ترین لفظن ہنز داستان

ییلہ میہ امین کامل سنز نٔو شعرہ سۅمبرن تیار کٔر، ٲخرس پیٹھ رود سوال امہ کہ ناوک۔ کامل صابن اوس نہ کانہہ ناو دیتمت، تکیازِ تمۍ ٲس نہ اتھ پانہ کانہہ کتابی شکل دژمژ۔ ییتہ ییتہ میہ یا تس کانہہ چیز اتھہِ آو بہ رودس ٹایپ کران۔ کتابہِ منز شامل شروعات چہ نظمہ یم 1970 دوران لیکھنہ آسہ آمژہ تہ نیب رسالس منز آسہ تمنے دۅہن چھپیمژہ، آسہ نہ کنہِ کتابہِ مںز شامل حالانکہ "پدس پود ژھاے” ٲس تمنے دۅہن چھپیمژ۔ تتھ منز ہیکہ ہن تم شامل گژھتھ۔ تم نظمہ یمن منز قصیدہ تہ چھہ کرِ میۍ اتھ کتابہِ منز شامل۔

بہرحال، پوتس اوس سوال کتابہِ ہندِ ناوک۔ کامل صابس پرژھنہ بجایہ خبر کیازِ لوگس بہ پانے سوچنہِ۔ مگر سیتی سوچم نہ کتاب چھیہ تسنز ناو تہِ تھاویس سے، ترتیب دنہ سیتۍ کیا گوو۔ میہ چھہِ یاد تمۍ سندۍ لفظ ییلہ میہ تس پرژھ۔ دوپن "تھاوس کینژھا”۔ میہ اوس گۅڈے ژیونمت زِ کامل اوس پننہِ شعری شخصیژ نش اوت تام الگ تہ واریاہس حدس تام بےنیاز تہ بے تعلق سپدمت۔ یہ کتاب اوسس بہ پننی شوقہ تیار کران۔

میہ آیہ امۍ سنزن شعرہ سۅمبرنن ہندۍ ناو برونہہ کن۔ اکھ "مس ملر” ترٲوتھ یۅس اکھ ابتدایی کوشش ٲس، وچھ میہ زِ امۍ چھہِ تمام کتابن ہندۍ ناو ترین لفظن پیٹھ مشتمل کرۍ متۍ۔ یہند ناول "گٹہِ منز گاش” چھہ تریہ لفظ، منزم لفظ، لاحقہ’منز’ چھہ دۅن اندن ہندین لفظن منز رشتہ قایم کران۔ امی وقتچ بیاکھ کتاب "کتھہِ منز کتھ” تہِ چھہِ تریہ لفظ تہ یمن درمیان تہِ چھہ یتھے تعلق۔ امہ پتے یۅس کتاب برونہہ کن آیہ، سۅ ٲس یہنز دویم شعرہ سۅمبرن "لوہ تہ پروہ”۔ امہ کتابہِ کور کامل کاشرِ شاعری ہنزن توانا آوازن منز شامل۔ امیک ناو تہِ چھہ ترین لفظن پیٹھ مشتمل۔ اتھ منز چھہ منزم لفظ، حرف اتصال۔

شعرہ سۅمبرنہ یم امۍ امہ پتہ پیش کرِ آسہ امۍ سندس نٔوس اسلوبس مزید مستحکم کران تہ امی نسبتہ چھہِ تمن ہندۍ ناو تہِ غیر روایتی۔ "بییہ سے پان” تہ "پدس پود ژھاے”، یم دوشوے ناو تہِ چھہِ ترین لفظن پیٹھ مشتمل، مگر یہندۍ منزیم لفظ چھہِ تکرار پیش کرنہ بدلہ ناون ہندv ارتقا تہ تنوعس کن اشارہ کران۔ اتھۍ چیزس سٔنتھ کور میہ فیصلہ زِ ناو گژھہِ ترین لفظن پیٹھ مشتمل آسن۔ ییژ ہن ٲس طے، مگر کیا؟ تہِ طے کرُن اوس مشکل، تکیازِ یہ شاعری اوسس بہ مرتب ضرور کران مگر یہ ٲس نہ میانۍ شاعری۔ میہ آو خیال زِ پننۍ دخل اندازی کم کرنہ خاطرہ کرہ بہ ناو امۍ سندی کنہِ شعرہ منز اخذ۔ یہ اوسم معلوم زِ یہ آسہِ امۍ سنز ٲخری شعرہ سۅمبرن، امہ کنۍ زِ امۍ ٲس 1980 برونہے شاعری تقریبا تراومژ۔ امہ پتہ چھیہ امۍ اکا دکا غزلو علاوہ زہ ژور نظمہ لیچھمژہ یم کشیرِ ہندین تواریخی حالاتن متعلق چھیہ۔ امہ قسمہ چہ نظمہ لیکھنک دس تُل امی۔

yim_myeni_sokhan

یہ خیال تھٲوتھ زِ یہ آسہِ امۍ سنز ٲخری شعرہ سۅمبرن تہ پننہِ شعری شخصیژ متعلق امۍ سنزِ بے نیازی مد نظر آیہ میہ یم تریہ لفظ امۍ سندِ قصیدہ منزہ اتھۍ: "یم میانۍ سخن”۔ اوت تام ٲسۍ امۍ سنزن کتابن ہندۍ ناو اکھ پیکر، اکھ تصور تہ اکھ استعارہ برونہہ کن انان۔ میہ اون یمن لفظن ہندِ دسۍ یمن ہند لفظی پہلو برونہہ کن۔ یمن لفظن منز باسیہ میہ بے نیازی تہِ، طنز تہِ تہ دعوی تہِ۔ میہ ییلہ کامل صابس یہ ناو تجویز کور، سونچمت آسین زِ میون ناو تھاونک راز چھس کتھہ تام پاٹھۍ اتھہِ آمت، تہ شاید اتھۍ پیش نظر وونن "ٹھیک چھہ”۔ نتہ ما آسہِ ہس پانس تہِ یتھے ہیو کانہہ ناو ذہنس منز، کنہ اتھ منز تہِ ٲس تسنز بے نیازی۔

