محمد یوسف ٹینگن چھہ کلیات رسول میرس زیٹھہِ زیوٹھ پیش لفظ لیوکھمت، یتھ منز واریاہ ترت وننہ چھہِ آمتۍ۔ کینژن ہنز نشاندہی چھیہ میہ پتمین پوسٹن منز کرمژ۔

اکس جایہِ چھہ ونان زِ رسول میرن چھیہ کینہہ عجمی تہ فارسی ترکیبہ حافظ، فردوسی تہ نظامی سندۍ پاٹھۍ ورتاومژہ۔ تقریبا اکس صفحس پیٹھ چھہ یمن ترکیبن ہند فہرست دنہ آمت۔ فہرستس منز چھہِ رستم، سام، جمشید تہ منصور ہوۍ لفظ۔ شاید آسہِ ٹینگ یمن سیدین سادن لفظن تہِ ترکیبن منز شمار کران۔ بہرحال، ٹینگ چھہ ژکہِ رسول میرنین فارسی غزلن منز ورتاونہ آمژن ترکیبن ہنز فہرست سازی صفحہ برنہ کہ غرضہ کران۔ یہ ونن زِ تمۍ  چھیہ یم ترکیبہ حافظ، فردوسی تہ نظامی سندۍ  پاٹھۍ ورتاومژہ چھہ ترت۔ کانہہ مثالا چھیہ دنہ آمژ  زِ یم ترکیبہ کتھہ پاٹھۍ چھیہ یمن ترین فارسی شاعرن ہندۍ پاٹھۍ ورتاونہ آمژہ؟ اتہِ نس چھہ سوال یہ تہِ زِ  کیا یم ترکیبہ چھا یمو ترییو فارسی شاعرو اکی طریقہ ورتاومژہ، کِنہ ٹینگ سند مطلب چھہ زِ یم ترکیبہ چھیہ حافظ تہ فردوسی تہ نظامی ین تہِ ورتاومژہ۔ اگر تی مطلب چھہ، کیا باقی کانسہ فارسی شاعرن چھیہ نا یم ترکیبہ ورتاومژہ؟ گیلہ مٲرتھ تمہِ وقتکۍ ادیب مرعوب کرنہ علاوہ گژھہِ نا کتھن کانہہ معنی آسن۔ ترکیبن ہندس فہرستس منز چھہ ماہتاب قندہار تہ آفتاب بلغار تہِ دنہ آمتۍ۔ میہ دی تو ہٲوتھ زِ حافظ، فردوسی، نظامی ہیتھ کمۍ فارسی شاعرن چھیہ یم ترکیبہ ورتاومژہ۔

ونان چھہ "(رسول میر) سندین یمن غزلن منز چھہ فارسی بحر تمہِ آیہ استعمال کرنہ آمتۍ ز یمن ہیکو اسۍ فارسی میزانہ کیو قاعدو سیتۍ تقطیع کرتھ۔”

یہ جملہ کوتاہ مضحکہ خیز چھہ۔ بحرہ نش چھہ امۍ سند مطلب اوزان، بحرس تہ وزنس درمیان کیا فرق چھہ، تہِ چھیہ نہ امس پتاہ۔ بہرحال، فارسی بحر چھا تمہِ آیہ تہِ استعمال کرنہ آمتۍ یمن نہ فارسی میزانہ کیو قاعدو سیتۍ تقطیع ہیکہِ گژھتھ؟ یہ منطق تھاوۍ تو اکتھ کن۔ مثالہ چھہ دوان زہ۔

• طفل اشکم را غمت گہوارہ جنباں اے صنم
  بحر رمل: فاعلاتن قاعلاتن فاعلاتن فاعلات

اتھ غزلس چھہ نہ ٲخری رکن فاعلات بلکہ فاعلن۔ خبر کمۍ تام چھس یہ غلط لیکھتھ دیتمت، ادہ امۍ تہِ تور تتھے پاٹھۍ۔ بیاکھ مثال چھن یہ دژمژ:

• دل بندہ دل آزار دل آرام نگارو
  بحر مضارع: مفعول مفاعیل مفاعیل مفعولن

گوڈنچ کتھ چھیہ یہ زِ اتھ وزنس تہِ چھہ ٲخری رکن غلط دوان۔ یہ چھہ نہ مفعولن بلکہ فعولن۔ دویم کتھ چھیہ یہ زِ یہ چھیی نہ مضارع بحرک وزن بلکہ ہزجک۔ یہ تہِ چھس کمۍ تام غلط لیکھتھ دیتمت۔

یہ گیہ ٹینگ سنز عروض دانی۔

کلیات مہجورس منز چھن لیوکھمت زِ مہجورن ورتاوۍ ژھوٹۍ وزن، حالانکہ مہجورنۍ ساری غزل چھہِ ٲٹھ رکنی وزنن منز، یم کُنہِ تہِ اعتبارہ ژھوٹۍ وزن چھہِ نہ۔ ٹینگ چھہ یتھوے مضحکہ خیز بیانو سیتۍ صفحہ بران۔ پرن والین چھیہ نہ اور کن نظر پلان تکیازِ تم چھہِ طرز تحریرن مرعوب کرۍمتۍ۔