شعر تہ معنی

ٲخر دراو
لفظن ہنزِ گۅژِ منزہ
شعرک پنہ پونپر
تہ ژوٚل
نے غم دنیا
نے عم معاش

شعرس پتہ پتہ نیرتھ
کوت واتکھ؟
اتھ چھیہ نہ منزل یابی
بس وتہ کھروو!

وۅپر زیون ہنزِ
جسمانی خواہشہِ ہنز ژاپھ
یمس لج
تمۍ سندِ روحچ کج آواز
چھیہ شعرن منز
ہاہاکار کران

چانی زیورِ منزہ درامت
پھیار
یعنی شعر
چانی سوچکۍ دیوار
کران مسمار
کوتاہ کرہس
انکار

کھسۍ تن دریاوہ منزہ
گاڑو بدلہ خر
یا ربہِ کۅنڈل
ٲخر تہ نیرِ
شعرچہ بند بوتلہِ منزہ
جن

شعرچہ تھزِ لنجہِ پیٹھ
پننس جسمس کوٚنڈ ژٲنتھ
راگ گیون وٲلس
جاناوارس
سلام

ژھینی نہ ووٚب ییلہ کھس با لوٚب
شعرچہ لبہِ پیٹھ کمۍ کیا لوٚب

سہ تہِ اکھ شعرے سۅ تہِ اکھ تریش
قطرس منز یمۍ دریا لوٚب

شعرچہ لنجہ پیوٚو وسۍ پہۍ پن
واوہ چہ کۅچھہ دوٚپ میۍ ما لوٚب

تیمبرِ تتر تل زولن نار
شعرکۍ کوٚبۍ وشنیرا لوٚب

اکۍ ژھن ترٲوتھ پھٹمت شعر
تتھۍ منز بییۍ اکۍ دنیا لوٚب

لبۍ نہ رمز شعرکۍ لیکن
سا رے گا ما پا دھا لوٚب