معنی کڈن چھہ۔

تلہ کنہِ ٲس کتھ دستانچ (آہنگ)، اتھۍ بنٲو میہ داستان (حکایت)

 

پان دپان چھی

نذیر آزادس یہ کینژھا رسول میرنہِ شاعری منز میلان چھہ سہ چھہ تتھ یکدم اردو شاعرن، ہندوستانۍ کلچرس، میر تقی میرس سیتۍ جوڑان۔ لیکھان چھہ:

"رسول میرن چھہ ہندوستانۍ کلچرک اہم عنصر ‘پان’ تشبیہہ رنگۍ استعمال کورمت یتھہ کنۍ یہ لفظ اردو میرن چھہ بییس تناظرس منز ورتوومت۔
رسول میر:
وٹھ چانۍ وۅزلۍ لعل یمن نتہ بدخشان
یم پانۍ پانس رتہ رنگۍ متۍ پان دپان چھی
میر تقی میر:
بیڑے کھاتا ہے تو آتا ہے نظر پان کا رنگ
کس قدر ہائے رے وہ جلد گلو نازک ہے”

نذیر آزاد چھہ دراصل محمد یوسف ٹینگ سنزے کتھ برونہہ پکناوان۔ ٹینگ چھہ ونان:

"رسول میر چھہ عجمی مزازہ باوجود ۔۔۔ ہندوستانۍ دیو مالا تہ تواریخ منز مناسب استعارہ تہ علامژ پہہ اننس منز چھہ نہ کانہہ واے کران ۔۔۔ ‘پان’ لفظک یہ استعمال چھہ نہ کاشرِ شاعری منز تس برونہہ ظاہر کانسہ کورمت۔”

یمن دۅشونی حضراتن کُن چھہ عرض زِ محض یمہ کنۍ ز پان چھہ ہندوستان کہ کلچرک حصہ ہیکو نہ اسۍ ؤنتھ زِ رسول میر کیا اوس ہندوستانۍ شاعرن، میر تقی میر سندین شعرن ہندس پس منظرس منز شعر ونان۔ رسول میر سنزِ شاعری ہند پوت منظر چھہ دراصل فارسی (ایرانی) شاعری۔ یہ پان تہِ چھہ رسول میرن تورے اونمت۔ پان چھہ فارسی شاعری منز تشبیہی تہ استعاراتی لفظیاتک حصہ اوسمت یس رسول میرس برونہہ کنہِ اوس۔ مثلا:

چمن از پان گزیدنت رنگین
غنچہ چون بشکفد گرفتہ اگال
(ظہوری ترشیزی)

یہ وچھوا، پانے اوت نہ بلکہ چھن ہندی لفظ اگال تہ ورتومت۔ وچھو یم تشبیہہ:

بوی گلزار شہادت ہر کہ را بیتاب کرد
چون لب پان خوردہ می بوسد دہان شمشیر را
(صائب تبریزی)

از بہر سرخی لب زخم عدوی او
کافی بود شباہت پیکان بہ برگ پان
(طالب آملی)

نذیر آزاد سند یہ بیان زِ "رسول میر سنزِ شاعری چھیہ سۅ ادبی روایت ڈکھس یۅسہ کینژن نقادن ہندِ مطابق ‘ہند اسلامی کلچرن’ تہ کینژن ہندِ مطابق ‘ہند عرب ایرانۍ کلچرن’ پھانپھلاومژ (چھیہ)” چھہ غلط۔ رسول میرس اوس نہ اوڈ مصرعہ تہِ سیود اردو پاٹھۍ لیکھن تگان، سہ کپارۍ اوس اتھ روایتس فایدہ تلان۔ سانین نفادن یُس اڈگۆر مڈگۆر اردو رسول میرنین کینژن شعرن منز نظرِ گژھان چھہ، سہ چھہ دراصل پنجابۍ یتھ سیتۍ کاشرین اکھ متواتر تعلق اوس۔

یہ تہ چھہ سوال ز رسول میر سندس شعرس منز چھا پان مطلب کھینہ وول پان کنہ جسم، یا سیلف۔

چھے تاج حسنک باج برے

 

