ساہتیہ اکاڈمی ہنز انتھالوجی "ہم کال کاشر شاعری”

انتھالوجسٹ ڈاکٹر عزیز حاجنی

[یم کینہہ لفظ لیکھنہ برونہہ کرہ بہ واضح زِ یہ انتھالوجی بناون وٲلس ادیبس سیتۍ چھیہ نہ میہ کانہہ ذاتی رش، کانہہ لین دین یمہ سیتۍ تنازعہ وۅتھہِ، کُنہِ مہربانی ہنز کانہہ توقع یمہِ کنۍ ناراضگی گژھہِ، بلکہ چھس بہ تمۍ سند مداح، یمہ ساعتہ تم سیکریٹری بنییہ بہ گوس سیٹھا خۅش یمیک اظہار میہ فیس بکس پیٹھ تہِ کو٘ر۔ مداح تہ خۅش امہِ مۅکھہ تکیازِ یہ میہ چھہ امۍ سندۍ واریاہ چیز پرۍ متۍ یمو سیتۍ اکس پرۍ متس لیکھمتس انسان سند تصور وۅتلان چھہ۔ ]

مگر یہ انتھالوجی وچھتھ چھہِ کینہہ سوال ذہنس منز ضرور وۅتلان یمن ہند جواب ژھارُن فطری کتھ چھیہ۔ گۅڈنچ کتھ چھیہ یہ زِ میہ چھہ نہ باسان ساہتیہ اکاڈمی، یہندِ خاطرہ انتھالوجی بناونہ چھیہ آمژ ، چھہ انتخاب کرن وٲلس کُنہِ قسمکۍ رہنما اصول دتۍ متۍ نتیجہ چھہ یہ زِ انتھالوجی ہند اکھ اہم اصول چھہ نظرانداز کرنہ آمت۔

انتھاوجی چھیہ نہ تواریخ تہ نہ چھہ یہ کانہہ ادبی جایزہ۔ یہ چھیہ نہ تژھ کانہہ دستاویز یتھ منز اکس ادیب سنز مثال دتھ بیاکھ مشراونہ آسہِ آمت۔ اتھ انتھالوجی یس مضمون پننۍ کتھ کہ ناوہ نتھۍ کرنہ آمت چھہ سہ شوبہِ نہ کنہِ صورتس منز ۔ انتھالوجی ہندِ خاطرہ یس چیز امہ بدلہ ضروری چھہ، سہ چھہ نہ کنی۔ یعنی انتخاب کتھہ پاٹھۍ چھہ کرنہ آمت تہ یم چیز منتخب کرنہ آمتۍ چھہ تم کیازِ چھہِ منتخب کرنہ آمتۍ۔ پرن وول گژھہِ نہ کنہِ تہ صورتس منز کانسہِ اکس ادیب سندس حقس منز متاثر گژھن، امہ کنۍ چھہ واریاہو نقادو فن پارن انتخاب کرن والۍ سندِ طرفہ نوٹ لیکھنس تہِ ٹھاک کو٘رمت۔

سوال چھہ یہ اگر اتھ پننۍ کتھہِ منز راہی تہ نادم سند ناو ہینہ آمت چھہ،نسیم شفایی تہ محمد احسن احسن، غلام رسول جوش بیترِ سند ناو تہ شعرہ مثالہ دنہ آمژہ چھیہ، کامل کیازِ چھہ مشراونہ آمت؟ یمے مسلہ مد نظر چھہِ نہ انتھالوجی منز امہ قسمکۍ پیش لفظ لیکھنہ یوان؟ غزلچ کتھ چھیہ تلنہ آمژ مگر کامل سند ناو چھہ نہ ہینہ آمت۔ اتھ سونچتھ سمجتھ مشرفس متعلق کیا ہش صفایی دیہِ یہ مضمون نویس؟ کامل سنز اہمیت آیہ اتھ انتھالوجی منز گۅڈے ختم کرنہ۔ غزلہ کہ تعلقہ چھہ نہ رفیق راز سند ناو تہِ کنُہِ۔

امہ پتہ یمو انتخابس کن۔ کنہِ فن پارس متعلق چھہ نہ وننہ آمت زِ سہ کیازِ چھہ شامل کرنہ آمت۔ کیا کامل سند اہم شعری کارنامہ تہ نمایندہ فن پارہ چھا "تٲے نامہ”؟ کیازِ تہ کتھہ پاٹھۍ؟ میہ چھہ نہ باسان انتھلوجسٹ چھہ کامل سندِ شعری سرمایہ نش یوت نابلد۔اگر کامل سند نمایندہ فن پارہ "تٲے نامہ” چھہ تیلہ گژھہِ راہی سند نمایندہ فن پارہ "ونہ وُن” آسن۔

سوال چھہ یہ تہِ وۅتھان زِ کینہہ شاعر کیازِ چھہ مشراونہ آمتۍ تہ کینہہ کیازِ چھہ شامل کرنہ آمتۍ؟ انسان چھہ سوچان زِ علی محمد شہباز، شمبو ناتھ بٹ حلیم، محمد یوسف مشہور، بشیر عارف، بشیر بشر، محفوظہ جان ہوۍ شاعر کتھ جوازس تحت چھہِ شامل کرنہ آمتۍ؟ اگر یم شامل گژھنس لایق چھہِ کیا قاضی غلام محمد، سجود سیلانی، غلام احمد گاش، فرحت گیلانی، موتی لال ناز، موہن نراش، مکھن لال کنول،گلشن مجید، اقبال فہیم، غلام محمد آجر، محمد امین شکیب،فیاض دلبر، محمد رمضان ہوۍ شاعر کیازِ آیہ نہ شامل کرنہ؟ کیا یم چھنا انتھالوجی لایق؟ کیازِ نہ؟

جاے کم آسنک عذر چھہ نہ کانہہ معنی تھاوان۔ اگر واقعی جاے مینتھ ٲس تیلہ گوٚژھ نہ اتھ منز عزیز حاجنی آسن،بلکہ قاضی غلام محمد۔

یہ انتھالوجی چھیہ اہم کتاب یۅس 24 ہن ہندوستانۍ زبانن منز ترجمہ گژھہِ۔ یم سوال چھہ جوابکۍ طلب گار۔ یمن سوالن ہند جواب چھہ نہ اتھ انتھالوجی منز کنہِ جایہ میلان۔