میہ باسان "یم میانۍ سخن” چھپاونہ دنس منز ما آسہِ ہے پوتس امس میہ ہوس نابکار نیچوۍ سنز خوشی مقصد!

حیات عامر حسینی سنز شاعری

کانہہ تہِ بٔڈ شاعری ہیکہِ نہ روحانی یا فکری تصوراتن تہ خیالاتن نیبر سپدتھ۔ خالص خوبصورت لفظ، آہنگ تہ خود امکانی معنی یودوے ازۍ چہ شاعری ہند بوڈ حصہ چھہِ تہ لوکن ہندین دلن تہ دماغن برابر رنزناوان چھہِ، مگر یم چھہِ نہ اتھ ادبی کارگزاری کانہہ وسیع تہ سرون معنی عطا کٔرتھ ہیکان۔ اتھ شاعری پتہ کنہِ چھہ نہ زندگی متعلق شاعر سند  پنن سوچ کارفرما۔ یہ شاعری چھیہ زیادہ تر زبانۍ تہ معنی کہ ورتاوہ کہ حوالہ اتفاقی تہ ایکسیڈنٹل۔ اتھ منز چھہِ شاعر سندیو فکری تہ عملی تجرباتو بدلہ زیادہ تر لسانی سیاقس منز سپدن والۍ خودکار تجربہ درینٹھۍ گژھان۔ یہ شاعری چھیہ واریاہن مثالن منز شعری فارمہ ہندِ ورتاو چ کرتب بازی بنان۔ حیات عامر حسینی چھہ نہ امہ قسمہ چہ شاعری منز دلچسپی تھاوان۔ یہ شاعری ہیکہ نہ کانہہ ٹیگور، اقبال یا الیٹ پیدہ کٔرتھ۔

حیات عامر سنز شاعری چھیہ امہ لحاظہ ایمبیشس تہ تمن شاعرن منز شامل گژھنچ کوشش کران یم شاعری اکھ اہم مفکری کارگزاری تصور کران چھہ‏۔تسنز شاعری چھیہ اکی آنہ انسانی تواریخ تہ وجودی مسلن کۅم کرنچ کوشش کران۔ تسننرِ شاعری منز چھہِ زمان و مکانکۍ تصورات جایہ جایہ اظہار لبان۔ سہ چھہ مقامی صورت حالس تہِ اکس وسیع انسانی تواریخی پوت منظر کس گاشس منز وچھنک قایل۔ تسنز شاعری چھیہ انسانہ سندِ روحانی شناختچ تلاش۔

حیات چھہ نہ مختصر لریکل شاعری ہند زیادہ قایل، تسنز نظم چھیہ ایمبشس آسنہ کنۍ زیچھرس کن لمان۔ یہ چھہ اکھ سفر تہ اتھ زیچھہِ وتہِ قاری یس پانس سیتۍ پکناونہ خاطرہ چھہ سہ شعر کین ظاہری گۅنن یعنی آہنگس تہ امیجری تہِ سیٹھا کٲم ہیوان۔ یہ امیجری چھیہ رلہ ملہ مقامی تہِ تہ آفاقی تہِ۔ اتھ منز چھیہ کشیر تہِ تہ عرب وعجم تہِ، یہ چھیہ کایل تہِ تہ اکایل تہِ۔امہ کس آہنگس منز چھہ تواریخ کین پڈرین ہند گرز تہ وقتہ چین کۅلن ہنز روانی تہِ۔  حیات نین نظمن منز چھہِ خیروشر،  کاز اینڈ ایفیکٹ، سوال وجواب، مسلہ تہ حل بیک آن موجود۔ سہ چھہ پننہ نظمہِ ہندِ خاطرہ اکس مانوس ماحولس منز  وسیع علامتی شناخت پیدہ کرنچ کوشش کران۔

کمۍ تام چھہ انگریزی ادبس منز وونمت زِ بٔڈۍ شاعر چھہِ "کیا” ونان تہ لۅکٹۍ شاعر چھہِ "کتھہ پاٹھۍ” ونان۔ مگر حقیقت چھیہ یہ زِ اتھ "کیا”ہس تام واتنچ وتھ چھیہ یۅہے "کتھہ پاٹھۍ”۔ حیات عامر چھہ یۅہے” کیا” وول شاعر تہ یوت یوت یہ اتھ "کتھہ پاٹھۍ” یس کامہِ لاگہ، دویمین لفظن منز یوت یوت یہ موادس نظمہِ ہنزِ ہیژ تہ زبانۍ سیتۍ  کن ہیکہِ کٔرتھ، تیوت کن زِ مواد ییہ نہ الگ پاٹھۍ بوزنہ، تیوت روزن امۍ سنزہ نظمہ کامیاب تہ میہ چھہ پورہ یقین زِ کاشرِ معاصر شاعری منز کرن اکھ نوو تہ قابل قدر اضافہ۔