نذیر آزاد چھہ رسول میر سندِ اکہ شعرہ کہ تعلقہ  لیکھان:
"بلکہ اوس سہ (رسول میر) تمن لفظن ہند تہِ علم تھاوان یم زہ تہذیبہ رلنہ کس صورتس منز لسانی لین دین کس اصولس تحت فاتح قومہ چہ زبانۍ پیٹھ مفتوحن ہنزِ زبانۍ منز داخل چھہِ گژھان۔ مثلا انگریزۍ لفظ officer اوس تمنے دۅہن لسانی تصرفات  کس اصولس تحت ییتہ چہ تبدیلی سیتۍ "افسر” بٔنتھ اردو زبانۍ منز داخل سپدمت تہ بہادر شاہ ظفر ہوۍ شاعرن اوس ورتوومت
یا مجھے افسر شاہانہ بنایا ہوتا
یا مرا تاج گدایانہ بنایا ہوتا
تہ یوہے لفظ چھہ رسول میر یمہ آیہ شعرس منز استعمال کران
چھے تاج حسنک باج برے راج میہ چھم چون
معشوقہ شبان حسنہ گنجس چھے ژیہ افسری”
(نادر سخن گو، نذیر آزاد)

یمن دوشونی شعرن منز افسر لفظ انگریزی لفظ آفیسر قرار دتھ چھہ نذیر آزاد یمن دۅشونی شعرن مۅلہ والان۔ چونکہ بہادر شاہ ظفر آو معطل کرنہ لہذا چھہ لوکھ اتھ شعرس معمولی تہ واقعاتی معنی کڈان یمیک شکار نذیر آزاد تہِ گۆمت چھہ۔ حقیقت چھیہ یہ زِ یمن دۅشونی شعرن منز چھہ نہ افسر انگریزی لفظ آفیسرچ مقامی شکل بلکہ چھہ یہ قدیم پہلوی لفظ یُس ایرانۍ شاعری منز یسلہ ورتاونہ آمت چھہ۔ امہ لفظک معنی چھہ تاج، کلاہ پادشاہی۔ انگریزی یس منز چھہ یہ لاطینی زبانۍ کہ طرفہ آمت (officium/opificium)۔ یہ آسہِ ہند آریایی لفظ۔ فردوسی چھہ تاج تہ افسر دۅشوے لفظ اکی سے شعرس منز ورتاوان:

جز افسر کہ ہنگام افسر نبود
بدان کودکی تاج درخور نبود
(فردوسی)

وچھوکھ افسر کہ ورتاوکۍ یم پرانۍ فارسی شعر:

بر سرش بر نہاد افسر ملک
زانکہ دانست کیست درخور ملک
(سنایی)

کند را بہ افسر گرامی کند
بدین سر بزرگیش نامی کند
(نظامی)

ز خواب خوش گران شد افسر شاہ
چو خم شد بر کف شب ساغر ماہ
(سلمان ساوجی)

مجازا چھہ افسر حاکم کس معنی یس منز تہِ فارسی شاعری منز ورتاونہ آمت۔

بدو مہراب گفت اے افسر روم
بتو آباد باداین کشور بوم
(سلمان ساوجی)

ظفر سندس شعرس منز چھہ استعاراتی بیان۔ دپان چھہ یا آسہِ ہتھس بہ حاکم بنوومت یعنی سہ تاج یس شاہن چھہ وۅڈِ آسان، نتہ آسہِ ہتھ میون تاج فقیرن ہند تاج بنوومت۔ اکھ فارسی شاعر چھہ ونان

بندہ حضرت شاھی شدم از دولت عشق
کہ گدایان درش افسر شاہانہ زدند
(فروعی بسطامی)

علامہ اقبال چھہ واضح پاٹھۍ ونان

اگرچہ زیب سرش افسرو کلاہی نیست
گدای کوی تو کمتر ز پادشاہی نیست

اردو شاعر شاہ نصیر سند بنم شعر چھہ بہادر شاہ ظفر سندس شعرس مکمل طور واضح کران

کم نہیں ہے افسر شاہی سے کچھ تاج گدا
گر نہیں باور تجھے منعم تو دونوں تول تاج

رسول میر سند شعر چھہ عرفانک شعر۔ امہ شعرہ کس افسری لفظس انگریزی لفظہ کس عام مفہومس سیتۍ واٹھ دتھ چھہ یہ شعر مضحکہ خیز بنان۔ یہ شعر سمجھنہ خاطرہ پریوکھ یم شعر:

سزد اگر ہمہ دلبران دھندت باج
تویی کہ بر سر خوبان کشوری چون تاج
(حافظ شیرازی)

از ہمہ ترکان ستاند ہندوی چشم تو دل
از ہمہ شاہان گرفت شعنہ حسن تو باج
(محتشم کاشانی)

باج برن گوو خراج دین، بڈۍ پادشاہ ٲسۍ لۅکٹین بادشاہن مغلوب کران تہ تمن نش باج حاصل کران۔

راج میہ چھم چون یعنی بہ چھس مغلوب

گنج گۆو خزانہ سیم زر (خاص کر یس ژورِ آسہِ)

افسری گۆو مطلب تاجداری، صاحب افسری۔ تاجدار گۆو پادشاہ یمس نش تاج آسہِ۔

یہ عاشق (مثلا زنانہ، سمجھنہ خاطرہ) چھیہ ونان زِ بہ دمے پننہِ حسنک باج ژیہ تکیازِ ژیہ کٔرتھس بہ مغلوب۔ یعنی میون حسن چھے ژیہ خراج۔ تکیازِ ژیہ نش چھہ حسنہ گنج (حسنک خزانہ یُس نہ ظاہر یا ظاہری چھہ) تہ یہ تاج (میانہِ حسنک تاج) شبی دراصل ژیی۔ اکھ لۅکٹ بادشاہ یتھہ پاٹھۍ مال و زر بڈس پادشاہس باج کس صورتس منز دوان چھہ۔

حسنہ گنج یعنی گپتھ حسن۔ یہ چھہ نہ معشوق سند ظاہری حسن بلکہ حسن مکنونہ۔ عاشق صادقس یعنی پزس عاشقس چھہ نہ ظاہری (پیٹھۍ پیٹھۍ) حسنس منز کانہہ لطف یوان۔

رسول میرن چھہ افسر (اسم) لفظس بییہ قسمک اسم بنوومت یعنی افسری (اسم صفت)۔

 

محقق سنز غلطی تہ محقق سندۍ ترت

غلطی

ناجی منور چھہِ کلیات محمود گامی یس منز "شیرین خسرو” مثنوی ہندس متنس منز اکھ شعر یتھہ پاٹھۍ دوان:

شفیقا خاصہ اوسس ناو شاپور
بخلوت محرم اسرار مستور

شاپور ناوس تل چھہِ اکھ نوٹ یتھہ پاٹھۍ دوان:

"(1) نظامی ین چھہ پننہِ کتابہِ منز "شاور” لیوکھمت، قلمی نسخس منز تہِ چھہ شاور لیکھتھ۔”

مثنوی منز چھہ متنس اندر ناجی گوڈنکس حصس منز شاپور دوان، البتہ چھہ پتمس حصس منز شاپور بدلہ شاور دوان۔ اتھ حصس متعلق چھہ ناجی ونان زِ تم ستہ ہٲٹھ شعر چھہ اڈلیکہِ قلمی نسخہ پیٹھہ نقل کرنہ آمتي۔

ناجی یس چھہ کیاہ تام مغالتہ گومت۔ نظامی سنزِ مثنوی منز چھہ نہ کُنہِ جایہ شاور دتھ بلکہ چھہ شاپور دتھ۔ سے اوس ناو خسرو سندس خاص دوستس۔ یہ شاور کتہِ آو یہ چھہ نہ معلوم۔ ناجی ین کتھ کتابہِ منز چھہ شاور وچھمت، حالانکہ نظامی سنز مثنوی آسہِ یمو پانہ وچھمژ۔

اڈلیکہِ نسخک شارو ہیکہ کاتب سنز غلطی ٲستھ، میہ چھہ باسان یہ لفظ آسہِ کاتبن کنہ بوزمت۔ شاپور بدلہ آسین شاور بوزمت۔

نظامی سنزِ مثنوی منز چھہ یہ ناو گوڈنی اتھۍ شعرس منز یوان یمیک ترجمہ محمود گامی ین کورمت چھہ:

ندیمی خاص بودش نام شاپور
جھان گشتہ ز مغرب تالھاور

ناجی چھہ محقق۔ اگر یژھہ غلطی محققن گژھن، اسہِ مقلدن کیا بنہِ۔

 

ترت

محمد یوسف ٹینگ چھہ اتھ کلیات محمود گامی یس عرض ناشرس منز ونان:

"میانہِ تحقیقہ موحب کٔر تمۍ (محمود گامی ین) فارسی زبانۍ ہنز اکھ مثنوی گوڈنچہ لٹہِ کاشرۍ پاٹھۍ ترجمہ تہ پتہ بۆرن پننہِ زبانۍ ہند ہلم امہ شاندار زبانۍ ہندیو گوہر پارو سیتۍ۔”

یا تہ چھہ نہ یہ جملہ لیکھن تۆگمت۔ حالانکہ کتھ چھیہ نہ فلسفیانہ ز نثر لیکھنس ییہ دقت، نتہ چھہ یہ ٹینگ سند مضحکہ خیز تحقیق۔ اکہ طرفہ چھہ ونان "میانہِ تحقیقہ موجب” یعنی تحقیق چھن کۆرمت تہ بییہ طرفہ چھہ ونان "اکھ مثنوی” یعنی یہ چھیہ نہ پتاہ کۅس مثنوی چھیہ۔  کِنہ یہ چھیہ بلۍ گیلا برونہہ کُن تراومژ تاکہ ینہ خلق ونن زِ محمود گامی یس پیٹھ چھہ صرف ناجی ین تحقیق کۆرمت، تہِ چھہ میہ (ٹینگن) تہِ کۆرمت۔

 

مثنوی ین ہنز گرند

ناجی منور چھہ کلیات محمود گامی یس منز داہ (10) مثنوی دوان۔ امہ برونہہ چھہ رسول پونپر اکس مضمونس منز ونان ز محمود گامی ین چھیہ ٲٹھ نو مثنوی لیچھمژہ۔ امہ برونہہ چھہ محمود احمد اندرابی اکس مضمونس منز لیکھان ز محمود گامی ین چھیہ نو مثنوی لیچھمژہ۔ گویا ناجی منور چھہ کلیات کس دویمس ایڈیشنس منز اکھ مثنوی ژرے دوان۔ مگر کلیات کہ امہ ایڈیشنہ برونہہ چھہ شفیع شوق اکس مضمونس منز ونان ز محمود گامی ین چھیہ کاہ (11) مثنوی لیچھمژہ۔ میہ باسان شوقن چھیہ ٹینگ سنز یہ "تحقیقہ موجب” "اکھ مثنوی” تہِ شمارس تھاومژ، نتہ زن گوژھ سہ پننسے بٲیس پژن۔ حالانکہ "کاشر ادبک تواریخ” کتابہ منز چھن یمن ہند تعداد داہے (10) وونمت۔

 

 

یتھے ما راوِ قرار

 

اوس کیا تہ کوت گوو؟  یوت تام نہ پتاہ لگہِ
پریتھ چیزس نکھہ چھہ بیاکھ چیز روومت باسان
دارِ نش کژتام ژونٹھۍ ٲسۍ  مگر اکھ چھہ غیب
پرژھومکھ یہ بیاکھ ژونٹھ کوت کوروون
وۅشلیہ، پھورکھ نہ جواب

ڈل بٔٹھس پیٹھ ٲسۍ تریہ یار چکرس نیران
مگر از چھہ اکوے پانسے سیتۍ زنتہ روومت
مون بیاکھ چھہ آور، ترییم کوت گوو؟

سڑکہِ پرژھوم تسندۍ پدۍ نشان کتہِ تھٲوتھ
رب آیس متھنہ
نبس پیٹھ ٲس تارکھ مال ونوان
سٲری چھہ پننہِ پننہِ جایہ  تتھے پاٹھۍ یتھہ پاٹھۍ ٲسۍ
مگر ہتہِ ییتہِ چھہ کانہہ کانہہ تارکھ توتہِ کم باسان
گاشس پرژھوم ژیہ ما کانہہ زژ رٲومژ
اوبرہ لنگس تل کھوٹن پان

یتھے ما راوِ قرار!

(منیب الرحمن)

محفوظ شدہ: audio

یہ مواد پاسورڈ سے محفوظ ہے۔ اسے دیکھنے کے لیے ذیل میں اپنا پاسورڈ درج کریں:

فیس بک مشاعرہ- جاری

جاری فیس بک طرحی مشاعرکی کینہہ غزل

رخسانہ جیبن

حامدی کشیمری

علی شیدا

رفیق راز

حبہ خاتون مسودہ، غایب شد!

غلام احمد مہجورن اوس وننہ کنۍ حبہ خاتون ناوہ اکھ کتابچہ لیوکھمت شاید 1951 منز۔ یہ اوس 190 صفحن ہند۔ کلیات مہجورس منز چھہ ٹینگ صٲب "مہجورنۍ تصانیف و تالیفات” ناوہ ساڈن ترین صفحن پیٹھ اکھ لسٹ دوان، مگر اتھ منز چھہ نہ یہ حبہ خاتون مسودہ شامل۔ میہ چھہ کامل صٲبس نش بوزمت یہ تمن اوس مہجور سندۍ زرۍ عبدالرشید صٲبن وونمت زِ سہ مسودہ اوس اکیڈمی ہندۍ سیکریٹری ین ابن مہجورس نش چھاپنہ خاطرہ نمت۔ مگر تمیک چھہ نہ اکیڈمی منز کانہہ نیال تہِ۔ امیک رسید چھہ تمن نش موجود۔

ابدال مہجور صابس آسن اتھ متعلق معلومات۔ جان گیوو تم اگر اتھ متعلق کینہہ ونہن۔ وچھن اوس زِ مہجورن کیا اوس اتھ کتابہِ منز حبہ خاتونہِ متعلق لیوکھمت۔ مہجور چھہ اکھ اہم شاعر تہ امۍ سند کانسہِ کاشرس شاعرس متعلق تحریر تہِ آسہ اہم۔

یہ مسودہ گۆو کۆت ٲخر؟